شاركينا تجربتك مع تطورات مرض التصلب اللويحي ( MS ) .. نسأل الله الشفاء التام والعافيه

السلام عليكم ورحمة الله وبركاته 

شخباركم ؟؟ ان شاء الله تمام ؟ 

( إِلاَّ الَّذِينَ صَبَرُواْ وَعَمِلُواْ الصَّالِحَاتِ أُوْلَـئِكَ لَهُم مَّغْفِرَةٌ وَأَجْرٌ كَبِيرٌ )

رجاء من المشرفات عدم حذف الموضوع لان التجمع مايشمل كل شي وبنفس الوقت التجمع قديم .. فهالموضوع يستفيد الكل منه ..

انا عضوة قدييمه عندكم ولي معرف ثاني تعرفوني فيه .. سجلت بمعرف جديد عشان موضوع التصلب وابعد عن الملاقيف اللي ماراح يخلوني بحالي .. وبصراحه موضوع التصلب اللويحي خاص وانا ماعلمت احد فيه .

بصراحه انا شخصت قبل اسبوع بمرض التصلب اللويحي ، الحمد الله على كل حال . 

كنت اعرف المرض كاسم فقط وكنت اخاف ادخل علي تفاصيله كان اسمه لحاله يخوفني .. يعني ماكنت اعرف اي شي عنه .. 

شفت تجمع مريضات التصلب الله يشفينا اجمعين ،، بس على كثر ماقريت عن المرض بصراااحه مالقيت التفاصيل اللي كلنا نحتاجها.. 

عشان كذا انا الحين فتحت هالموضوع ابغى كل وحده تتكلم عن تجربتها ،، متى حست بالاعراض ؟
ايش هي ؟ 
اهملتها او تعالجت ؟
متى شخصوا المرض ؟ 
كم لكم ( الفتره ) مع المرض ؟؟
والسؤال المهم جدا .. هل تطور المرض ؟؟ يعني هل كل مره تجيك الهجمه نفسها او كل مره غير ؟؟ وتزيد عليك ؟ 
ايش تستخدمين علاج ؟ 
ومن ناحية التغذية والنفسيه ، تاثر؟
المتزوجه ، هل اثر في حياتك الزوجيه ؟ حملتي ؟؟ واجهتي صعوبات في الحمل والولاده ؟ في النفاس؟

يعني الموضوع يعبر عن تجاربكم مع المرض بما انه مجهول السبب والعلاج ، 

انا راح ابدأ ،

من شهرين صار عندي زغلله في العين اليمين و طولت تقريبا شهر بعدها صارت عيني لما احركها تالمني كثيير و يضرب عندي صداع نصفي قوووي كنت على البندول .. وما استفيد ، بعدها نملت القدمين اسبوع ونملت فخوذي من ورا ..رحت الطواري قالوا مافيني شي . بعدها ب 4 ايام دخلت علي دكتور اعصاب والحاله زايده يعني صاير الاحساس عندي يخفف بزياده.. 
دخلني المستشفي وسوا لي فحوصات دم واشعه mri واكتشف النقاط البيضا و المرض .. وكان بياخذ عينه من الظهر بس قال خلاص كل شي وضح ..
في الدماغ نقط بيضا قديمه ، فاتذكرت انها جتني تقريبا نفس الاعراض السنه اللي فاتت  وقالوا برد ..
طبعا اول ماعرفت الخبر انكاار ونفسييه زفت .. بس الحمد الله صليت ركعتين لله عز وجل وعرفت ان الله اذا احب عبد ابتلاه والله والله اللي هدداني اني فرحت ان ربي يخليني اكفر عن ذنوبي وانا حيه .. 

خفت اعلم امي ،، لاني عاااارفه انها ماراح تتقبله مثلي .. بتنكر .. بس زوجي يقول لازم اهلك يدرون اذا صار شي واحتجتي لهم الا وهم عارفين ..

مشيت على كورتيزون 5 ايام والحين علي فيتامين د ابره كل شهر مع الشراب كل اسبوع وفيتامين بي 12 يوميا..

خف التنميل بس ماراح ، الدكتور يقول يبي له وقت .. 
عيني الحمد الله خفت .. الصداع مازال موجود .. رقبتي متيبسه بس تعودت عليها ..
 
بس عندي بعد ابرة الافونكس .. كل اسبوع ابره .. اول مره كانت الاربعا اللي فات .. جاني بعدها سخونه وخفقااااان في قلبي والم في صدري .. سويت تخطيط لقوا القلب سريع بس مافيه اي سبب للالم .. 

يقولون ممكن من اعراض الابره ..

الحين انا انتظر نتائج عملية زراعة الخلايا الجذعيه متفااااءله فيها كثير ، و مسألة عملية القصطره هذه ماااالها شغل لان المشكله في جهاز مناعي ضد الجهاز العصبي .. واستغفر الله فيه دكاتره استغلوا الناس المرضى والا ترا التصلب ماله علاااج ومازالوا علي الابر .. الا اذا كتب الله .. ان شاء الله .. 
يعني رجااااء لاتجي وحده تقول عند فلانه والا علانه علاج ،، لاتستغلون حاجتنا للعلاج .. والله وصل الجشع في بعض الناس الي المرض ،، يوم انكم بصحه وعافيه وربي ما بلاكم قاعدين تستغلون ،، استغفر الله احمدوا الله علي الصحه ..  
وانا متفااااءله خير ... ان شااااء الله .. 

مااا اوصييكم الصدقه ثم الصدقه ثم الصدقه .. 
قراااءة سورة البقره او حتي سمااعها .. 
الدعاااء لله المغيث الشافي .. بكل وقت .. بعد كل صلاه .. الاستغفار .. 

هذه كلمات لنظرة الاسلام للمرض والمريض .. ياليت تقروونه والله حلوو ..
http://www.3refe.com/vb/showthread.php?t=94944