شخصية الأب في زوجي جننتني .. ايش الحل معاها

السلام عليكم ورحمة الله

بدخل بالموضوع على طول

تخيلوا يابنات

انا متزوجة من 4 سنين تقريبا .. زوجي شخصيته شخصية الاب .. يعني يحب يعطي ولا يحب ياخذ

انا ماني عارفة اتعامل معاه زين .. ابغى افرحه بشي مني بس ماني قادره

مثلا اذا انت مرضت يهتم فيني ويوديني المستشفى .. وحتى لو جات لي سخونة حتى الكمادات يسويها لي بنفسه ..

حتى بأوقات الصفا والهدوء .. دايم يقولي انه انا اخذتك اميرة من بيت اهلك ,, وبحاول اعيشك ملكة

قولوا ماشاء الله تبارك الله

المشكلة طبعا مو في اهتمامه فيني .. بالعكس هذا شي يسعدني ومره يفرحني

المشكلة انه مايحب ياخذ اي شي مني .. حتى اخواته نفس الطريقة ماياخذ شي منهم مع انه قايم بشؤونهم وشؤون اهله .. لكن مايطلب منهم شي ابد

حتى هو لمن يمرض مايحب ابد اني اهتم فيه .. ويروح يسوي كمادات ومشروبات حارة بنفسه .. احيانا حتى مادري انه مريض الا بعدين

مثل مرة كنت عند اهلي وكان يتصل علي يتطمن شبه يوميا .. رجعت لبيتي بعد اسبوعين واكتشفت انه كان مريض بحمى وسخونة من ورقة شفتها عند الدكتور .. قلت له ليش ماقلت لي انك مريض ( مع اني كنت دايم اساله ويطمني يقول كل شي تمام ) .. يقول مافيه داعي اخليكي تقلقي كلها سخونة عادية

حتى راتبي وفلوسي مايخليني اساعده .. يعطيني مصروف شهريا ويقول راتبك لك خليه بحسابك ماتدرين وش يصير بالدنيا .. والحمدالله راتبه كويس وماشي

قبل فترة كلمني وقالي ودي اشتري ارض نخليها للاستثمار .. وحصلت ارض حلوة اعجبتني بس ماقدر ادفع الا نصها ... انا فرحت انه اخيرا يبغى مساعدتي وقلت له فداك النص الثاني واعطيته من فلوسي

طبعا راح اشترى الارض وجاب لي نسخه من الصك .. ولمن طالعت فيه لقيته حاط الارض باسمه واسمي وانه الارض بيننا 50%... يعني خلاص انا زوجتك وماقلت لك حط الارض باسمي .. انا زوجتك مو شريكتك

يعني الحمدالله هو طيب وكل اموره تمام ماشاء الله تبارك الله .. بس مو معقولة مايحب ياخذ شي مني .. ابغى احس انه محتاج لي ومحتاج لزوجة تراعيه .. مو بس هو اللي يعطي ولا ياخذ اي شي

حتى لمن اشتري له هدية ولا شي ... ماحسه ينبسط كثير فيها .. الا ماحسه ينبسط مرة ابد ابد ..


شخصيته مثل شخصية الاب بزياااااااااااااااادة .. بس يحب يعطي مايحب ياخذ .. حتى اهله عارفين انه شخصيته كذا وقالوا لي وقت الخطبه انه خدوم مرة ويحب يساعد .. بس ماتوقعت للدرجة هذه

احس اني مالي دور بحياته .. حتى ساعات اقول لو اتركه واروح بيعيش عادي من غيري مابتفرق معاه .. لانه ماحس لي دور بحياته ابد .. اللهم شوي طبخ وغسيل بس

طبعا فيه مشاكل عادية وطبيعية تصير بيني وبينه مثل اي زوجين .. عشان لاتجي وحدة تقول انه مسويه حياتهم مثالية ^_^

اتمنى اعرف اللي عندها زوج او اخو مثل كذا تخبرني كيف اقدر اتعامل معاه ..