شغالتي وهل تصرفي صح معها او لا

السلام عليكم حبيباتي والشهر مبارك عليكم
انا عندي شغاله اوغنديه لها شهرين و اسبوع
توها بفتره التجربة
امس وديتها المكتب وقلت خلاص ماعاد ابغاها ودوها بيت ثاني او عطوها احد ثاني تنازل
والحمدلله اني ماطلعت لها اقامة


طبعا هي عمرها ٢٤ سنه اوغنديه
فيها مميزات نظيفه وشغلها نظيف ومتقن
عيوبها طايشه همها بس النت والجوال تتغيبى اذا ماعجبها الشي تطنقر اذا ضغطتها بالشغل واذا تكلمت تقعد تبكي
كذابه دايم تكذب
دايم تخلص الشغله اللي بيدها وعلى غرفتها على طول اقعد طول الوقت اناديها تعالي تعالي
الحوسه تمر من جنبها مستحيل تشيلها لازم اقول شيلي ذا وذا وذا مع اني علمتها كثير بس تطنش
ولدي ابدددد ماتحتك فيه ولا تكلمه ولا تساله عمره ٦ سنوات مع ان انا السبب الوحيد اللي خلاني اجيبها هو ولدي عشان وانا بالدوام وزوجي بالدوام احد يفتح له الباب لما يجي من المدرسه ومايكون لحاله واذا الدراسه عن بعد تساعده وتعطيه فطوره واغراضه
يوم شفتها كذا مع ولدي رحت وديته لاهلي لاني ما امنه عليها


بيتي صغير صاله وسيب ومطبخ وحمام ومجلس وحمام وخليهم لها
غرفتي ماتنظفها ابد ولاتدخلها وغرفه ولدي لانه عند اهلي دايم نظيفه
والطبخ ماطبخ الا مره بالاسبوع بحكم ان عملي طويل وماعندي وقت
يعني ماعندها شي تسويه كثير ومافي ضغط تخلص شغلها بساغتين وصرت اشغلها كل يوم تسوي شغله زياده مثل شبابيك او تنظف زوالي و هكذا
اليومين هذي زوجي بيسافر فقلت نروح لاهلي وقلت لها وماكان عاجبها وتسال ليه وكم يوم بنجلس
لاحظت عليها اول بومين ماتبي تشتغل بس تخاف مني فتسوي الشغل مع امي قدامي بس ولازم انا اقول اذا امي قالت تطنشها وماتعبرها مع العلم اني هاوشتها قبل عشان امي انها ماتحترمهت ولاتسمع كلامها لان امي جتني ببيتي وقعدت اسبوع ودايم اسال امي كيفها معك وانا بالدوام تقول كويسه ( عشان امي ماتبي مشاكل ) ومره جيت بدري بوقت الشغاله ماتتوقعه لقيت امي واقفه بالمطبخ لحالها وتطبخ وتقطع والشغاله منسدحه بغرفتها تطقطق بجوالها واهاوشها وحرمتها من النت يومين ووديتها المكتب لانها ماتحترم امي ولا تحترمني اذا طنقرت
المهم
عند اهلي اسال امي عنها نفس الشي كويسه تخبي امي عني
صرت انا ادقق حمامي ماتغسله
الصاله احط فيها علامات الاقيها مانظفتها
خليت امي تعطيها عبايات لي تكويها ماكوتها
كتب ولدي واغراض المنصه حقته ماتلمسها ولاترتبها ولاشي
طبعا بس بالغرفه وعلى الجوال
لين مره تحسب اني مداومه وانا موجوده اشوف امي تسحب كيسين كبيره وهي تتفرج فيها واقفه انا هنا عصبت
كلمتها قالت مقدر انظف او اسوي شي ظهري يعورني من كثر الشغل !!!! والله حتى المواعين ماتغسلها لي اقول تعالي وتغسلها وبس ماتجففها وتدخلها تقول ماقلتي لي
المهم قالت انا ظهري تعبان لانك تشغليني ببيتين وهذا مو من القوانين انا جايه لبيتك مو هنا قلت انتي معي وين ماروح وانا يوم اطلب تنظفين ماقلت غسلي ملابس اخواني ولاشي لاهلي اغلبه طلباتي انا وطبخي واغراضي
قلت تمام اذا تتكلمين عن القوانين عطيني الجوال لاني انا شريته والقوانين ماتجبرني اوفر لك جوال
ومافي نت تبين نت من فلوسك القوانين ماتجربني اجيب لك نت
وطبعا طبخ البيت ماتاكله هي تبي طبخ برا دجاج ورز واجيب لها
وهي ماتطبخ لنفسها
قلت لها والاكل القوانين ماتجبرني اجيب لك من برا تبين اكل البيت كلي ماتبين اطبخي لعمرك
يلا جيبي جوالك وقامت تبكي وتصارخ واني ماعاد ابغاك وابي بيت ثاني وخذت شنطتها بتطلع برا للشارع قلت بكره نروح المكتب لان انا ماعاد ابغاك لانك مو حريصه تشتغلين وقالت لي عادي نروح واخذت جوالها وفصلت النت من جوالها القديم اللي جت فيه
اليوم الثاني كان اول يوم رمضان مارجعت من دوامي الا ٧ المغرب وجت تعتذر لي واني ابغى اجلس معك وسامحيني وعادي بشتغل عندك وعند ماما واذا ماتبين تعطيني جوال ونت عادي ( بالنقطه ذي عرفت انها كذابه لان هي تنهار لو انقطع النت ) قلت لها انتي توك تجربه وتسوين كذا لخلصتي وش بتسوين انا ماعندي استعداد اخسر فلوسي اللي دفعتها على تقديمك
وديتها المكتب وجتني المترجمه ثالت موضوعك بسيط وينحل هي ظهرها تعبان لانها نظفت سجاد عندك وشالته عشان كذا وانتي فهمتيها غلط قلت اي سجاد اللي نظفته !! طلع قصدها سجاد في بيتي قبل اسبوعين او ٣ وسجاده صغيره اللي تجي قطع
قلت للمترجمه اللي ظهرها يعورها ترتاح وتنسدح صح قالت اي قلت شوفي بوريك انها كذابه وافتح جوالها واوريها مقاطعها اللي ببيت اهلي وهي تدعي انها مريضه
مقاطع رقص واغاني على التوك توك قلت هذي ظهرها يعورها !! ويعورها من قطعه صغيره من ٣ اسابيع
وقلت للمترجمه اساليها متى تصحى عند اهلي تقوم الساعه ١٢ ولا ١ في شغاله تقوم ١٢ قالت لا قلت عشان تعرفين انها مدلعه وماتبي تشتغل وتفكر الموضوع لعب
وعلمتهم بكل شي وطلعت
للامانه مرتاحه واحس على صدري وراح
وبنفس الوقت اختي تقول حرام عليك هي نظيفه وتشتغل من قلب بس يبغالها قرصه اذن
بس انا وامي اعرف بالشغالات هي مو حقه شغل وماهي حريصه وماتبغى تمسك مسؤوليه مثلا ولدي ولا تطبخ ولاشي ماتبي مع ان كانت من شروطي بالعقد معها
نظامها اللي اشتغل بسرعه بسرعه عشان اروح لجوالي واسوي الشغل اللي تطلبينه وبس غيره لا لو في حوسه في اغراض ماتشيل ماترتب


مادري تسرعت اني وديتها ولا معي حقي ؟
عطوني رايكم