اعرف المنتدى ما يحون النقل لكن اعذروني اذا الموضوع او الخلطه مكرره بالقسم لاني ما ابحث كثير فيه
بصراحه قرأت الموضوع وناويه باذن الله اسوي الخلطه لي ولبنتي
فقلت انقله لبنات منتداي الوفيات ولاني أأمن بالحديث الذي اوردته الاخت
ايضا كما قال صلى الله عليه وسلم
( لا يؤمن احدكم حتى يحب لأخيه ما يحب لنفسه )
السلام عليكم ورحمه الله وبركاته
بنات اول شي انا نذرت نذر ولازم اوفيه واخاف الله ياخذ أمانتي وانا ما وفيته وهالنذر نذرته لكم يا اعز بنات ولو الله ثم لولاكم ما استفدنا و((حب لاخيك ما تحبه لنفسك ))
السالفه يابنات ومافيها اول شي بوصف لكم شعري
ششعري من خلقه ربي كثيف وناااعم وطويل
من خبالي رحت سويت كراتين طلع مواصلي لا عادت عليه كنت طامعه بشعر الفلبينيات وابعد عن الاستشوار
المهم النتيجه كانت تمام لمده شهرين بعدين صارت عكسيه
ماتتتصورون شلون طاح الشعر بشكل خيالي ياليت يطيح بالحبات والله يطيح خصل خصل خصل وكنت ابجي
لدرجه خلاص فروة راسي بينت وكنت ابجي واصيح عبالي بصير قرعه
المهم رحت للجلديه وعطوني علاجات وانبولات وبخاخات وشاميوات شهر كامل عالعلاج ماكو فايده ولا شي بسيط شعري قصيته صار يخرع شعرتين فروة الراس وااااااااضحه صار صلع صوب الصنادح مع انه كان كثيف
قمت ادور حالي من حالكم عن خلطات للشعر وبفضل الله لقيت العلاج بس ملاحظه
بنات انا التساااقط وقف ماشا الله ولا حول ولا قوة الا بالله بس الشعر للحين توه نابت ما اقص عليكم اقولكم صار طبقات لا بينت منابت الشعر وقام يختفي الصلع بنسبة 90 بالميه من منابت الشعر بس انا ما حبيت انطر كنت بانتظر لمى يكثف الشعر لكن خفت لان هذا نذر ولازم اوفيه ...
اللحين بقولكم كورس العلاج اللي سويته تعالوا معااااااااااي حياكم
اول شي والله حاسه فيج لا تبجين ولا تصيحين اهم شي هدي نفسيتج وارتاحي وبحيل الله باذن الله هالكورس بيحل المشكله
90 بالميه اضمن لج باذن الله
اول شي اللي عليج تسوينه
1- تروحين تسوين تحليل للدم في أي مختبر تشوفين النتيجه ..يمكن فقر دم .يمكن نقص بواحد من القيتامينات
أذا كل شي تمام او اذا في نقص بسيط كلهم حلهم موجود اخذي التحليل واطلعي لا تخافين تعالي معاي ..
2- روحي للصيدليه أشتري حبوب فيتامينات للشعر اسمها ((بيرفكتيل )) بنات والله والله والله انها شي خيالي مع انها ثقيله عالمعده بس اكليها ورا الاكل بعشر دقايق مو مباشره وماتاكلينها على معدا خاليه ولا بتحسن جبدج تتقطع وتراها زينه للبشره والاضافر وسعرها تقريبا 10 دنانير
جربيها اذا تعبتي منهم خاصه معدتج اشتري بديل للفيتامنيات ((هيرفيت )) مثلا او أسالي الصيدلي
3- خلصنا من الصيدليه روحي الحواج أشتري
ورق الاس المجفف
اوراق اكليل الجبل المجفف
سدر مطحون
زيت فازلين للشعر اذا موجود بالحواج ترا موجود بالجمعيات
حمام زيت براشوت بخلطة الااعشاب
ما لقيت صورته
4- اللحين روحي للجمعيه وأشتري
شامبو برت بالصباار
اللي بالصورة مو صبار
اخذي الصبار او العسل للشعر الناشف والقشره اخذي جوز الهند والليمون
سيروم كريستال (انيرجي)
5-
الحين ياطويلة العمر اخذي قشج وردي بيتكم
6- رديتي البيت روحي للمطبخ ومعاج اغراض الحواج
اول شي اخذي جدر فيه ماي وحطي قلاصين ماي وحطي ملعقه كبيره ورق الاس+ملعقه كبيره ورق اكليل الجبل
وخليهم يطبخون على نار هاديه لمى يغلون قبل تسكرين النار حطي ملعقه صغيره سدر واذا شعرج ناشف حيل لاتحطين سدر مو لازم بعدين اقولج شتسوين عشان تعوضين
اللحين عقب ماحطيتي السدر صكري النار وغطي الجدر وخليه لمى يبرد على راحته اذا برد حطيه بغرشه وخليه لمده يوم ونص تقريبا عقب أشخليه من الاعشاب
7- حطي الخلطه بقرشه رش وكل يوم بالليل رشي على فروة راسج كلها بلليها مع الشعر كله جنج متسبحه وقعدي سوي مساااج ربع ساعه اذا عندج احد يساعدج يكون احسن وبنات لا تتسبحين عقبها اهي من نفسها راح تنشف ولا جنه في شي اصلا
المساااج مهم يابنات
ملاحظه : اللي شعرها ناشف وقلت لها لاتحطين سدر ..لان السدر معروف ينشف وهالخلطه لمى تحطينها ما تتسبحين عقبها
فخلي السدر حطيه يومين بلاسبوع مثل الحنه لمده ساعتين واغسليه وباقي الخلطه استمري عليها يوميا من غير سبوووووح
الخلطه هاذي لازم استمرار يوميا يوميا لا تقطعين وتقولين ما نفعتني يوميا يابنات من ثاني اسبوع راح تبين النتيجه يعني يبيلها 14 يوم بس كملي عليها لمدة 3 شهوووووووووووور ترا بسرعه تمر الايام ماراح تحسين
ملاحظه ((خلطه ورق الاس +اكليل الجبل )) اخذتها من وحده بالمنتدى الله يجزاها الجنه يارب ماقصرت نسيت اسمها والله
بس انا زدت عليها السدر
_____________________________________________
اللحين نتكلم عن الشغلات الثانيه
((زيت الفازلين )) هذا يابنات كلمة رووووووووعه قليله بحقه اذا حسيتي شعرج ناشف اخذي كل يوم نقطه ومسحي فيه شعرج بتشوفينه يلمع ويهبل ومرتين بلاسبوع ادهني شعرج فيه بالكامل مع تدليك وخليه ساعتين وتسبحي
((حمام زيت براشوت )) هذا للترطيب العميق وترطيبه قوي قوي قوي طريقته شلون حطيه قببل السبوووح
وخليه على ما تغسلين جسمج يعني تقريبا ربع ساعه وعقب غسليه بماء فاتر وحطي وراااه شامبو ((برت الصبار ))وغسليه عدل لان حمام الزيت هاذا مثل الدهن دهني حيل
ملاحظه : حمام الزيت يستخدم مره وااااااااااحده بلاسبوع ويرجو غسله جيدا عشان ما يصير طبقه دهنيه تسد المسامات وفروة الراس
((الفيتامينات )) قلنا طريقتها ولازم تاكلينها يوميا يابنات فوائدها عظيمه
((كريستال سيروم )) هاذا يابنات تستخدمونه وقت اللزوم مثل البندول ههههههههه يعني حق المناسبات حق الاستشوار يعطي لمعه وريحة حلوه وترطيب ويعالج التقصف
________________________________________
8- قص اطراف الشعر شي ضروري كل 3 شهرين علاقل عشان التقصف يروح
9- استخدام مشط ذات اسنان كبيره متفرغه
_________________________________________
بنات اللي بتستخدم هالكورس لا تستخدم معاااه اي شي ثاني غير اللي ذكرته لازيوت ولا خرابيط
عشان النتيجه ماتتخربط وتصير تفاعلات كيميائيه تخربلج شعرج وهالعلاج ما ياثر بالصبغات يعني اذا بتصبغين شي عادي مو مثل الحنه ....
استمري على شغلات معينه ولا تخربطين أهتمي بالتغذيه قد ماتقدرين علاقل ابتعدي عن الدهنيات كثري بقدونس ((تبوله ))
دمتم برعاية الله وحفظه
كنت حلوه @knt_hloh
محررة فضية
يلزم عليك تسجيل الدخول أولًا لكتابة تعليق.
* ريد روز *
•
مشكورة
الصفحة الأخيرة