شكرا عزيزتي (مطر الصباح ) صحيتيني من غفلتي

اولا
اشكر الاخت مطر الصباح اللي بفضل الله ثم فضلها قررت اغير مجرى حياتي
اشكرها انها خدمتني وهي ماتدري
وصدق القائل
مصائب قوم عند قوم فوائد
القصه بأختصار البارح كنت اتصفح منتدانا الغالي واستوقفني موضوع الاخت مطر الصباح وهي تتكلم عن مشكلتها مع بنتها
وهي تتكلم عن علاقتهم كأنها تتكلم عن علاقتي ببنتي اللي عمرها 6 سنوات
هي البكر بس مدري ليه علاقتي فيها جافه وقاسيه وما اذكر متى اخر مره ضميتها وبوستها
هي بصراحه تستفزني وتعاند احيانا وبدت فيها حالة الكذب كثير واحيانا تأخذ شي مو لها وانا مجرد مااكشف هالشي اثور واوبخها بشده واحيانا كثيره اضربها
مدري ليه انا قاسيه معها مع اني في طفولتي انحرمت من الحنان سواء من امي او ابوي بسبب طلاقهم وانا البكر
وكثير كنت اقول لنفسي زمان اذا جاني اطفال راح اعطيهم كل العطف والحنان اللي انحرمت منه
بس مدري ليه انا كذا
ومجرد ماقريت موضوع الاخت مطر الصباح البارح طول الليل ماقدرت انام افكر ببنتي وقسوتي عليها وافكر بحياتي ليه كلها صراخ وتوتر
ليه مااعيش حياتي ببساطه مع زوجي وبناتي
قررت اني اغير مجرى حياتي واخلي بيتي جنه لزوجي واطفالي
وفعلا اليوم الصباح بديت
رحت لبنتي غرفتها صحيتها عشان تروح الروضه بهداوه مو مثل كل يوم بصراخ
شجعتها تفطر بأسلوب هادي مو بتهديد
لبستها وسرحت شعرها الناعم وخليتها تختار الشباصات اللي تبيها وقلت لها انتي حلوووووه كثير وفعلا تأملتها وهي بمريولها كتكوته صغيره نعومه وحلوه
وطول اليوم حاولت امسك نفسي مااصارخ ولا اضرب سواء معها او مع اختها
بالعكس طول اليوم كلامي معهم هادي ورايق
والحمد لله حسيت براحه كبيره وعدى اليوم من غير صراخ وهواش
ياااااااااه فرق بين اليوم وامس
والله الحياه ماتسوى نتوتر ونعصب ونضرب ونهاوش
ليه ما نعيشها بكل بساطه وبكل هداوه
ليه مااخلي بناتي يذكرون اذا كبرو حبي وحناني لهم

ليه مانجتمع كلنا ونحاول نعيد حساباتنا وتفكيرنا واسلوبنا بالحياه
خاصة اني من خلال قرأتي لموضوع مطر الصباح لقيت مجموعه كبيره يعانون من الفجوه اللي بينهم وبين اولادهم البكر