السلام عليكم و رحمة الله و بركاته
بقدم لكم اليوم يا جميلات قصتي مع العناية بشعري
كان شعري و انا صغيرة طويل و ناعم و كثيف من فضل الله ثم عناية الوالدة الله يحفظها
خلصت الثانوية رحت الصالون ( تسمونه بالسعودية المشغل ) و قصيت شعري كاريه و هو كان أطول من ظهري بشبر على ابو انه تغيير و مليت من الشعر الطويل ، صار فيني فقر دم طاح ثلاث أرباعه ،و بعد فترة أهلكته بالصبغات اشقر و بني و ثلجي لما أندمر و كنت بعد ما أتسبح أنشفه بالسشوار يعني حرقته عدل!
استخدمت شامبو لوريال كريستاس و كريمات و سبريهات و لا في اي فايدة، وقت استعمال هالمنتجات شعري يصير حلو ، و ثاني يوم من الاستعمال يرجع نفس ما كان ، عرفت إنه هالمنتجات فايدتها مؤقتة و لا تفيد الشعر بأي شي
بيوم من الأيام وقفت وقفة جادة مع نفسي و قلت الشعر تاج الجمال و انا شبه قرعة لازم اعتني فيه و أرده نفس ما كان
فتحت النت و فريت بالمنتديات ، قمت أسأل صديقاتي اللي شعورهم حلوة ، دردشت مع حريم كبار
لما وصلت لبرنامج معين و طبقته على نفسي و الحمدلله النتيجة مرضية و و الله يا بنات شكلي كله تغير بعد ما اهتميت بشعري
أدري طولت عليكم السالفة ، الحين بقولكم اشسويت
1/ الصبغ
شعري كان اشقر بخصل ثلجي و الصبغة نازلة لي النص و انا مقررة ما اصبغ ، صار عندنا عرس رحت صبغته شوكلاته ( جوكلت ) يعني غمجته و توووووبة من الاشقر و الصبغات
خفت الصبغة و نزلت شوي شوي
2/ قص الشعر
قصيت الاطراف الميتة بالصالون ، و كل ما تبدي تطلع أقصها ، مع العناية بالشعر بتلاحظين انها تاخذ شهور على ما تطلع ، و انتبهوا يا بنات عاللي تقص شعرج ، لا اتقصين عند اي وحدة ، لازم ايدها اتكون مباركة ، في كوافيرات ايقصون الشعر و ما يطول الشعر بعد ايدهم ، و في كوافيرات ايدها تاخذ عالشعر اتقص بدون لا تسإلج لي وين تبين طوله ، يعني تكونين فرحانة أنه وصل لي نص ظهرج تقوم اتقصه لي كتفج
3/ الدهن
بديت أدهن شعري ، الزيوت اللي انا احبها و تناسبني ، حطوا تحت تناسبني 100 خط ، مو بالضرورة يا بنات اللي يناسبج يناسب غيري ، اشلون أعرف إذا تناسبني و الا لا جربيها و اذا ارتحتي عليها خليج عليها و لا تقطعينها ، لأن كثرة تبديل الزيوت هي اللي اطيح الشعر
الزيوت اللي استخدمها : الخروع و اللوز و زيت الزيتون و زيت جوز الهند ( براشوت )
أخلطها وقت الاستعمال على شعري ما أخلطها بعلبة لأ
اللوز و الخروع هم الأساس عندي و انا اخففهم يا ببراشوت يا بزيت زيتون
لاحظوا هالزيوت اللي استخدمها زيوت نقية ، يعني انا ما ناسبني دابر أملا لأنه من مكوناته عطر و صبغ ، دابر زيت مركب مو نقي هذي وجهة نظري ، و كل وحدة و اللي يناسبها أدري إنه في بنات استمروا عليه و خلى شعورهم للركبة
في البداية شعري كان نااااشف كنت أدهنه تقريبا كل يوم و لما تحسن صرت أدهنه 3 مرات بالاسبوع
ساعات أدهنه 3 ساعات ، مرات أخليه يطول اكثر ، بس لقيت إنه شعري يصير جناااان لما أدهنه باليل و أغسله الصبح، ملاحظة أدهن أطراف شعري بدون الفروة لأن فروة راسي دهنية ، و شعري ناشف محتاج زيوت
4/ الشامبو
بالنسبة لغسل الشعر : ما أغسله بماي حار أبدا ، الماي يكون فاتر أفضل
الشامبو اللي استخدمته : هيد اند شولدرز يناسب فروة راسي ، بس عيب هالشامبو انه ما اتكثرين منه يعني مرة بالاسبوع و الا بينشف شعرج
الحين شريت لي شامبو من الصيدلية ماركة rausch انا اخذت شامبو بالبيض و اختي اخذت شامبو بالافوكادو
هالماركة سويسرية و منتجاتها طبيعية ، شامبو البيض ريحته مو حلوة بس ما اطول بالشعر
5/الحناء
الحنا يا بنات اتكثف الشعر و تصبغ الشيب و اتشيل القشرة و تقطع الريحة، و للدلوعات اللي يقولون ما نحب ريحتها اقولهم حنوا مرة و مرتين و راح تعشقون ريحتها ، الحنة صج هي اللي تحلي ريحة الشعر ، جربت الشامبوات و الماسكات المعطرة ، ما لقيت نفس الحنة هي اللي تحلي ريحة الشعر
أول شي يا بنات لازم تشترون حنة فريش و نظيفة مو مخلوطة ، عاد ماشالله بالسعودية أفضل أنواع الحنة موجودة
الحنة أعجنها بطاسة قزاز ( بايركس ) و ماي دافي و أخليها ثقيلة مو السايلة و لا المتماسكة ، لأ يعني أخف من الروب ، و أخلطها بخلاطة العجين أو خفاقة البيض و الله ما أدري شسمها و أغطيها بالنايلون الشفاف عشان لا يدشها تراب و أخليها اتخمر ، أفضل مرة حنيت فيها شعري كانت الحنة متخمرة فيها 12 ساعة
الإضافات للحنة كثيرة و كل وحدة و اللي يناسبها ، جربت أعجنها بماي الكركديه ، مرات كنت أحط عليها رشة قرنفل ( مسمار ) للأمانة هو حار عالشعر يعني اللي ما اتحمل الحرارة تننبه، حطيت ملعقة روب مغذي للشعر ، عجنتها بماي الشاي ( يغمج الشعر ) ، حطيت ملعقة سدر ، المهم كل وحدة و اللي يناسبها
مرات كنت أحني شعري بالصالون ، و لاحظت إنه شعري من الامام نبت ، راقبت الفلبينية اشلون اتحنيني ، شفت أنها لما اتحط الحنة كأنها تمشط شعري بأصابعها أو كأنها اتحك شعري بالحنة
ركزوا عالحنة يا بنات بهالفترة لأنه صيف و راح اتبرد على روسكم ، و بالشتا البارد اللي قام يجينا صعب حيل الوحدة اتحني ، و بوقت الدورة الشهرية لا اتحنين شعرج نهائيا مو زين ، و ضروري تلبسين قفازات نايلون و انتي اتحنين شعرج ، مو حلوة البنت لي مدت ايدها و الا لون ايدها و اضافرها برتقالي ، نعومة الايد و بياضها حلو و يحلي البنت كلها ، و امسحي الحنة اذا سالت على اذنج أو وجهج بسرعة
يتبع الموضوع
أعشق الجمال @aaashk_algmal_6
عضوة جديدة
شعرك جاف و قصير و خفيف ؟ خاطرك تقلبينه 180 درجة؟تعالي و أعلمك السر/اكتفى من الردود
65
40K
هذا الموضوع مغلق.
الله يعطيك الف عافيه يااااااارب موضوعك رووووووعه
جزاك الله خيرررر
وهذا احلي تقيم لعيونك
جزاك الله خيرررر
وهذا احلي تقيم لعيونك
الصفحة الأخيرة
اللي صابغة شعرها يا بنات لا اتحني شعرها، ترى بتصلع اللهم بلغت ، انا ما بديت بالحناء الا بعد 9 شهور من آخر صبغة
6/ السدر
السدر روعة للشعر يطوله و ينعمه و يعطيه لمعة و يقطع الريحة ، لو حاطة اي خلطة بشعرج غسليه بالسدر راح يقطع الريحة
السدر تقدرين تعجنينه مثل الحنة و اتحطينه عالشعر أو اتخففينه بماي و تستعملينه مثل الشامبو ، وتقدرين اتسبحين فيه ، تراه يبيض و ينعم الجسم
اختاري سدر نظيف ، يكون أخضر أفتح من الحنة ، الاخضر الباهت هذا خربان ، اللي شعرها خفيف و ما يتحمل السدر تحط شوية منه نص ملعقة مع ماي و تحطه عالشعر ، السدر ينشف الشعر اذا كثرتيه
يعني استخدامات السدر : شامبو ، صابون للجسم ، تعجنينه مثل الحنة ، أو تمسحين ( شوية سدر و ماي ) عالشعر
7/ المشط
ما استخدم المشط البلاستيك لأنه يقطع الشعر ، المشط اللي استخدمه خشبي من البدي شوب ، ويكون خاص فيني ما أسمح لأي أحد أنه يستخدمه لو مرة وحدة ، ما أمشط شعري و هو مبلول ، و لازم أمشط شعري قبل النوم
8/ الجدايل
على طول أسوي شعري جدايل و الحمدلله طال شعري بسببها ، عكس اختي مع انه عنايتنا بالشعر وحدة ، هي دايما تسويه ذيل حصان و انا جديلة ، و ربطة الشعر ( بالكويت انسميها شباصة ) ما استعمل اللي فيها حديدة اتقطع شعري استخدم الربطة القطن الصغيرة
9/ الشمس
أفتح شعري و اقعد بالحوش تحت الشمس ، و أشمس مخدتي و لحافي ، و المخدة أغيرها بين فترة و الثانية
10/ التغذية و النفسية
أهم شي يا بنات ما يكون فيكي فقر دم أو ما اتغذين عدل ، لازم اتسوين تحليل دم ، و اتأكدين من نسبة الحديد لأنه التساقط سببه فقر الدم ، و التغذية المناسبة تنعكس عالبشرة و الشعر ، و النفسية أيضا مهمة لازم الواحد ينبسط و يفرفش لأنه كثرة الهموم اتطيح الشعر ، و تذكروا أنه المؤمن أمره كله خير
11/ دلعي شعرك
لا تهدمين كل اللي بنيتيه بإنك اتشدين شعرك أثناء الغسل أو التسريح ، بشويش شويش على شعرك ، لا تعصرينه مثل ما تعصرين الفوطة المبلولة
12/ مساج فروة الراس
ضروري تعملينه أثناء تدهين شعرك أو أثناء الغسيل عشان يحرك الدورة الدموية و يحفز نمو الشعر
13/ تدفئة الزيوت
للأمانة قليل ما أعملها مع انه هذي هي طريقة الهنود في تدهين الشعر انهم يدفون الزيت قبل استخدامه ، يا انك اجيبين كنكة و اتدفين ( مو تسخنين و الا تغلين !!) الزيت عالنار ، يا إنك اجيبين طاسة وسط فيها ماي حار و اتحطين فيها طاسة معدن صغيرة فيها الزيوت اللي راح اتحطينها على شعرك عشان تدفى
14/ الصبر الصبر الصبر و الاستمرااااااار
مافي نتيجة حلوة بين يوم و ليلة بالعناية المستمرة راح تلقين نتايج مبهرة تذكروا المثل easy come easy go ما يكسب بسهولة يفقد بسهولة
15/ ذكر الله أولا و آخرا
غطوا شعركم يا حلوين عين العين و الحسد و انتي اذكر الله و سمي على شعرج
هذي تجربتي بين ايديكم ، و تذكروني من صالح دعائكم