شعوري غريب تجاه ضرتي!

السلام عليكم ودي افضفض لكم وكذا ماعندي الشغله😂😂 المهم ي بنات مر على زواج زوجي اربع شهور وقابلتها للمره الاولى في عزيمه لاقاربنا البارح طبعا انا وزوجي اولاد عم ركبنا سوا في السياره ولا تعرفني ولا اعرفها وماخذه الجو تسولف وتضحك مع زوجي وخالتي وانا ساكته طبعي هاديه المشكله اني ماحسيت بأي شعور تجاهها احسها عاديه عندي وم افكر كذا اغلط عليها او احاول استفزها ابدا لين وصلنا لعزيمة اقاربي وكان سلام عادي جدا والمشكله كنت مبتسمه مدري هل من الربكه ولا دلاخه
الزبده لان زوجي قريبي فكانوا الحضور اغلبهم بنات عمي وزوجات اخوانهم ومن جماعتنا كلهم رسميين معها ويسولفون معي والبعض يبين تطنيشه لها وجالسين معي سوالف وضحك ونلعب مراجيح ضاعت هيبتي توها😩 وربي نسيت وجودها حتى م طرالي استفزها او اجيب حركات حريم وكنت مستانسه مره بالشاليه المهم جاء الساعه عشر ونص زوجي كلم امه قال يلا نمشي انا استغربت زوجي م يسري بذالوقت وانا غبيه قلت لااا قولي له شوي قالت امه عيا يبي ينام بدري وتلبس وتنط للسياره بسرعه انا جلست ربع ساعه متعمده ثم طلعت م بردت حرة السهره المهم سرينا وطول الطريق ساكته ومتضايقه جو السوالف والضحك هذاك اللي كان بالعصر واحنا رايحين م شفته
اثرها مرته مرسله له نمشي بدري هو علمني يوم وصلنا البيت وحسيت انه درى باللي صار لها بالعزيمه و بنفسي اقول هي متعمده تبي تخنز علي السمره ودقت عليه ولا مدري
بنات بتستغربون لو قلت جاني شعور حزن😂 لاني حطيت نفسي مكانها خاصه يوم قالت قريبتي هذيك اللي تزوجها يخررب بيته وتاشر عليها وشكل سمعتها ضرتي قصدها انها كبيره عني ومو حول شكلي ابدا انا بسرعه رديت قلت خلاص مكتوب والحمدلله م صار خلاف م ابي يطلع مني شي مو زين خاصه تو امه اللي تصير اخت امي للاسف
وفعلا هي كبيره عني بيننا تسع سنين عمري٢٤ ومو هذا المهم
المهم ان الشعور اللي جاني احسها مو ضرتي ولا احس بشعور الغيره والمقارنه ولا ابي يطلع مني شي مو زين انا ذالشي فيني من زمان م اغلط واطنش
او ربي مسح ع قلبي لانه يوم تملك عليها برمضان جلست ادعي يربط ع قلبي ويثبتني وعند ولادتي كمان دعيت
والحمدلله على كل حال