شصارلي بعد التلقيح الصناعي والانابيب

السلام عليكم
مرحبا اخواتي الله يرزقكم الذريه الصالحه وحده وحده ولا يحرمنا من كلمة مااااااااااااماااااااااا

بكتب لكم قصتي ابي افرفش ....انفه ......الاقي احد اتكلم معاه ويفهمني لانه عايش مشكلتي وحاس بمعاناتي

قبل سنه سافرت برة وعملت أنابيب (والمسكينه امي كل يوم داقه علي وتبكي ) غربه وكربه....المشكله عند زوجي ضعف ....المهم عملنا العمليه وكنت مبسوطه رغم الوحده والمعاناه اللي حصلناها وطبعا ماكو وسائل ترفيه بالمنطقه ولا طلعات حلوه لان المستشفى بمنطقة عمليه بحت...ماكو غير سوق قريب وكنت اروح مع زوجي احيانا فيه لان الليل طوييييييييل ومممللللللللل واذا شفت شي دباديب او لعب لتزيين غرف الاطفال انهبل عليها لا واذا شفت ملابس حوامل اقول لزوجي شرايك بذي حلوة صح ؟؟.... لا هذا اللون احلى
قال لي : ولا يهمك حبيبتي اول ماتحملين اشتري كل اللي نفسك فيه بس لاتخضين نفسك من الحين .... وبعد 17 يوم ... من العملية نزلت الدورة اللي حطمت كل احلامي ....
مادري شقول لكم كان زوجي طالع يشتري اغراض كنت حايسه مسكين شقول له اذا جاني شموقف امي المسكينه اللي تتحرق عشاني .... دموعي تنزل بدون ماقدر اني اوقفها .....
لحد ماجا زوجي واول ماشاف شكلي من غيرماتكلم عرف .....
هداني شوي وقال لي ماعليه ان شاء الله مرة ثانية تضبط ليش تزعلين نفسك هذي ارزاق والارزاق بيد رب العالمين. ..... قام وتوضا وصلى ركعتين شكر لله وسجد شكر لله.

بعد هالسفرة اللي خسرنا فيها الغالي والنفيس بدون فايده ولا عايده بقينا شهر او اكثر نفسياتنا تحت الصفر .....

والحين بهذا الشهر رحنا بسمتشفى حكومي وعملنا عملية تلقيح صناعي(حقن داخل الرحم)
وهذي الرحله لاتقل تعبا عن سابقتها مشاوير بعييييدة بالسياره واحيانا نروح طيران .. وبيوم العمليه بصراحه نفسيتي تعبت بسبب الدكتور كان جاااااف في التعامل تصورو اول مادخل الغرفه قال لي: ماعندك غير الدعاء بصراحه تحليل زوجك تعبان بالمرة عموما تعالو الشهر الجاي ان شاء الله نعمل لكم انابيب افضل بس الحين مانقدر نسوي غير التلقيح الصناعي
وهو يشتغل بالعمليه مرة ثانيه كمل كلامه وقال:
المرة الجايه يعني الشهر الجاي او اللي بعده فكريني اعطيك علاج لان عندك بداية قرحه

بصراحه انا مومعترضه على حكم الله ومن جد قلت لزوجي هالمرة احس باحساس مختلف تماما عن السنة الماضيه احس اني موكله امري لرب العالمين يتولى امري واللي يكتب لي راضية فيه لكن اسلوب الدكتور غاضني واحرجني وماخلاني حتى اسأله اكثر من الصدمه المفروض الدكتور يعطي المريض امل مهما كان ضعيف لكن اسلوبه كأنه يقول ماكو امل بالمرررررررررة حتى اني اتصلت بزوجي مباشرة وقلت له الدكتور يقول التحليل مرة تعبان ياليت تتفاهم معاه تسأله اكثر لاني استحي والمسكين زوجي انصدم وراح بسرعه لكن زوين ان قابل الدكتور الثاني بصراحه تعامله راقي بالمرة ... شوفو الفرق بين الاسلوبين : قال له احنا بعد ماصفينا الحيوانات المنوية الكويسه صفت عندنا كمية قليله لكن احنا دخلناها المختبر ونشطناها وكل شي بيد رب العالمين الله كريم الشهر الماضي كانت الست مايناسبها لا انابيب ولا تلقيح صناعي بعد تنشيط الطرفين لان البويضات قليله وتحليل الزوج سيء الظاهر فقلنا لهم جامعها بشكل طبيعي وكان الامل اقل من الضعيف ومع هذا الله كتب لها الحمل وحملت ان شاء الله يكون فالها فالكم والله يكتب اللي فيه الخير.
لاحظتو فرق الاسلوب .....................سبحان الله

المهم اليوم نزلت الدوره علي معلنة عدم دخولي عرش الامومه ومع هذا انا مو زعلانه بالعكس اقول الله يمكن شايل لي شي افضل .... الله كريم وقلت الحمد لله على كل حااااال والله اعلم بالافضل والانسب لي ولكم وبأيوضع نحن بعين الله يعلم بحالنا ويسمع دعائنا فلن ولن يبخل علينا ولكنه يعلم بما لا نعلم ويرى مالا نرى
وان شاء الله بنعيد العملية بعد شهرين ادعولي الله يرزقني واياكم بالذرية الصالحة