ميرنا٢٠١٩ @myrna2019

عضوة جديدة

شاكة بزوجي

السلام عليكم
يابنات انا بداخلي نااااار مدري كيف تنطفي.
بدخل بالموضوع ع طول..
أنا أحب زوجي وهو بعد يحبني ومتأكدين من حبنا لبعض
لأن سبق لنا انفصلنا بسبب تدخل أهله بحياتنا.
كانوا اهله يغااارون من معاملته لي وخصوصآ امه لأن ولدها الوحيد.
المهم يابنات حنا انفصلنا وحنا نحب بعضنا لكني ماقدرت اتحمل اهانات. كرامتي فوق حبي وفوق كل شي.
عشت انا وهو بعد الانفصال بحالة من الشوق والحنين مايعلم فيها الاربي.
وكل مرة يتقدم لي ارفض ارجع له.
لآني اكتشفت انه يكلم بنت ومتواعد معاها بالحرااااااام.
تسألوني كيف عرفت؟
دخلت حسابه. برقمه السري اللي متوقعته وطلع صحيح وشفت كل شيء
والله يابنات بغيت اموت حرق قلبي وطاح من عيني
وحاولت اشيله من قلبي وقلت الحمد لله انفصالنا خيرة
لكن اهو ماتركني وكل كم شهر يرجع يطلبني من ابوي وانا ارفض وانا ابكي قلبي متعلق فيه حييل. لكن عقلي يقول لاىهذا خاين.
كانوا يتقدمون لي كثييير وبعضهم افضل منه من نواحي كثيرة.
لكني ارفض لأن قلبي معاه اهو رغم سلبياته.
لكن كنت ا حبه لأن طيب معاي وحنون وكريم وهو اللي يفهمني اكثر حتى من نفسي.
لكن خيانته لاتغتفر لأنها كانت وحنا متزاعلين قبل اصدار الطلاق.
يعني كنت ع ذمته.
المهم مرت أكثر من ٣ سنوات وحنا منفصلين وأخيرآ وافقت اتزوجت من غيره لأجل انساه وابدأ حياة جديدة.
لما عرف بالموضوع جا طلبني من جديد وبللت دموعه وجهه.
وقال انه يبيني ويقسم انه بيخليني اسعد امرأة وماراح يسمح بالمشاكل تعكر علينا. اهو ع باله اني رافضه بس بسبب المشاكل مع اهله مايدري عن السبب الثاني.
لكن ما أنكر اني ارتحت لكلامه ولان قلبي
استشرت كثير. وآخر مستشار قال لي توكلي على الله ورجعي له.
اهو سلك طريق الحرام لأنك مو معاه. ولما ترجعين راح يترك.
اقتنعت بكلامه واستخرت وارتحت ووافقت.
ورجعت له وفعلآ عشنا احلى من سنوات زواجنا الأول.
وبدون اي مشاكل.
لكن اللي كان مضايقني.. انه حاط رقم سري خاص بجواله.
ودايم يكلم سناب واحسه يتضايق لما اقرب من جواله وهو يدردش.
انا نغزني قلبي. بس قلت مافي دليل.
لكن مرة من المرات سويت له اضافة وقبلني وهو مايدري انها انا.
وصرت اتابع متابعاته. لقيت معظم اللي يتابعهم بنات واحيانآ يرسل لهم صباحيات وكلام عام
هنا انا توترت وبدأ الشك يدخل قلبي.
اهو مايرضى اني اضيف شباب.
بينما اهو عادي عنده يكلم حتى.
لكن تجاهلت اللي صار مابي مشاكل.
بعد مدة صديقه يبي يسافر بلد عربي يشتغل وزوجي سافر معاه يوم واحد.
قال مارح نتأخر
انا نغزني قلبي لان صديقه عزابي. لكن ماقدرت امنعه.
لما راح ادق عليه مايرد علي.
ولما رد كان الوقت الساعة ٣ الفجر ورد بالوتساب مو ع الاتصال
قلت له كلمني قال ايش تبي قلت اتطمن عليك ماجيت وانت قلت مارح تتأخر.
قال تعبنا وحبينا نريح وبرجع الصبح.
ببعد مارجع قلت له ليش يافلان ماترد علي.
وقت اللي اتصلت قال كنت نايم
لكن والله مو مصدقة اهو حتى لو نايم ويدق جواله يرد يجلس ع طول من نومه.
قلت له ليش بعد ماجلست رديت واتساب ما اتصلت.. يقول ماعندي رصيد.
والله كلامه مو صحيح اهو مستحيل يخلي جواله بدون رصيد.
كلها اعذار... غير انه كان متروش قبل يطلع ولابس احلى لبس.
والله يابنات ان هالموقف هزني وجرحني جرح كبييييييير
احس انه خانني وانا احساسي مايكذبني غير تصرفاته اللي تجيب الشكوك.
والله احيانآ اقول بروح لطبيب نفسي.
اجلس بيني وبين نفسي ابككككيييييي.
ما اتخيل انه يرتكب الزنا.
انا مو مقصره عليه بشي بالعكس اتكشخ واتزين واتعطر واهو معجب فيني ولا ينتقدني ويقول انا احبك لجمالك الخلقي والخلقي.
طيب ليش يخووووننني
ليش
وكيف اعاتبه واهو لكل سؤال مجهز رد.
لا وفي مرة طلبت منه يلغي الرقم السري عصب علي
وقال انتي شكاكة ونكدية وتبين تطفشيني من البيت.
قلت له طيب ريحني ومعاد بطلب منك شي بس ابي اشوف السناب حقك.
رفض رفض صارم وصار يصارخ وقلب الطاولة علي.
وانا بصراحة مابي ننفصل.
لكن ابيه يعقل ويترك بنات الحرام.
ابيه يحافظ علي مايخونني
ويخلص لعلاقتنا.
اخاف يكرر فعلته. ساعتها اكيد مارح اتحمل ولا راح اسامحه.
كيف اتصرف معاه لأجل مايفكر يرجع للخيانة؟
وكيف أبرد ناري منه ودي اعاتبه واصارخ عليه واقول له عن الاشياء اللي اكتشفتها منه ودي ازعل لكن ادري هذا مابيفيد الا بيكابر وبيزيد النار حطب.
سامحوني طولت عليكم لكن جد هالموضوع متعبني ومالي غيركم بعد الله ابوح له.

يلزم عليك تسجيل الدخول أولًا لكتابة تعليق.

تسجيل دخول

ام امين ابراهيم • 5 سنوات

انا لله وانا اليه راجعون
دائم ادعي بـ اللهم اجرني في مصيبتي وخلف لي خيراً منها
اللهم الف بين قلوبنا واصلح ذات بيننا واهدنا سبل السلام.
الله يشرح صدرك
اللهم صلى على محمد وال محمد

العليا❤️ • 5 سنوات

ابدا لاتصارحينه بالاشياء اللي تعرفينها عنه مع الوقت يشوف انك شايفه وراضيه وبيزيد
ارسليله مقاطع عبر الواتس ومواعظ
وادعيله في اوقات الاستجابه
الله يفرج همك