شسوي بنات اخت زوجي..... استغفر الله ؟؟؟؟؟؟

السلام عليكم ورحمة الله وبركاته ..
كيفكم بنات ان شاء الله بخير ..
بنات انا طايحة بمشكلة وقلبي شاب نار من داخل وماني عارفة ش سوي ابيكم تشيروني ..
بقول لكم قصتي وطبعاً بحاول أختصر لأني لو كتبت بالتفصيل يبي لي مجلدات ..
قصتي تبدأ من قبل ثلاث سنوات لما انخطبت على ولد خالتي رجال محترم واخلاق و((((طيب)))) وحطو تحت كلمة طيب ملياااااااار خط .. يعني طيب الى درجة ان لو أحد يجي وياخذ اللقمة من فمه مايقول لا ..
الحمد لله اني احبه واهو يحبني بس بصراحة يابنات طيبته الزايدة تخلي الناس تستوطي حيطه وتستغله وأولهم أهله ..
يعني بوضح أكثر قبل مايخطبني ولما كان يدرس بالثانوية طلع من المدرسة واشتغل بس عشان يساعد أهله في المصاريف وكان يستلم الراتب من هنا ويعطيه امه من هنا .. بتقولو مافيها شي امه واهله ويساعدهم المشكلة مو هنا .. المشكلة انه كان يقصر على نفسه لأبعد الحدود يعني حتى اللبس والثياب يلبس مع اخوه عشان ماياخذ شي من الراتب وفي المقابل امه اللي اهي خالتي الله يسامحها كانت تاخذ هالفلوس وتعطيهم بناتها عشان يدرسو دبلومات وعشان تشتري هدايا لصديقاتها بس عشان يقولو الناس ان اهي كريمة يعني بالعربي الفصيح مسرفة بمعنى الكلمة .. وماكانت في يوم تقول لولدها خذ المبلغ الفلاني وخذ لك شي ولا كانت تقوله حاول تجمع لك قيمة سيارة او قيمة مهر يعني ما كأنه ولدها ..المعزة والمحبة كلها لبناتها ماتقصر عليهم بأي شي ..
المهم ما اطول عليكم لأن لو بتكلم عن سوالف خالتي مابخلص والله ..
بعد ماخطبتني لولدها قالت لي سمعي يافلانة ترى ولدي مايطلع من شوري ويستشيرني في كل صغيرة وكبيرة ..ويوم مارحنا نشتري (الشبكة الذهب ) والله يابنات دورت يوم مايكون خطيبي موجود ولا امي وجاتني البيت مع زوج بنتها فجأة وقالت لي اطلعي بنروح نشتري لك الشبكة .. رحت معاها ولما وصلنا هناك قالت لصاحب المحل دور لي شبكة رخيصة قسم بالله يابنات هذي كلمتها وشرت لي اقبح شبكة في المحل والله العظيم كل من شافها استغرب يقولون متأكدة هذي شبكة عروس كأنها سلسال .. ولا تقولون يمكن ظروفهم او كذا .. كان زوجها معطيها مبلغ معقول 6000 ريال عشان الشبكة والدبل بس شرت لي وحدة ب 2300 ولو كان في ارخص اكيد كانت اخذتها ..
المهم انا بلعت الغصة وسكت واول ماوصلت خالتي البيت اتصلت على ولدها وقالت اي رحت اليوم مع فلانة واختارت لها شبكة ناعمة بس يللا مدام ذوقها وعاجبتها خلاص .. طبعا لما قالي خطيبي كلام امه والله حسيت بنفجر وبصيح بس مسكت نفسي وسكت وصبرت ..
المهم بعد فترة كنت اتكلم مع خطيبي وقالي بالصدفة انه عليه فاتورة تليفون بقيمة 17000 ريال .. انا انذهلت قلت له ..انت اللي مكلم فيها؟
قال لي : لا هذي اختي الكبيرة طلبت مني اطلع لها شريحة جوال بإسمي ووصلت 17000 ولا دفعتها ..
قلت له : وانت ساكت وعادي الموضوع يعني ؟
قال لي : اش تبيني اسوي ياقلبي ؟
بالله عليكم يابنات شفتو في حياتكم انسان ملعوب عليه لهالدرجة !!
وبصراحة بنات مابي اتكلم عن اخته بس صراحة الكل يتكلم عنها انها تكلم شباب استغفر الله وانا تأكدت بنفسي كذا مرة اشوفها بالصالة وماتنتبه لي وتكون تكلم شاب حتى صوته يكون واضح من السماعة .. ولما تشوفني ترتبك وتسوي نفسها تكلم بنت وتقول بعدين اكلمك ..واهي ماعندها صديقات ابد ابدددددد
المصيبة والأدهى انها متزوجة وزوجها للأسف مهو رجال تحركه بيدها مثل الدمية خلته ياخذ قروض من البنك ومن الناس بمبالغ وصلت ل ست مئة ألف ريال قضتها على فواتير تليفونات وسفرات واثاث والماسات وغيره وبعدها طبعا ماسدد شي فانسجن .. وطول فترة سجنه يابنات قسم بالله المكياج مافارق وجهها والضحك والوناسة واللبس المغري والله تقولو وحدة في شهر العسل ماكأن زوجها مقطوط بالسجن بسببها ..
المهم انا مابي اتكلم عنها لأن هذي بعد استغفر الله لو بتكلم عنها بألف مكتبة كاملة ..
طبعا كلمت خطيبي كذا مرة ان يكلمهم بخصوص الفاتورة ولما كلم اخته قالت بتقول لزوجها لما يطلع من السجن يدفعها وصبرت وسكت 3 سنوات وكان خطيبي يتصل عليه مابين فترة وفترة يكلمه عشان يدفعها لو اقساط لأن اهو عنده عمال يشتغلون برا وتوصله مبالغ ماشاء الله من وراهم لدرجة قلنا لهم لو تدفعو 200 ريال شهريا وكان يقول صبروا شوي لين اطلع من السجن وراح ادفع المبلغ كامل .. ومرت الايام وطلع من السجن قبل شهر تقريبا وراح له خطيبي وتحمد له بالسلامة وفاتحه بسالفة الفاتورة وقام يماطل كالعادة شوي يقول :
ضروري ادفعها؟
وساعات يقول : بدفعها اقساط ..
ويرجع يقول : هذا موضوع بين اخ واخته لا تدخلوني بينكم ..
ولما اكلم اخته تقول : لاتدخلي نفسك هذا موضوع بين رجال ..
وآخر شي يابنات طاح القناع واعترف وقال تدرو شلون اغسلو يدكم ماراح ادفع شي مانا مضطر ماكو شي يثبت ان الفاتورة كانت لنا كل شي بإسم فلان واذا تبو تشتكو في المخفر روحو اشتكو ماراح تقدرو تسوون شي ..
شفتو آخرتها يابنات والله حسيت اني بموت حسيت بتجيني امراض الدنيا من القهر .. يعني الطيب في هالزمن ينأكل حقه والواحد يخاف ولا يأمن حتى من اقرب الناس له حسبي الله ونعم الوكيل ..
ضاقت فيني الدنيا حاولنا ندخل طرف ثالث يكلمه .. كلمنا ام خطيبي طبعا انصفت بنتها وقالت لي لاتدخلي في هالموضوع وكلمت عمي ونفس الشي .. بالذمة يابنات اشلون هالموضوع مايخصني ؟؟ واحنا الحين نجهز لزواجنا ومضغوطين جداً ماديا الاسعار مرتفعة نار والراتب عالقد ولا في احد من اهله ساعده لو بريال لا اخو ولا ابو ولا ام ..
احنا ماطلبنا شي بس على الاقل يدفعو فاتورة بنتهم يعني اهي استغفر الله تلعب بذيلها واحنا ندفع الثمن غالي ..
حتى لما هددتها وقلت لها الكل عارف سوالفك واولهم اخوكي لأنه شافها مرة تكلم واحد بالتلفون وكلمها قالها ليش تكلمين شباب استغفري ربك .. قالت له ش سوي من الطفش .. والله لو كنت انا اخوها كنت بمسكها من شعرها واربيها بس اهو طيب طيب مايهش ولا ينش ..
ش سوي يابنات بموووووووت من الحرة من وين ندفع هال17 ألف واحنا بس ايجار الشقة اللي لقيناها ب 24 ألف في السنة لأن الاجار مررررررة مرتفع ومالقيناها الا بطلعت الروح .. والله ضاقت فيني الدنيا ليل ونهار اتحسب عليهم ..لا والمشكلة انهم طردو ولدهم وقالو له زوجتك تطول لسانها على اختك وتسكت عنها .. يعني بالذمة والضمير شين شين وقوي عين والله عندهم قدرة عجيييييييييبة في انهم يقلبو الحق باطل والباطل حق .. حسبي الله عليهم ونعم الوكيل والله ماعندهم خوف من ربهم متعودين على اكل مال الحرام ياما وياما خالتي سوت جمعيات واكل على الناس فلوسهم وبعدين عيالها يدفعون عنها عشان لاتدخل السجن يعني عندهم تاريخ عريق في النصب شسوي يا بنات ش تشيرون علي والله محتارة ماعندي غير الله ثم انتو ألجأ لكم ..
آسفة طولت عليكم بس هذا فيض من غيض وماقلت ولا حتى ربع اللي قلبي من الهم ..
ادعو لي بنات محتاجة دعائكم ..
لو كنتو مكاني شلون تتصرفون ؟؟



حسبي الله ونعم الوكيل .. حسبي الله ونعم الوكيل ..حسبي الله ونعم الوكيل فيهم