شلون ارد عليهم و شاقول لهم؟!!

بنات بغيت مساعدتكم و يا ريت ما تخيبوني..

اعرف وحدة من قبل الزواج معرفة سطحية ... كانت خوش بنية حبابة و في حالها بس ما كانت علاقتنا قوية و لا كانت قريبة مني بس كان بينا سلام و كلام و دردشة سريعة و بشكل عام كانت طيبة.. و افترقنا فترة طويلة و بعدين تلاقينا بالصدفة مرة ثانية و كانت متزوجة و عندها عيال .. بس لاحظتها متغيرة.. من ناحية على طول فيها اسلوب تصغير و تحقير و تحبيط ..و بعدين تتدخل في كل شيء يخصني من علاقتي مع زوجي و تربيتي لولدي و تبي تعرف كل شيء عني... و و صلت فيها المواصيل لانها تعطيني اوامر تخص حياتي مع زوجي.. مثل ليش ما يطلع ريلج من شغله او ليش ما يغيره؟؟ يله لازم تحملين الحين.. او ليش ما تنقلون من بيتكم لمنطقة غير .. يعني امور جدا خاصة ما تعنيها.. ما انكر اني قللت علاقتي فيها كثير و حاولت ابتعد نوعا ما.. و هي تتصل للحين و انا اكلمها عادي ما اتهرب..

قبل فترة عرفتني على صديقات لها.. لاحظت وحدة من اول يوم و هي نازلة تصغير و تحقير فيني و هي ما تعرف عني شيء..هذا غير التدخل المباشر و الانتقاد لاي شيء اسويه و الثانية كانت عادية في حالها.. قبل كم يوم اتصلت فيني صديقتها الثانية اللي في حالها.. و قعدت تسولف و لاحظت فيها نفس اللي لاحظته في الثنتين اللي قبلها.. تدخل غير طبيعي حتى عن راتب ريلي سألت!!! مع انها ما قط كلمتني و المرات اللي شفتها فيها تنعد على اليد.. غير تدخلها في تربيتي لولدي و شغل زوجي و حتى بيتي اللي عايشة فيه ما سلم منها... غير انها قعدت تحط لي خطط لحياتي مع زوجي وكيف لازم نضبط امورنا !!!

انا احاول اتحاشاهم و اتحاشى قعدتهم لانهم يضايقوني و على طول يحسسوني اني مو فاهمة شيء و مو عارفة مصلحتي و مصلحة زوجي و ولدي و حياتي الزوجية بشكل عام...

انا ما بيني و بينهم شيء و كلامي معاهم عام جدا و محدود.. بس ودي ارد عليهم بدون ما اجرحهم و بدون ما تصير بينا حساسيات لاني اكره هالمواقف...

بنات ابي منكم تساعدوني بردود قوية و تسكتهم... و ما تخليهم يرجعون يتدخلون بهالطريقة.. و يا ليت لو تعطوني امثلة.. مثلا لو يقولون لي ليش ما تنقلون من بيتكم.. ابي اعطيهم رد اعلمهم ما تدخلون في هالشيء الخاص او ليش ولدج كذا او ليش تربينه بهالطريقة ..ابيهم يعرفون اني ما احب حد يتدخل في ولدي و لو احتجت مساعدة منهم في التربية راح اطلبها بنفسي..

منتظرة ردودكم يا الغاليات..