اليوم جايبتلكم طريقة غرزة تريكو بتمنى تعجبكن ويكون شرحي واضح .... بعرف كتير غرز بالتريكو وان شاء الله بقدر نزل طريقة الكل
هي غرزة اليوم .... مابعرف شو اسمها وأغلب الغرز هيك مابيكون الها أسماء
هي الغرزة سهلة كتير وعبارة عن دورين بس بيتكرروا على طول
أنا عملت 22 غرزة
الدور الأول : بنشتغل 4 مقلوب ... بنرجع منهن 2 على السنارة التانية .... بنجيب الخيط لقدام يعني لصوبنا وبنرجع بنرجع الغرز لمكانها على السنارة الأولى بدون شغل طبعاً .... وبنكرر 4 مقلوب بنرجع 2 بنجيب الخيط وبنرجع نرجع الغرز لمحلها ليخلص الدور
الدور التاني : رح يكون سهل كتير ... 2 وجه .... 2 مقلوب وبس ليخلص الدور
بس عندي ملاحظة هي الغرزة فينا نقطعها وتعطينا شكل تاني وهي الصورة رح توضح كيف .... عملتها بخيط أرفع لتشوفوا كيف بتطلع على الرفيع وعلى الغليظ
أما كيف بنقطعها ..... فسهل كتير بعد مانشتغل شوي على حسب مابنحب يكون الطول .... رح نبدل موقع الغرز ... وهالمرة رح نبدأ 6 مقلوب .... ونرجع 2 غرزة ونجيب الخيط لقدام ونرجع نرجع الغرز لمكانها .... ليش 6 غرز .... 2 لبداية الدور لحتى يتعاكس الشغل و4 اللي هنن الرسمة نفسها
بتمنى يكون الشرح واضح .... واي سوال انا حاضرة
بتمنى تعجبكن لحتى نزل الغرز التانية