أبي هريرة رضي الله عنه أن رسول الله صلى الله عليه وسلم قال: "بينما رجل يمشي فاشتد عليه العطش فنزل بئراً فشرب منه ثم خرج فإذا هو بكلب يلهث يأكل الثرى من العطش فقال: لقد بلغ هذا مثل الذي بلغ بي فملأ خفه ثم أمسكه بفيه، ثم رقى فسقى الكلب فشكر الله له فغفر له، قالوا: يا رسول الله، وإن لنا في البهائم أجراً؟ قال: في كل كبد رطبة أجر "


تخيلي في كل كبد رطبه اجر..
اذا الحيوانات سقيها واطعامها ممكن يدخلنا الجنه فكيف بأهل بيتك واولادك؟


استشعري معنى الحديث كل ماثقل عليك عمل البيت بتحسين براحه كبيره..


الله يكتب أجرنا جميعاً..

مافي شيء بيضيع عند رب العالمين حتى لو كنتي مجبورة
والله يكتبلك الأجر

صادقه الوقت يروح كله بالتنظيف وملاحق الاطفال وغيره
مافيه الا تشوفين الوقت المناسب لك
قبل مايقوم كل البيت او قبل النوم اعتقد هالاوقات مناسبه
وبعد كل صلاه لو خمس دقايق
وانتي تشتغلين اذكري الله مافيه الا كذا
وترتيب البيت غرف النوم اول مايقومون تنظف وتتقفل
والمجالس
بس يصير عندهم الصاله والمطبخ المكان اللي ماتجلسون فيه يتسكر
والمواعين لو مثلا مسويه كم صنف اجمعيهم في طبق كبير لكل واحد
مو كل صنف له صحن
واللي يقوم يشيل صحنه للمطبخ يساعدون
معك في الترتيب ابو ٣ سنين يعرف يشيل
خليه مثل السباق والهديه اي شيء يحبونه
والله يعين يارب

شوفي قلبي والله حيل حاسة فيج .. مع ضغط الشغل واليهال الله يحفظهم خلاص تنسين موضوع الأجر .. غير إن الشيطان يقعدلج هذا مو واجب و أنا شكو .. حتى لو وقت الصجية ما أرضى بخادمة ولا أرضى أقصر ببيتي لأن احنا بشر مو آلة ..
وفي هذا الشهر الفضيل وده الواحد يتفرغ حق القرآن و الصلاة لكن واجباته تجاه بيته تخليه يصلي بدون خشوع أو ينهد حيله قبل لا يكمل له جزء قرآن ..
و أذكر نفسي قبل لا أذكرج إن هذا باب احسان عظييييييم .. تخيلي بس ان كلهم محتاجينج ! تخيلي إنج أساس البيت يضيعون بدونج .. أنا لمن أعصب أو أتعب من المسؤولية و أشوف بنتي مو عارفة تنظف نفسها أو تغير ملابسها .. ما يعرفون ياكلون أكل عدل أو مفيد ولا يسنعون أمورهم أقول الحمد لله ! الحمممد لله ربي يديم علي الصحة والعافية و أخدم نفسي و أخدمهم .. الحمد لله ان وجودي وعدمي مو واحد .. الحمد لله إن رزقني بأسرة ..
بقولك كم نقصة لعلها تعينج :
١- دايماً نتذكر إن الله عز وجل كريم عظيم رحيم واااسع المغفرة .. ما خلقنا عشان يعذبنا و إن كنا في دار الدنيا .. تخيلي إن تبسمك في وجه أخيك صدقة ! .. عيل لو تبستمتي بوجه زوجك أو أبنائك .. ونشرتي البشاشة في بيتك ؟
٢- تخيلي حديث الرسول صلى الله عليه وسلم في الصحيحين ((من كان في حاجة أخيه كان الله في حاجته )) و الحديث الآخر (( والله في عون العبد ما كان العبد في عون أخيه )) شلون بأسرتك ؟ بأهل بيتك ؟ الأجر أعظم بكثيييير
٣-في أحاديث صحيحة وكثيرة في حق الزوج .. و حسن التبعل له .. والاحسان و الود .. وله أجر عظيم لمن تطبخين له لقمة نظيفة و مكانه نظيف و لبسه نظيف ..
٤- في هالأيام الفضيلة طبخك لأهل بيتك افطار صائم باذن الله تعالى
٥- تذكري دايما و أذكر نفسي إن الشيطان العدو اللدود لنا يبي يكرهنا في بيوتنا و شغلنا بأي شكل فلازم نكون واعين له
٦- الدعاء ثم الدعاء ثم الدعاء بانشراح الصدر و الاعانة
٧- لا تنسين وصية الرسول صلى الله عليه وسلم لبنته فاطمة رضي الله عنها و زوجها علي رضي الله عنهم أجمعين و الذكر الي قبل النوم
٨- اخلطي العمل بالعبادة وهالشي راح يريحك نفسياً .. تطبخين ؟ تجهزين للطبخ ؟ شغلي أي درس في أي موضوع ديني .. أو حتى دنيوي مفيد .. استغفري و سبحي و ذكري الله عز وجل .. رددي ما تحفظين من القرآن .. نادي واحد من عيالك مثلا حفظيه سورة او خليه يردد وانتي تشتغلين .. وباب الخير كبيييير
٩- عطي نقسك وقت روقان نص ساعة محد يكلمك فيه ولا يتعبك فيه وخليهم يحترمونه اجباري شربي فيه شي دافي و اكلي حلا .. القعدة مع النفس تخفف الضغط
١٠- كل ما ضاق صدرك تذكري رحمة ربك .. وان النية تحول كل عادة إلى عبادة حتى اللقمة الي تاكلينها و اهيا رزق ربي تاخذين عليها أجر اذا نويتي انج تتقوين على طاعة الله


سامحيني على الاطالة و يا رب يكون كلامي مفيد و أصبت قصدج .. و أنا أشكرج جداااااااً على طرح الموضوع .. لأنج خليتيني أذكر نفسي و أنا محتاجة هالشي مع الحظر و الضغط

حتى خدمتك لزوجك وعيالك من طبخ وغسيل واهتمام بالبيت
كلها بأذن الله مأجورة عليهاا
وهاذي الحياة الي تعودنا عليها الزوجة ربة بيت
والزوج يشتغل ويصرف ع بيته وعياله
نظمي وقتك ورح تلقي وقت للعبادة
مثل مالقيتي وقت لكتابة موضوعك
وطرحة بعالم حواء