شكلها آه من شكلها

حضرت عزيمة أو جلسة عائلية في بيت امرأة اسمها : نورة ، وفجأة دخلت عليكم راعية"شكلها " :16:وخويتها ، جلست راعية " شكلها " وبدأت تتلفت في الحضور وتدقق في الحركات
وبدأت بالتحليل النسائي الذي فقن به كبار المحليين

بدأت في الحديث لخويتها

غريبة وين أميرة ؟ "شكلها" نورة ما عزمتها
شوفي سعاد توزع الحلا " شكلها" هي اللي جايبته
تهاني ما جلست جنب رشا " شكلها " مزاعلتها
أثاث بيت نورة روعة " شكلها" تساعد زوجها في المصاريف
وش هالشنطة اللي مع هند أوووف قديم موديلها " شكلها" من جهازها
أماني تمقل في هند " شكلها " بتحرها :) عشان موقف السنة الماضية
وين بنيت هنادي ؟ "شكلها ما جابتها بعد تهزيئة المرة اللي فاتت يوم كسرت الفجال !
عبير لابسه واسع مو العادة " شكلها " حـــامل .
سلمى قامت ولحقت نورة " شكلها " تبي تساعدها عشان تقهر عبير :(
نورة ما تصب من قهوة عبير اللي جابتها " شكلها" ماتعجبها
نها دخلت بعد أمها على طول " شكلها" جايه مع أهلها يوه يمكن متطاقة مع زوجها
ولد عبير يبكي وسلمى عنده " شكلها" ضاربته
أروى تعدت سلمى بالقهوة " شكلها " حامية في عبير
سلمى نزلت ريش المكيف "شكلها" تبي عبير تبرد وتقوم من صدر المجلس


ولما قلطوا على العشا
وش ذا ليشش العشاء بارد ؟ "شكلها "نورة مأخرته تنتظر أحد
سلطتهم " شكلها " مسواه من أمس

ويستمر مسلسل التحليل النسائي ، والله قبل أسبوع كان عند أهلي عشاء وجلست أحلل مع زوجة أخوي :35: ويوم رجعت سألت زوجي عن مواقف الرجال قال تعشوا وراحوا الله يستر عليهم
والله يا بنات أنا عانيت شخصيا من التحليل ، وكان فيه وحدة مشهورة والله إنها توغر صدرك :06:وتحشر الناس على بعض وتحول المواقف " البريئة" العفوية إلى طوّام والمشكلة أنها بالتحليل تحكم بالعدواة بين ثنتيتن في موقف ، ولما تشوفهم مرة ثانية يسولفون تقول : " شكلهم " تصالحوا وهم أصلا ما تزاعلوا

يا بنات خلونا في نهاية هالشهر وقريب العيد والاجتماعات نقضي على هالعاة السئية ونعيش بعفوية ونريح بالنا وحياتنا من مراقبة الآخرين والإفتراء عليهم وخلونا نكسح أي وحدة تحلل !

على فكرة مناسبة الموضوع أمس زايرتني " شكلها " ملت قلبي بالهم الله لا يحييها وش أسوي لها حق !