شرايكم بموقف زوجي ؟؟؟

السلام عليكم

امس كنا نتسوق انا واياه بالسوق وفجاة حسيت بدوخه قلت له احس اني دايخه قال يله نرجع للبيت .. وانا امشي حسيت اني بدوخ خلاص قلت له يا فلان انا بجلس وانت جب السياره اخاف اطيح عند العالم .. قال لا منتي طايحه تعالي بس

وراح يمشي قدامي مساااااافه حتى ما التفت علي وانا ذيك اللحظه ما همني موقفه كنت تعبانه وخايفه اطيح على الارض

يوم وصلنا البيت نزل وفتح باب البيت وخلاني وراه وطلع للغرفه وشغل التلفزيون وانا مو قادره اشيل رجولي انسدحت على كنب الصاله تحت ... واحس الغرفه كلها تدوووور بعد شوي نزل من فوق وقال فيه شاهي ؟؟ وانا اشوفه يدووور مع الغرفه

قال للحين تعبانه ؟؟ قلت له حاسه الدنيا تدور صار يتتريق قال ملاهي هذي مهي دنيا ويضحك وبعدين شغل تلفزيون الصاله وقعد يقلب بالقنوات وياكل شوكولاته

وهذا اخر شي اتذكره قبل ما يغمى علي .. ولما صحيت لقيته زي ماهو ما تحرك من مكانه وعندي الشغاله ترشرش علي مويه
وهو يقول للشغاله جيبي لها عطر موب مويه يالخبله ويقلب بقنوات التلفزيون

اليوم رحت مع ابوي طلع معي فقر دم وهو عارف اني رايحه للاسعاف وما سألني وش صار معك ... يومجا الظهر من الصلاة قال ليش ما سويتي غدا ؟ قلت توني جايه من الاسعاف
سكت وطلع للغرفه

وهذي مو اول مره يتعامل معي كذا بالرغم من اني اركض له ركض لا تعب