السلام عليكم ورحمة الله وبركاته
اليوم موضوعي خفيف ولطيف وظريف ومايتجاوز 5 صور من زمان نفسي انزل هذا الموضوع لأن فيه حل دائم وحل بشكل مؤقت للبنات اللي شعرهم ساحب على ورا والا اللي شعرها خفيف جدا من قدام او جبهتها كبيره جدا
ماخبي عليكم انا عندي مشكله من زمان وانا صغيره ان جبهتي ماشاء الله مرايه :lookaroun
بس مو هنا المشكله المشكله ان شعري من يمين ويسار خفيف جدا جدا وساحب لجوا لدرجة اللي يشوفه يفكره تساقط وهوا ماهو تساقط هذي مشكله من طفولتي وشعري كذا ولما دخلت المتوسط كنت احلقه من يمين ويسار بالموس في الاجازه وادهن بثوم وبصل واستمريت على هذي الحركه لين تخرجت من الثانوي وماشفت اي تحسن للامانه ابدا ابدا
انا شعري طويل واحب اسوي ذيل حصان ادري قديم هالاسم ايام ابيض واسود بس ماعرف اسمه الحديث احب ارفع شعري على فووووق مره واربطه بمطاط الشعر او بكله > برضو قديمه عاد سامحونا عالالفاظ الاثريه هذي
بس بعدين صرت استحي خاصة لما زوجي قال لي مره صلعتي هنا حسيت القيامه قامت :hmh:
ومره كنت بيت اهل زوجي تعرفو اهل الزوج حتى لو كل وحده فيها عيوب الدنيا عاد لازم تقعد تطلع فيك الاخطاء ال 66 قالت لي اخت زوجي وااااااااا يافلانه شعرك زحف على ورا >> احلفي وهنا كان نفسي اقوم ارميها من الشباك اللي وراها بس خسرتها
المهم ياطويلات العمر بلخص الموضوع
جربت زيوت وخلطات كثير سدر زيت لوز زيت نارجيل زيت زيتون هذي الاشياء كلها تقوي الشعر تنعم الشعر تطول لكن ماتنبت شعر جديد
في قبل كذا زيت انا تكلمت عنه بموضوعي اللي هو زي العسل الموضوع اللي قلت انه في وحده غشتني وباعته لي ب 450 وهو مايتجاوز 60 يمكن هذا الزيت ساعدني كثير اني استعيد شعري اللي فقدته بعد عدة عمليات سويتها وطاح شعري بسبب البنج
لكن الزيت اللي فعلا ينبت الشعر انا ماعمري شفت زيت نفس مفعوله وسرعته فعلا بهرني جدا ومن افضل منتجات الشعر اللي استخدمتها بحياتي للان
زيت شفته باليوتيوب وانا ابحث وكل اللي استخدموه كانو مصلعين وفعلا شعورهم طالت ونبتت وانا لمست هالشي بنفسي بعد ماكنت ماقدر اسحب شعري على ورا صرت اسحبه بقلب جامد الحمد لله الزيت نبت لي شعري وكثفه من قدام وغير كذا يطول الشعر بشكل خيالي وسريع وهنا احب اقول كل وحده على حسب شعرها
وهذي صورة الزيت من قوقل لانه مخلص من عندي بس طلبته ولسا ماجاني
الزيت من جوا تحسي فيه اعشاب وزيت عشان كذا لازم ترجي العلبه قبل ماتستخدميها وهو عباره عن مساج للفروه فقط يعني مجرد تحطيه على اصابيعك وتدلكي شعرك من قلبك بالراحه وخليك مخلصه ودلكي بضمير وتخليه 4 ساعات وتغسلي شعرك تستخدميه 3 مرات بالاسبوع العلبه تكفيك من 3 الى 4 اشهر لانه مجرد مساج للفروه قيمته حوالي مية وشويه ريحته مو حلوه زي مدري ايش المهم مو حلوه بس تتقبليها يعني مو مره مزعجه ولاتخافو الزيت عباره عن اعشاب طبيعيه مافيه شي ضار ابدا اسمه على اسم عشبة البراهيمي او الابراهيمي الهنديه المشهوره للشعر ان شاء الله ماكون غلطانه باسم العشيه
الان نجي للحل المؤقت
طيب جاتك خرجة ضروري وانتي متفشله لان شعرك من قدام خفيف ومصلع او نفسك تسحبي شعرك لورا وجبهتك كبيره
او شعرك فيه فراغات هنا الحل المؤقت اللي يخلي الكل يسال ايش مسويه بشعرك
تجيبي هذا المنتج وهوا عباره عن الياف او شي زي شعرات دقيقه جدا جدا بس مو شعر طبيعي عشان لاتنط وحده تقول وصل هذا ماهو شعر هذي ماده والياف صناعيه تندمج مع الشعر وتبين كانها شعرك وفيه منه احجام وكل الالوان على حسب لون شعرك انا هنا استخدمت البني المتوسط والحجم هذا اكبر حجم هوا غالي شويه بس ترى يعيش معك فتره طويله هذا له عندي سنه ونص ولسا ماجا نصه
هنا صورته من النت لان نسيت اصوره ومافيا حيل صايمه وتعبانه
في انواع وشركات كثير بس انا اقيم الشي اللي استخدمته فقط
تقييمي له 10:10 فعلا يحل لك المشكله وماحد ينتبه المهم انتي تكوني فنانه وتحطيه بطريقه مايبين انك حاطه شي مو ترشيه زي الفلفل وتتركيه وخلاص وانصحكم تشوفو مقاطع يوتيوب بس اللي يستخدموه يكونو حريم لان الرجال يرشوه على صلعتهم زي الفلفل ويتركوه الحريم يدموج عشان لايبين
سعره على حسب الحجم يبدا من 45 ريال ويوصل الى 250 ريال
الوانه زي ماقلت في كل الالوان حتى الرمادي
وهنا طريقته كل اللي تحتاجيه فرشة اللي تهجد الشعر الصغير وشويه زيت او سيروم اللي مليزيت الشعر وانا استخدمت موروكانو اويل اللي ورقته زرقا تكلمت عنه في موضوع استشوري شعرك باقل الاضرار وتقدري تستخدمي زيت الارقان او اي زيت مايزيت ويعطي لمعه للشعر
وهنا صورة شعر بنتي صغيره ترى يامشرفات لاتشيلو الصوره انا حاطتها للفائده البنت عمرها 10
طبعا ماشاء الله شعرها مايحتاج وجبهتها مو كبيره بس مالقيت الا هي احط عليها ولدي مارضي قال عيب انا ولد لول
لو سمحتو اذكرو الله
هنا صورة جبهتها مع شعرها قبل ماحط الفلفل الاسود هههههههه على فكره زوجي يسميه فلفل
وهنا لما حطيته لاحظي لو حطيتيه وتركتيه العالم كله بيعرف انك حاطه شي شوفو كيف شكله لازم تدمجي
وتمشطي على خفيف بالفرشاه لو مشطتي بقوه بيروح لازم تتدربي عليه
هنا بعد مادمجته مع اني مو راضيه عن النتيجه بس البنت عصبتني قاعده تستهبل وماخلتني اشتغل يبين طبيعي جدا وقارنو بين الصور صارت الجبهه احلى والشعر من قدام ارتب
واخيرا وليس اخر البنات اللي شعرهم دهني والا البنات اللي شعرهم قليل جدا ومافيه حجم ولما تستشوري تحسي شعرك صار 3 حبات والا تحسيه مافيه حيويه
انصحكم بهذا الشامبو من شركة لوريال اسمه كيرستاس طبعا اشهر من نار على علم وكل الصوالين البروفيشنال يستخدمو هذي الماركه وماتنباع الا بالصوالين لكنهم نصابين يبيعولك الشامبو الصغير 200 مل ب 170 او اكثر انا ريحت راسي واشتريته من امازون الاخضر هذا مخصص للشعر الفاقد الحيويه اللي مافيه حجم راح تحسي بالفرق من اول استخدام تحسي شعرك كثير وحيوي مو منفوش لا لا حيوي بشكل يدوخ
انا جربته زمان من صالون وبعدها الان اشتريت اكبر حجم 900 مل من امازون بسعر 260 ريال او اقل ويقعد معك وقت طويل
وهنا صورته:
واخيرا اتمنى موضوعي عجبكم وانا عارفه انه خفيف وقليل بس هذي المشكله تواجه الاغلب والحل بين ايديكم
وحابه اقول شي لاني لقيت هجوم من كذا وحده بمواضيعي القديمه
اولا ترى انا مو مستفيده شي ابدا من مواضيعي الا اني احاول افيد غيري واقدم لهم حلول بسيطه لمشاكلهم يمكن يستفيدو
المنتجات اللي اعرضها مشتريتها من امريكا ومن موقع امازون بالتحديد وموقع امازون مو حق عايلتنا الكريمه عشان احد يجي يقول تسوي دعايه
ثالثا تجي وحده تهاجمني تقول انتي مو دكتوره ومو خبييره وتحسسني بالذنب ترى انا انسانه عاديه زيي زيكم ماقلت انا كوفيره ولا خبيره بس استخدمت شي وفادني وحبيت افيد غيري
وانا عمري مانزلت لكم شي خطير او فيه اسيد او مواد خطيره او ممنوعه زئبق هيدروكينون اسيدات كحول
كل اللي انزلها زيوت طبيعيه من النت حتى مو خلطات مجهولة المصدر
وغير كذا انا انزل واعرض لكم تجربه شخصيه .. شي وجربته وفاد معاي مو ضروري يفيد معاك يابعد قلبي ترى الاجسام تختلف واسجابتها للمواد تختلف حتى العطر لما احطه انا ونفس العطر يحطه غيري ريحته تختلف تتفاعل مع الجسم
رابعا انا ماجبرت احد يجرب هالاشياء انتي شفتي شي وعجبك ابحثي عنه يابعد عمري باليوتيوب والمواقع الاجنبيه شوفي تقييمه واراء الناس واستخيري وجربيه
واخيرا وليس اخرا اتمنى موضوعي عجبكم واستفدتو منه
ومابغى منكم شي الا ردود حلوه ودعوه ان كنتو تشوفوني استاهلها
وكل عام وانتم بخير
كنت بطلبه بس قلت بيطلع زي غيره واجلته للشهر الجاي بعد كلامك راح اخذه ان شاء الله
بس بسالك يوقف التساقط ؟؟ شعري يطيح بالهبل
ممممممم والشامبو اعرفه مشهور بس احلام بنفسجيه سوت رفيو على منتجات كرستاس وقالت انو فيه سيلكون باقي اتاكد
التوبيكا هير بحكم ان شعري فراغات الحمد لله على كل حال فاكيد سبق وجربته بس اذا كنت بروح لاحد
صديقتي مره حذرتني منه تقول يسد المسام ويزيد الطين بله يطيح الشعر ويوسع الفراغ
ميرسي ياسووووكره