شقيقي دف امي

السلام عليكم
اخي الشقيق علاقته ب امي مو كويسة ابدا
ابوي وانا مراهقة قالي وهو يضحك امك ماتحب اخوكي هذا على فكرة وليومنا هذا يرفض يبرر كلامه لي انا متذكرته صح
الولد نشأ عند ام دوم تحطم نفسيته تكسر مجاديفه تطلعه اهبل وغبي ماتهتم فيه ابدا
وكلمتها دايم له
انت بتم اخر الناس ولا بحياتك بتصير رجال
الولد اضطرب نفسيا صار يحقد عليها ودخل بالحقد ابوي صار يكرهه ويسبه وابوي ساكت عليه
كبر ودخل كلية الملك عبدالعزيز الحربية وتخرج ضابط وانفرز من الرياض للشرقية صار مايجي الا نادرا وقطع اتصالات كاملة لدرجة ابوي يضحك ويقولي والله نسيته ويخلي اخواني من ابوي يتطمنون عليه هناك
تأملت وتأكدت انه علاقته بتصير قوية مع امي بحكم البعد والفقد لكن للاسف
رجع الولد من الشرقية ودوامه الان يبعد ٥٠ كيلو فقط يجي ينام بالبيت
من رجعته حصلت عدة مواقف بينه وبين امي
زوجة ابوي الثانية نزلت له وعطته كرت دعوة من اخوها عشان حفل عرسه
امي وانا وزوجة ابوي الثالثة كنا بالمطبخ والرابعة فوقنا تسمع
دخل علي ومعاه الكرت وهو يضحك قالي مارح اروح مالي خلق
جاوبته وقلتله لبي دعوتها
قالي لا مالي خلق والله
امي دخلت ب كلام
اي تروح ليه وانت فاشل وانت اخر الناس اكيد رح تخاف تروح لانك فاشل شوف كل هالشباب كلهم يرفعون راس اهاليهم الا انت تخزيني وزوجة ابوي واقفة تسمع مذهولة
الولد ماقال حرف بس وجهه صار احمر وصار يلف يمين شمال وبعدها راح
تعرض الولد لحادث سيارة الكل تحمدله بالسلامة وعمي سوا عشاء زوجات ابوي جابو هدايا
الا امه نكدت عليه الليلة وهو تعبان
وانت تسرع وعدمت السيارة حسبي الله فيك وليه ماتشوف
دوم تنعته انه شرشوح او انه خدام الضباط لي اكبر منه وانه هذا مقامه ومايستاهل اكثر من كذا وانهم يعرفونه فاشل واهبل وغبي عشان كذا خلوه بالميدان
الولد يحاول يداريها ليل نهار يمازحها يهديها
حتى اكثر من مرة جاب لها هدية
مرة ايفون مرة طوق دهب الا انه نكدت عليه
موشحها هذا يوميا يسمعه
امس اخذته يروح يشتري معاها اغراض للبيت
رجع سمعته كلام طالع نازل بدون سبب
تضايقت منه بسبب طريقة مشيه
اخوي يمشي شادد جسمه وراسه فوق مو تكبر اعوذ بالله لكن هذي طريقته
بدت له
الولد عشان يرتاح دخل غرفته وقفلها
امي وقفت له عالباب وكالعادة عطته موشح شحمته شحم بالكلام لي يهز البدن
فجأة شال اغراضه ودفها من طريفه وطلع لحق فيه ابوي مالحقه
راح جابه ونيمه في شقة بروحه على بين ماتهدأ نفسيته
الصراحة وضعه يؤلمني جدا حبيبي هو واخوي وعضيدي
بس ما املك له غير الدعاء فقط
اسألكم بالله تدعون لها ربي بحنن قلبها على هاولد