((((((( شعارنا لنترك الرفاله ونلتفت لشعورنا)))))))))

أول شي السلام عليكم ورحمة الله وبركاته ...
ثاني شي انا مو صاحبة اليوزر نيم انا صديقتها ومن زمااااااااااان ودي أشارك معكم بس , كل مااشترك في المنتدى ربي مايكتبلي نصيب اقدر اشارك , المهم ابقولكم قصتي كللللللللللللها كاملة
من غير نقص , ويشهد عليه ربي اني ماكذبت ولابحرف فيها , وان كل شي كاتبته مجرب مني شخصيا ,
اتفقنا;) ,,,

اول شي اذكروا الله , وقولوا بسم الله ماشاء الله تبارك الله ولاقوة إلا بالله, , ,
نجي للسالوفه المهمه :
انا جتني فترة شعري مرررره مررره مررررررره خف وتساقط , واشتغلته عوامل التعريه,
المهم اني ماقصرت وانا بعد جاني كذا فتره زي الحالة النفسية وكنت مع هذا كله
(انتف-أقطع-أقلع-آكل) شعري زياده على مابه من بلاوي فصار شي عجب , لدرجة انه وربي صارلي فراغات بشعري كثييير , حتى حسيت انه من قدام صلع شوي,فبما اني كنت هنا في عالم حواء كنت اقدر اقرأ بس ما أقدر اشارك لولاالله ثم صاحبتي ذي الله يسعدها , فخليت لي برنامج عالبركة كل مافضيت حطيت شي على شعري, والله يجزاها الجنة اللي أخذت وصفة منها وفادتني ,,
استخدمت الآتي :


أول شي خلصت الكلية ففضيت لنفسي , بناء عليه تمعيط الشعر بالاستشوار ماعاد فيه
واستخدمت على شعري كثييييير خلطات راح اكتبها كلها ...
جيبوا ورقة وقلم وتوصوا بالعطار:22:


ثاني شي : الشامبو اللي كنت استخدمه على شعري حطيت عليه بيضة وحده + ملعقة خل تفاح


ثالث شي :لاصرت مرررره سنعه ومهنمه بشعري حق مرتين بالاسبوع احط الخلطات وبالعاده مره وحده بالاسبوع لاني ماحبها على رآسي
واخذت:
الحنا ثم الحنا ثم الحنا
والله مازان شعري بعد الله وتكثف الا بالحنا , عاد اللي ذابحه شعرها بالصبغات السدر يؤدي نفس الغرض
كنت آخذ الحنا على حسب اللي يكفي شعري واخلط معاه بيضه+زبادي+حلبه+محلب+ورد مجفف
+ريحان+سدر +قشر رمان+اي زيوت عندي شوي شوي من كل شي على قد مايكفي شعري واحطه على شعري
حق ساعتين بس ولو تتحملين اكثر ياسلام عليك:kiss:
بس انا مشكلتي اقرف من الريحه وبعدين يصير عندنا حالة استنفار في البيت بسبب الخلطات
بس كله يهون لاجل الشوش:232:
بس يصير شعري زين ماعلي منهم


رابع شي: قناع الكثيره-الكثيراء لايفوووووووووووووتكم حتى لاصار عندكم عزيمة ولا مناسبة الطخوا بشعوركم وااله انه شي يكفي المعه اللي يعطيها لشعرك انا كنت اخذ الكثيره واطحنها واحطها مع مويه دافيه ليما تصير ثقيله شوي واحط اللي يكفي شعري
لاتفننت عاد وكنت رايقه حطيت معها سدر او زبادي او اي انواع زيت وينفع تخلطينها كلها سوى
بس لاكنتي مستعجله وماتبين ريحة ولا هم يحزنون حطيها لحالها مع المويه تكفي وتوفي


خامس شي :الزيوت ماخليت زيت ماحطيته على قولة امي الله لايخليني منها تقول:
(لو الزيوت اللي تحطينها بشعرك حطيناها بأرض كان طلع بترول):hahaha:
الحاصل احسن شي نفعني منهاـــ
زيت جوز الهند العلبه الخضراء القديمه ام خمسة ريال ايوه هي بالضبط
خلطت معاها فنجان محلب مطحون+فنجان حلبه مطحونه وحطيتهم بعلبه تكفيهم وخليتها
بالشمس ثلاث ايام ولازم تخضونها ترجونها تحركونها وصلت
ولافضيتي بالبيت حطيها على شعرك مابتخسرين شي الا الكسل
_ وبعد زيت الجرجير مره ممتاز بس مشكلته كان يحرقني في فروة الشعر فخلطته مع زيت سمسم
وشوي زيت زيتون او زيت طبخ لاتبحلقون بعيونكم ايه اي زيت طبخ تراه زين ولو لحاله
_ وبعد زيت أم الجدايل زين
_طيب انا بدال ماتعب نفسي كل شوي احط زيت خلطت من زيزتي كلها شوي شوي والله انه زين
اي زيت عنك حطي منه شوي مثلا زيت زيتون+اي زيت طبخ+زيت سمسم+زيت ام الجدايل+
زيت جرجير+زيت انوب+زيت دابر املا خلطت لي شوي من كل شي وحطيتها بعلبه وقت ما ابي احطهم على شعري ادفيهم شوي احط العلبه في مويه حاره واخذه وهو دافي واخليه برضوا حول الساعتين
ولازم تغطين شعرك بكيس نايلون مع اي خلطه او زيت عشان البصيلات تتفتح فتآخذ الفايده


سادس شي : بعد قناع سريع جدا زبادي+مايونيز+بيضه+عسل+(جبنه ومربى امزح لاتصدقون)
بعد نص ساعه تكفي عالشعر من هذا القناع بس ينفع فك ازمات فهمتوا:eek: :eek:


طيب بعض النصايح:
*اتركوا الاستشوار فترة لاتتعب شعوركم سووا مثلي حركة خنفشارية:
استشوروا من قدام وخلو من ورى تراه حركه

*لماتحطين خلطه على شعرك مابيضرك شي لاقلتي (بسم الله الشافي المعافي
بسم الله الذي لايضر مع اسمه شي في الارض ولافي السماء وهو السميع العليم
ثلاث مرات)

*شوفوا ما افسده الدهر في سنين مابتصلحينه بيوم او يومين لاااااااااااااا معصي
لازم شويه صبر على شوية تحمل على شويتين اهتمام وتصيرين ميه ميه
فلاتتخيلين انك يوم حطيتي خلطه انه طال شعرك ولا نبتلك قرون لا لا لا
انا ماتعدل شعري ولله الحمد الا بعد فترة سنة بدت تظهر الاثار
وبديت هالحين بالكسل الله يعينا وياكم على هالشعور...











&&&& نقطة اخيرة مهمة مررررره حبيت اذكر فيها &&&&
والله الذي لا إله الا هو ان كل كلمه كتبتها مجربتها وماكتبتها الا للفايده
فانا استفدت منكم وحبيت افيدكم هذا الغرض من موضوعي وهذي اول مره
اكتب بمنتديات وحتى قريباتي يقولولي وين عالجتي شعرك واقولهم عاللي
سويته مايصدقون يقولون عالجتيه وماتبغين تقوليلنا وين؟؟؟
طيب لا قلنا الصدق ماعجبهم
اجل اكذب عليهم عشان يصدقوني!!!!
((((((((((فشعارنا لنترك الرفاله ونلتفت لشعورنا)))))))))))
شكله نهاية موضوعي بتجيني وحده كذا:024:



بس صدقوني ماكتبته الا لاني كذا::26: لكم
سبحانك اللهم وبحمدك أشهد أن لا إله إلا أنت استغفرك وأتوب إليك. . .