السلام عليكم
كيف حالكم أخواتي؟؟
بقولكم سالفتي وأبغى تشورون علي ..
بالأول أقولكم أنا موظفه بقرية وساكنه بالقرية أنا وزوجي وعيالي وألحين حاااااامل بعد يارب يتمم لي على خير ..
ونجي لديرة أهل زوجي كل أسبوعين ثلاثة لأن المسافة بين قريتنا ومدينتهم تقريبا 300 كم
وأولادي صغار مادخلوا المدرسة.. وكان عندي شغالة سيرلانكية رائعة بمعنى الكلمة جلست عندي سنتين
كانت مثل أم لي أنا وعيالي <<< :)
المهم جبت شغالتين بعدها وكل وحده طلعت فيها علة ورجعتها .. إللي ما تبغى تشتغل في بيت فه أطفال .. وإللي طلع لها تصرفات غير أخلاقية مع عيالي والله المستعان .. وجلست بدون شغالة أغلب وقتي ..
والأسبوع الماضي تعبت مرة وأخذت إجازة وصار معي نزيف كم يوم وخاف زوجي إني أسقط وحنا بغربة لحالنا ..
حتى جاراتي بذاك الأسبوع ما جوا لقريتنا .. وسبحان الله يدق علينا صاحب مكتب خدمات وكان يعرف إننا نبغى شغالة
وقال لنا فيه إندونيسية للبيع مالها غير عشرين يوم ..
زوجي قال ناخذها نجربها أسبوع ونشوف .. ونزلنا لديرتنا وأخذناها .. الصراحة هي أول يومين ماشي حالها
مع إنها مو مثل ما أبغى لكن تمشي الحال .. المشكلة وين .. إنها ما تهتم لا بشغل ولا بأطفال .. >> وش بقى :09:
يعني جلست ثلاث أيام ما كنست السيب ولا المجلس وللمعلومية أنا شقتي كلها سيب عليه غرفتين ودورة مياه ومطبخ
وسيب ثاني لغرفتي ودورة المياه وهو مفتوح دايم ..
وقلت لها كنسي السيب ومسحي الدواليب ورتبي المجلس والغرفة الثانية مثل المستودع قلت لها على كم شيء ترتبهم
والمطبخ لازم أقولها على كل شيء فيه كيف تسوي وتصلحه .. والحمام عندي كله أبيض وعلشاننا ما نجلس في الشقة دايم فما أغسله يوميا يعني بس إذا جينا كم يوم من القرية أنظفه وصاير فيه كم بقعة صفراء وقلت لها على المنظفات علشان تستخدمهم ..
لـــــــــكــــــــــن .. تشتغل مثل ما تبي .. حتى عيالي ما تهتم فيهم .. لما ينزلون تحت عند أجدادهم وأخليها تنزل معاهم يجيني الولد ملابسه كلها موية وإلا البنت لاعبه بالتراب وموسخه حاله .. ولما أسألها وين كنتي تقول كنت أشتغل تحت .. مع إنهم ما يعطوها شغل بس هي تتلهى فيه عن الأطفال .. واليوم قلت لها تغسل الملابس وكل ما غسلت غسلة راحت وجلست بالسيب عند غرفتي تنتظر لحد مالغسالة تخلص ..
طبعا ذكرت إني قلت لها تكنس السيب الأول وهي بس تنظف المكان إللي يدي تأشر عليه يعني أشرت لها على السيب إللي عليه الغرف خلاص كنسته ولا كنست السيب الثاني .. ولما شفتها جالسة قلت لها شكلك ما كنستي السيب هذا أبدا .. قالت أنا كنت أبغى أكنسه بس أخاف أصحيكم من النوم .. مع إننا نصحى بدري ولا عمرها جت وكنست بعد ما نقوم !!.. قلت فيه مكنسة ثانية مو لازم بمكنسة الكهرباء تكنسي .. وقلت لها طيب ليه ما نظفتي الطاولة ولا رتبتي الأحذية الله يكرمكم .. ( أنا حاطه طاولة صغيره أحط عليها مفاتيحي وجلالي لما أنزل تحت ألبسه وحاطه كرتون فيه شباشب دايم ألبسها وجمعتها في الكرتون لأن دولاب الأحذية يادوب واسع جزم العيال وأبوهم وبنتي الله يصلحها قبل يومين حاست الكرتون لأن وحده من مكعباتها طاحت فيه وغير تطلعها) المهم قهرتني قالت أنا أنظف كله مع بعض ومكنسة الكهرباء أحسن تنظف كويس .. قلت لها صار لك أسبوع عندي ما نظفتي السيب ولا شلتي منه ورقة وحده .. ألحين دامك جالسة ليه ما جبتي المكنسة وإلا المنشفة ونظفتي .. قالت : أسمععععععععي لما أخلص غسيل أكنس ..
قهرتني .. قلت لها ماتعلمتي إن الكنس يكون بالأغلب في الصباح .. وأنتي ما كنستي البيت كله ولا طرا عليك تكنسينه إلا لما قلت لك .. قالت : أسكتتتتتتتتتتتتي أنا كنست ونظفت مجلس على طول لما قلت لي وأنتي ما تبغيني رجعيني وجيبي أحلى مني ..
أنا هنا أنقهرت من جد قلت لها وش إللي أسمعي وأسكتي وش أنا عندك !! تكلمي معي بإحترام مثل ما أكلمك ..
لا ولو تشوفونها كيف تقولها لي وهي تأشر بأصبعها علي .. جد ارتفع ضغطي ..
المهم قلت أنتي ما تهتمين بالشغل بدليل إنك قاعده هنا والسيب ولا عمرك لمستيه ولا اهتميتي .. وكل شغله غير أقولك عليها .. والمشكله إنك مشتغله قبل كذا وعارفه إن البيت لازم ينكنس والدواليب تتنظف والمطبخ يتلمع والحمام ينشطف كل يوم .. أنا ماقلت لك ترى نظفي السقف وإلا لمعي الجبس والثريات وإلا غسلي ستاير كل إللي أقوله شيء ينعمل كل يوم وأي شغالة تعرفه ..
قالت : أنتي أسكتتتتتتتتتي .. قلت ما يسكت غيرك أنتي يالحيوانة (معليش على اللفظ وتراه طلع معي غصب عليها لأنها رجعت وتسكتني بعد وانقهرت منها)
تخيلوا وش قالت!! قالت أنتي حيواااانة ..
أنا بغيت أسطرها .. أكفخها .. أربيها .. وش أقول بجد حقيره يعني تسكتني كل ما أتكلم ولا رديت عليها وألحين ترد علي بعد ..
أعطيتها كم كلمة وعلمتها حجمها إللي ما تستحي مع إني مو من عادتي أهزء شغالات بس ذي كسرت القاعدة عندي .. وهي ما قصرت ترد بعد لكن ماخليتها لها أبد ..
وقلت لها كملي غسيل الأولاد .. وطلعت لها غسيل أبوهم بعد وأنا رتبت الملابس وما انتظرتها وطبعا جيت لقيتها حايسه ملابسه حطت السراويل قبل الفنايل مع إن القطن أول مثل ما علمتها لكن بس تبغى تعاندني ..
المهم .. قلت أنا خلااااص ما أبغاها وكم مرة أستخير ولا أنا مرتاحة لها وأفعالها كل مالها تكرهني فيها بس زوجي يقول أنتي محتاجتها علشان وضعك ورمضان قرب وراح تتعبين وأنا أقول أتعب جسديا ولا نفسيا .. أساسا خلاص ماني طايقه أطالع بخلقتها وأتوقع بتنتقم مني بعيالي .. المشكلة إنها اليوم كملت أسبوع والمفروض إننا دفعنا فلوسها وناخذها بس عملت حركتها وكلمت زوجي وقلت لا تدفع لهم اليوم يمكن أرجعها ..
هاه وش رأيكم بإللي سوته ..
بنت تيماء @bnt_tymaaa
عضوة نشيطة
يلزم عليك تسجيل الدخول أولًا لكتابة تعليق.
ام جسوم80
•
لاتفكرين مجرد تفكير انك تخلينها رجعيهاااااا بسرعه هذي مو هينه تقولك حيوانه خل تنقلع بس
كل هذا وتسألين وش تسوين فيها ؟؟؟؟
انا لو منك اول يوم ارجعها لو فيها خير ما عافوها اللي جايبنها
انا لو منك اول يوم ارجعها لو فيها خير ما عافوها اللي جايبنها
والله نصيحتي رجعيها لاتعمل لك بلا انتي او اولادك
شوفي قسم ملاذ الروح ومواضيع البنات من جد السحر انتشر وصار يخوف
ماابغى اظلمها لكن ابعدي عن الشر
تعب جسدي ولاتسوي لك شي يبقى معك طوول العمر
ربي يحفظك ويحفظ اولادك ويتمم لك ع خير ويكفيك شر كل من فيه شر
شوفي قسم ملاذ الروح ومواضيع البنات من جد السحر انتشر وصار يخوف
ماابغى اظلمها لكن ابعدي عن الشر
تعب جسدي ولاتسوي لك شي يبقى معك طوول العمر
ربي يحفظك ويحفظ اولادك ويتمم لك ع خير ويكفيك شر كل من فيه شر
اغلب الشغالات كذا ملعن
يختي اكرشيها ولو انك بحاجتها
ثلاث ارباعهم يجون هنا مايبون يشتغلون
ولهم هوايات متعدده غير الشغل
ولا تفكر نفسها في بيتها ولابد من قلة ادبهم اي وحده طيبه
لآزم شغالتها تستهون فيها
الله يعينك طيريها ودبري نفسك بوحده ثانيه قبل رمضان
يختي اكرشيها ولو انك بحاجتها
ثلاث ارباعهم يجون هنا مايبون يشتغلون
ولهم هوايات متعدده غير الشغل
ولا تفكر نفسها في بيتها ولابد من قلة ادبهم اي وحده طيبه
لآزم شغالتها تستهون فيها
الله يعينك طيريها ودبري نفسك بوحده ثانيه قبل رمضان
الصفحة الأخيرة