السلام عليكم
كيفكم يا حبيباتي ؟؟
من زمان عنكم .. محد فقدني ؟؟ :35:
المهم .. موضوع اليوم من زمان في بالي .. وكل يوم يستفزني هالموضوع أكثر
كثير ننغر بأنفسنا وعباداتنا وصلاحنا .. وتعز علينا انفسنا لو أحد ينصحنا .. أو نشوف احد احسن منا في العباده الفلانيه مع أنه مقصر في عباده اخرى .. أو نحكم على الشخص من خلال بيئه غير الصالحه ... ونعيش تناقض كبيييير
.
.
لا أخفيكم احيانا انغر بنفسي ... لكن من أول موقف انصدم واكسر غروري ..
مثلا في نفسي اعيب على فلانه واهتماماتها بشيء في نظري سخيف.. واستحقرها .. وبعدين اكتشف انها احسن مني كثيييير وقيمتها من موقف واحد .. وتجاهلت أشياء هي احسن مني فيها
.
.
اللي خلاني اجزم على كتابه هالموضوع .. الأخ ياسر اللي جاء في قناة بدايه .. أصم واعمى .. لكنه أحسن مني ومنك
يقوم لصلاة الفجر من نفسه .. ويصف في الصف الأول .. ومواقف كثيره خلتني استحقر نفسي انا اسمع وابصر وبمواقف كثيره نقصر مع الله بصلاتنا وعباداتنا ونعصي الله بهالنعم اللي عطانا اياها .. يارب ترزقنا شكر نعمتك
.
.
الخدم والسواقين .. اللي كثير منا يستحقر جهلهم بالدين .. ونسوي انفسنا شيوخ عليهم ... مع انهم يمكن يكونون احسن مننا بكثيييير .. شغالتنا ماشاء الله طول وقتها تذكر الله .. واذاعة القران طول الوقت تشغلها .. وتحاول انها تحفظ القران .. وحريصه جدا على صيام الأثنين والخميس لدرجة أثرت علينا وصرنا نصومها دايما ..
.
.
والنصيحه .. كثير مننا مايتقبل النصيحه خصوصا اذا كان اسلوبها فض .. وبخاطرنا نقول مابقى الا فلانه تنصحني اللي فيها وفيها وفيها .. طيب اذا نصحتك بشي انتي فعلا تسوينه ليش تزعلين ؟؟؟
سواء الأسلوب حلو أو مب حلو بالنهايه هي نبهتني على غلط اسويه .. وحتى لو زعلت بالبدايه من اسلوبها لكن لما أحس بغلطتي بشكرها وبدعي لها ..
.
.
اللي بوصله لا تستحقرين احد ابد .. وخلي أي شخص يمر بحياتك يكون له أثر .. اذا ما استفدتي من ايجابياته تعلمي من سلبياته ..
وتعالي هنا واشكريه واطرحي لنا تجربتك معه
وأنا بقول من قلبي شكرا يا أخ ياسر الله يسعدك ويوفقك ويسخر لك زوجتك ويرزقك الذريه الصالحه اللي تبر فيك
وشكرا يا شغالتنا الله يرضى عليك ويعطيك على قد نيتك
وشكرا لك شخص كان له بصمه بحياتي وأثر فيني والله لا يحرمكم الأجر
وشكرا لكل وحده بترد وتتفاعل معي وتدعيلي بأن يحقق لي ربي أمنيتي :42:
استودعتكم الله :26::26:
