شــآنيل , مآك , فور آيفر .. تجآربي بالصــــور !

السلام عليكم ورحمة الله وبركآته ..
يسعدّ مســـآكم جميعآ ..
الحمدلله على كل حآل .. كتبت موضوع طويل عريض وطآر = (

تجآربي اليوم دسسمه شوي ..
كل وحده تنقز تجيب لهآ كوفي , شآي , قهوه وتروقّ وتجي ..

جميع الصور من تصويري مآعدآ السواتش ..
صورة المنتج + درجته واسمه + سواتش له = في صوره وحده لتقليل عدد الصور !


1 .. بخآخ فيكس بلس من مآك
2 .. برآيمر آتش دي من فور ايفر
3 .. آسآس فيتآلومير من شآنيل
4 .. كونسيلر برو لونقوير من مآك
5 .. بيجمنت فآنيلا من مآك
6 .. آي شآدو برونز من مآك
7 .. بلاشر بوزي الكريمي من مآك
8 .. بلاشر دولي ميكس من مآك !



بخآخ + fix من مـــآكّ





الاغلبيه تتوقع انه مثبت مكيآج وبس ..
بس اللي مآنعرفه انه متكون من ميآه معدنيه + خلاصة الخيآر + فيتآمينات
بعض البنآت يستخدمونه لشعورهم وقت الحر والجفاف .. يعطيها لمعه ..
بصراحه مآجربت بس بآجرب آثق في هالمنتج ..

آستخداماتي الشخصيه له ..
قبل المكياج وبشرتي نظيفه تماما .. آرش 3 بخات واتركه يجف
وابدا احط المرطب والبرايمر والاساس والكونسيلر والبودره ..
بعدين ارش بعد 3 رشات .. واتركه يجف .. واستمتعي بآحلى اساس مدموج ومرتب ..

آرشه يوميآ مرتين على بشره نظيفه .. يعطيك ريفرش للبشره .. وتحسين بإنتعاش مو طبيعي ..
بشرتي باهته وجافه .. وربي بعده فقدت القشور اللي بوجهي .. وصار يلمع ..
ريحته جدآ منعشه .. واهم شي قوامه مو دهني ولا زيتي ابد .. كأنه موية ورد بالضبط ..
وفيه منه فيكس روز .. اللي فعلا معه موية ورد بس ليمتد ..
سعره 86 ريال
تقييمي له 10 \ 10 ولو ينشرب بآشربه هههه آعششقه !





برايمر HD الابيض من فور ايفر



برايمر آو بيس فور ايفر غني عن التعريف ..
وفيه لكل بشره لون .. مثل الابيض للاشراقه واللمعان ..
طبعا هو مو لون ابيض .. لا , قوامه ابيض بس لما تحطينه شفاف ..
فايدته .. يحمي بشرتك من اضرار الاساس بالذات اللي يستخدمون الاساس شبه يومي ..
يعطيك ملمس مخملي .. ويسهل مد الاساس ..
تحطينه بعد ماترطبين بشرتك .. وتتركينه يجف بعدين تبدين بالاساس ..
مرآت آحطه لحاله بالبيت آو باروح لاهلي ..
مرآ خفيف وريحته لطيفه .. ويخلي وجهك فرش ..
آشوفه ضروري للي تحط آسآس يوميا واللي تستخدم كونسيلر وبودره ..
لانه مايخلي شي يتكتل على وجهك ..
سعره 120
تقييمي له 10 \ 10




آسآس vitalumiere من شــآنيل



آنا ويني عن هالشي الجميل من زمآن !
كنت آدور آسآس تغطيته من خفيفه الى متوسطه .. يعطي لوك ديوي ..
ريحته كويسه .. ومن ماركه معروفه !
طبعا مارحت آدور بالمحلات .. دورت هنا بالنت .. بلوقات الاجنبيات ..
مقاطع اليوتيوب .. كلام خبراء التجميل الجانب ..
شهرين وآنآ ابحث .. لمآ آقتنعت بشانيل وحسيت انه هو المطلوب .. !
رحت للمحل بس عشان اختار الدرجه واشتريه .. كنت مقتنعه تماما انه هو اللي ادور عليه ..
والحمد لله ماخاب ظني ..
يعطي لوكّ ديوي ورطب .. قريبتي شآفتني مرا وتفآجات لما عرفت اني حآطه اساس ..
تقول على بآلي حآطه كريم بوجهك بس .. !
وهذآ شكله على الوجه .. هذي البنت حآطته لحاله بدون اي شي ..




طبعا هذا مــآ يناسب اللي بشرتها دهنيه .. بس فيه منه النوع المآت المطفي علبته قزاز مثلج مطفي ..
اما اللي علبته زي اللي بالصوره تلمع فـ هذا اللي يعطي لوك ديوي ويلمع !

سعره 230 ريال
تقييمي له 10 \ 10 في الشتاء .. باجربه بالصيف وان شاءالله مايخيب ظني ومايسيح !



كونسيلر pro longwear من مآك



كونسيلر ثقيل .. يعطي فللل كفر .. قوآمه بعد ثقيل ..
يصلح للمنآسبآت .. آعجب قريبتي جدآ لانه ثقيل .. بس انا ماحبيته ..
ولاني اخترت لون جاي على وردي وانا بشرتي حنطيه فـ ماناسبني ..
سعره 101
تقييمي له 5 \ 10



pigment vanilla من مآك ..



البيجمنت عند ماك معروفه ولا يعلى عليها .. آشهرها فانيلا ..
البيجمنت هو الاي شآدو اللي فيه شيمر لمعه ومتناثر ..
لونه زي السواتش لؤلؤي يلمع ..
آستخدمه كـ آي شآدو , اضاءه تحت الحاجب , اضاءه للخدود في المناسبات وشوي على الانف ..
لونه قوي و واضح وهذا اللي يعجبني فيه ..
سعره 101 تقريبا ..
تقييمي له 10 \ 10


شــآدو bronze من مآك



شدو شيمري .. رآئع جدآ .. لونه على اسمه برونزي .. لونه زي ماهو في العلبه .. في السواتش طالع اقوى ..
يصلح الصباح خفيف يعطي لوك ناعم وفريش .. وللمساء مع لون ثاني اغمق .. يجنن ..
آحسه من الالوان الـ must have لاي بنت .. واكيد لو خلص بآشتري واحد ثاني !
سعره 82 ..
تقييمي له 100 \10


ملاحظه #
آشتريت باليت مآك الـ 15 لون .. طبعا فاضيه بـ 62 ريال ..
واعبيها بالالوان اللي ابيها .. وبمآ آني آحب آبحث واشوف واجرب قبل اشتري ..
قررت اني مآ آعبيها الا بلون واحد حاليا .. وكل فتره بآحط لون لمّآ آكمل مجموعة الواني الخاصه ..
عندي لونين كربون الاسود ونايلون اللمعه .. بس بعلبهم ماطلعتهم .. !
شآدوهات ماك تستاهل .. بس قبل تشترين تاكدي ان هاللون هو اللي تبينه .. لانها مو رخيصه ..
اللون من 70 الى 80 : \


بلاشر posey الكريمي من مآكّ



تجربتي للبلاشرات الكريميه خجوله .. بس هالبلاشر خلاني آغير فكرتي عنهم ..
مرا جميل وطبيعي .. لونه يميل للوردي البارد .. آحب آحطه لحاله بدون اساس ..
خدود مورده طبيعيه 100%
مرآت اكون مرا مستعجله آحط مسحه منه على شفايفي .. لون مشمشي طبيعي لطيف ..
سعره فوق الـ 100 ممكن 120 نسيت = (
تقييمي له 10 \ 10




بلاشر dollymix (دولي ميكس ) من ماك




فوشي , وردي صريح ..
لونه واضح جدا .. لمسه منه تكفي .. بالنسبه لي مااستخدمه لحاله ابد .. لازم اساس ..
ممكن لاني حنطيه واحب درجات المشمشي والبرونز ..
س لازم تغيير بالذات الصباح آحب احط نقطه منه ..
تقييمي له 7 \ 10 .. ماحبيت لونه مرا ..



وآخيرآ .. حبيت اقول كم شغله ..
- ابحثي ابحثي ابحثي بالنت , اسالي , استشيري قبل تقررين تشترين اي شي ..
النت مليان تجارب وماشاءالله اليوتيوب
ماقصر ..
- لما تقررين تشترين اساس او كونسيلر .. والاشياء اللي تحتاج تكونين متاكده من درجتها ..
تعلمي وتعودي تآخذين معك علب صغيره مثل علب العدسات ..
تخلين البايع يحط لك من التستر واكتبي الدرجه وجربيها بالبيت .. وقرري ..
لاتقولين فشيله والا مالي خلق .. انتي في الاخير اللي بتستخدمينه وانتي اللي بتدفعين !
- لا تخلين اللي يبيع يقنعك بشي انتي مو مقتنعه فيه وحطي مليون خط تحت مو مقتنعه فيه !!
لما كنت اشتري اساس شانيل .. حاول اللي يبيع يقنعني باساس ثاني
وقال باعطيك نفس مواصفات شانيل اللي هي اللمعه والترطيب بس من ماركه ثانيه وارخص ..
قلت اوكي ورني مع اني ابد مو مقتنعه بس قلت باشوف وش بيسوي لاني ناويه شر !
لما وراني وشرح لي وخلص .. قلت عطني كرتون الاساس اللي وريتني
ولما قريت اللي عليه مكتوب (finishing matt ) يعني نتيجه مطفيه !!!!!!!!!!!!
آسسستغفال عيني عينك !
وكل ماعطاني اساس قلت ورني الكرتون .. وجلست اقرا ..
في الاخير قال انتي كوافيرا !!!!!!!!
ليه ؟ مايفهم الا الكوافيرات ؟؟
نصصصيحه اقري واعرفي وش تبين قبل لا تروحين للسوق .. واكتبيهم بورقه وسعرهم ..


آعتذر كثرت حكي .. بس والله مقهوره هههههههه ..


الموضوع لكم .. وآي سؤال من عيوني وآنا حاضره ..



شــــــوقّ