شكرا الاخ احمد العنزي حارس الامن بوابه واحد كارفور خريص

بسم الله الرحمن الرحيم

كيف حالكم يا بنات
حصل معاي موقف اليوم قبل شوي قبل اقل من ساعتين كنت رايحه كارفور ارجع شغله كنت ماخذتها ولما كنت بالسياره نسيت احط جوالي بالشنطه مع خبصه العيال لما وصلت نزلت من السياره وطاح الجوال مني بالشارع بدون ما احس ،، عاد الله يا الجوال البوم صور كامل حقي وحق خواتي وبنات عمي وبنات عمتي الاسبوع الي فات كان عندنا مناسبه وصورت فيه لاني نسيت كامرتي ،،، المشكله اني خاصت وما جسيت لما بغيت اتصل على السواق والا الجوال مو موجود ،،، يمه قلبي راسي قام يفتر والشيطان لعب براسي انا قلت اني نسيته بالسياره والحين السواق طايحله تفرج على الصور المشكله اني شايله الرقم السري والكيبورد لوك كلشي الله يسلمكم يعني الي ياخذه بارد مبرد ما يتعب ولا يشقى الامور سهله وياه ،،، رحت اركض للسياره ولما شفت السواق سألته عن الجوال قالي انا ما شفته مدام ،،، شوي والا زوجي يتصل على جوال السواق ويقولي انتي وين جوالج دق على واحد يقول انه لاقينه بالشارع روحي اخذيه من السيكرتي اسمه احمد العنزي عند بوابه واحد ،،، اخذت الولد ورحت اركض ،،، جزاه الله خير مسكر الجوال بعد ما كلم زوجي عشان يطمن زوجي انه ما راح يحوس فيه تصدقون يا بنات ان الشاب هذا ما يتجاوز عمره 22 سنه ،،، الي تعرفه او اي وحده تقربله من بعيد او قريب تتشكر منه وايد وايد والله يجزاه الجنه ويستر على محارمه ولا يفضحه يا رب يعني لو كان الجوال طايح بيد احد غيره كان علوم وكان شلت ذنب البنات كلهم ،،،، وما راح انسى فضل الحرمه المستوره الي وصلت له الجوال يعل الله يستر عليها وعلى بنياتها وخواتها وكل اهلها يا رب هذا الشباب الي نفخر فيه وبتربيته ومكارم اخلاقه ودينه وخوفه على اعراض بنات الناس مثل خواته ما راح انساله هالمعروف طول عمري بارك الله فيه والله يكثر من امثاله