شعيرية بالخضار والدجاج ....خليها غداكم اليوم

صباح الخير على الطباخات الحلوين
طبعا هذا ثاني طبق لي في عالم حواء
وهو طبق متواضع على قدي علما بأني نادراً ما اطبخ بس اذا تهورت وطبخت اسوي شيء يميميميميم
اتمنى ما يكون مكرر لاني اخذت الوصفه من مرت أخوي وعجبتني قلت احطها لكم من باب التغيير
يالا نبدأ بسم الله

المقادير:
1 كيس شعيرية (المكرونة مو تبع الحلى )
مجموعة خضار مقطعه مكعبات ومقليه(بطاطس+زهرة+كوسه+جزر+باذنجان)
2 قطعتين من صدور الدجاج المسلوقه والمقطعه مكعبات
1ماجي
2 فلفل حار أخضر (حسب الرغبة)
بهارات
بصل مفروم
2 فص ثوم مدقوق

الطريقه :
الخضار مثل ما ذكرت مقطعه ومقليه وتخليها على جنب
الدجاج تحطي في قدر شوي زيت ومستكه وتحطي الدجاج وتقلبيه 5 دقايق بعدين تحطي له موية عشان ينسلق....
بعد ما ينسلق الدجاج تصفي مويته وتخليها على جنب وتقطعي الدجاج مكعبات
تجيبي قدر وتحطي فيه الشعيريه بعد تكسيرها وتحمصيها الى أن يصير لونها مشقر بني فاتح مثل لون النسكافية بالحليب...
بعدين تجيبي الطاوة وتحطي فيها شوي زيت مو كثير وبعدين البصل والثوم والفلفل والدجاج وتقلبي مضبوط وبعدين البهارات والماجي والخضار وتقلبي 10 دقايق

تجيبي صينية الي تتحمل الفرن وتحطي فيها الشعيرية والخلطة تبع الدجاج وتخلطيهم مضبوط
بعدين تحطي عليهم نص موية الدجاج يعني تسقيهم فيها.....
وبالفرن من فون ومن تحت وكل شوي قلبي الشعيرية واذا شفتيها قاسية حطي عليها من الموية وهكذا الى ان تستوي

وبالعافية ..................
ان شاءالله يعجبكم