مرحبا يا بنات . . . .
أن زعلانة منكم يا بنات . . !! ، ليش ما في أحد استغلني ليما ألحين . . ؟!
الله على هذاك الزمان يوم كنتم تحطون فيني أحلى الفاكهة . . ، كنتم تفتخرون
فيني وبحلاتي . . ، بس ألحين ما في أحد معبرني مع أني راضية تستغلون
بأي شكل حتى لو تحطون فيني بصل . . ؟!!
أنا أدري إن طلع علي الكريستال والزجاج وشغلات ثانية أحلى ، وأنا ظليت سلة
معدنية قديمة لا أكثر ولا أقل . . ، بس هذا ما يمنع إنكم تستغلوني بأشياء ثانية . . !!
لما جتني هنايا ونظفتني من الغبار إللي علي ، عرفت إنكم مطرشينها عشان تراضيني
بالبداية وعدتني إنها تسوي مني أحلى شمعدان . .
ما أغبي عليكم أنا فرحت وايد بس قلت ما راح أرضى وأسامحكم إلا لما هنايا تصبغني . . !!
من زمان وأنا أتمنى أغير لوني وشكلي . . ؟!!
أول شي خذت هنايا من علاق الملابس الحديد قطعة صغيرة ولحمتها علي بالنص . .
وبعدين خذت علاق الملابس البلاستك . . ، وقصت من عنده عمود . .
وطبعا هذا العمود لأنه محفور من داخل قدرت هنايا تدخله بالعمود الحديدي إللي
لحمته فيني . .
وبعدين خذت قطعة من الخيش وقصتها بالمقاس المناسب وقصت في منتصفها
فتحة صغيرة ودخلتها بالعمود البلاستيكي . .
وبعدين ثبتت في أعلى العمود البلاستيكي عمود ثاني أفقي من علاق الملابس البلاستيكي . .
وبعدين خذت أطراف قطعة الخيش وربطتها على العمود الأفقي بخيط من خيوط الخيش . .
وخذت بعدبن قواقع صناعية . . ، وثبتتهم على بعض بحيث سوت اثنين
مفتوحين واثنين مغلقين . .
وخذت شبكة من إللي يحطونهم على الشعر . . ، أكيد يا بنات عرفتوها . .
وثبتت الشبكة والقواقع داخل السفينة ، يعني داخلي أنا إللي في الأصل سلة معدنية
وبعدين ياتني الحظة المنتظرة أنا أسميها لحظة العمر ، لما هنايا خذت صبغ
الرش عشان تصبغني ، وصبغتني بلون نحاسي روعة . .
وحطت فيني الشموع داخل القواقع المفتوحة . .
وصرت أحلى شمعدان على شكل سفينة . .
وصحيح يا بنات إنكم أهملتوني وايد . . ، بس مادام بالنهاية هنايا استغلتني بشكل حلو
خلاص طاح الحطب بيننا . .