يا كبر همي ويا كبر جرح قلبي يوم الخبر جاني وقالوا .. مات
أنكرت وقلت اللي تقولون كذبي من فجعتي كني بحلم وخيالات
وعجزت أصدق تاه فكري ودربي موته حياتي جاب للروح حسرات
والموت حق ومآخذ الروح غصبي لكن فراقهْ دنيتي لي .. خسارات
واستغفر اللي غافرٍ كل ذنبي هو وحده الباقي رفيع الدرجات
يالله ياللي مفرجٍ كل كربي يا ميسرْ أمورٍ علينا صعيبات
ويا منجيٍ يوسف من أعماق جُبي وقريت عين أبوه من بعد غيبات
ونجيت يونس يوم ناداك ربي ظلمت نفسي .. واستجبت الدعوات
ترحم حياة الروح عمري وقلبي وتجعل مقرّه دنيتي وسط جنات
يسوى جميع الناس شرقه وغربي ويسوى جميع الحي منهم والأموات
يفداه عمري وكل شيء وربي وتفداه روحي وكل حاضر وما فات
هو شمسي وظلي وهو نور دربي وهو بلسم جروحي وللنفس راحات
يا أبو محمد يادوايه وطبي بعد الرحيم اللي لنا فيه رجوات
ياكثر دمعٍ يا الجديعي يصبي عليك وعيوني شكت حرْ دمعات
والله ما أنساك يا كل حبي والله ما أنسى زمان لنا فات
والله كنه في حنانه وربي أمٍ تريد عيالها دوم جمعات
أبو حنون وزوج ما هوب صعبي وبالوالده إحسان وبرٍ ورحمات
دايم حياة الروح لامه يلبي لبيه سمي ما يرد أي طلبات
يريد راحتها ولا يريد نصبي ودٍّه يشيل أوجاعها وكل علاّت
واصل لارحامه خلوق وذربي رحوم باخوانه وكل القرابات
وكنه بفضله مزن دايم تصبي ويعطي حياة الروح بدون منات
دايم بشوش الوجه ولسان عذبي وللضيف خيراته يقدم وضحكات
خدوم وللفزعات دايم يلبي دايم يضحي براحته لاجل راحات
صبور وللشدات دنياي صلبي يخفي علينا هموم ويظهر مسرات
يمزح مع البزران بضحك ولعبي ويجلس مع الناس الضعيفه بسمرات
ويساعد المحتاج ومن فيه كربي ما يستريح إلا بتفريج ضيقات
طبعه حياة الروح للأذهان يسبي فريد من نوعه لعله بجنات
يا رب يا رحمن يا خير حسبي أسألك ربي تعطي النفس سلوات
وأسألك تجمعني وجنبه بجنبي في جنتك يا غافر للخطيات
وأقول أتعبني فراقك وربي يشهد على ما اقول رب السموات
يا ناس عامودي وأساسي سقط بي وش لون أقوّم خيمتي بدون عمدات
والله ما أقدر أظهر اللي بقلبي غلاه وقدره ما تبينه الأبيات
يا ناس دنيا للماكيد تغبي تظهر بمكره كل زينه ولذات
يا ناس دنياكم غرور ولعبي تنبهوا من قبل يوم المنيات
تنبهوا من قبل يوم يكبي فيه التراب .. وانتم وحيدين حفرات
وترى لكم .. أعداء دايم بـحربي شيطان والنفس الدنيه وشهوات
وما ينفع الإنسان والله وربي إلا اتباعه للهدى وكل طاعات
واختامها أصلي عدد ما يلبي حجاج بيت الله يريدون جنات
وعداد ما ريح علينا تهبي وعداد ما ناحت وطارت حمامات
على النبي والآل وأهله وصحبي واللي تبعهم يبشر بحسن ختمات
أسأل الله العظيم رب العرش العظيم أن يرحم أخي أبا محمد وأن يدخله في جنته آمين
شعور @shaaor
عضوة نشيطة
يلزم عليك تسجيل الدخول أولًا لكتابة تعليق.
الصفحة الأخيرة
أحزنتني الأبيات كثيرا ..
لاأدري .. لماذا لم أستطع التغلب بعد على تلك الأحاسيس المُرة على فراق الأحبة !
أسأل الله ان يرحم أمواتنا وأموات المسلمين .