شنطتي الدبلوماسيه السودا .. تعالوا شاركوني وفتشوها معي "ذكرياتي "

السلام عليكم والرحمه










لا احد يستطيع ان ينكر ماتحمله ايامه من ذكرى
وتحملها قلبه وتحملها مخيلاته
هي معنا اينما نكون
قد نتناساها ولكن ابدا لن ننساها
بعضها رائع وياليتها تعود
وبعضها مؤلم

هي حقيبة لي , اضع فيها كل ما احب واخشى عليه من الضياع
من اوراق وغيرها
تماما مثل ذكرياتي التي احتفظ بها في ذاكرتي
غير ان ذاكرتي تحتفظ بالجميل والقبيح
ولكن اسعى جاهده لنسيان القبيح منها
كي استمتع بجمال الحياة

هذه حقيبتي اشتقت لأن ارى مابداخلها ففتحتها
ولأنكم اصبحتم جزءا من حياتي
احببت مشاركتكم لي
لنرى
مكنوناتها

　
هذي شنطه دبلوماسيه سوداء جلد كشخه اللي
يشوفها يقول شنطة رجل اعمال
واللي مايخاف الله ونفسه امارة بالسوء بيحاول يسرقها خخخ

بقولكم وش فيها كذا من باب الميانه
والله احبكم واتخيلكم بأي سالفه عاد حبيت تشاركوني
من تبي تفتش معي >> حياكم

طبعا اول شي حطيته في ذي الشنطه اللي هو
اوراق مراجعاتي لما كنت ادور الحمل عشان اوريها
عيالي لكبروا ان شاءالله ياويل اللي مايبرني
وشوفوا هالرابط بهامناسبه

　
http://forum.hawaaworld.com/showthread.php?t=2936173&styleid=34　

هذي رساله من اختي لما تزوجت كانت بخامس ابتدائي
تقول
الى العزيزة الغاليه هدى الحبيبه
هدى انا احبك كثيرا هدى اتمنى لك الحياة السعيده
انت اجمل وحد شفتها بحياتي هدى انت قمر انت جميله
هدى امانه لاتنسين تقرين الرساله >> خخخ عارفه اني عروس
وممكن اسحب عليها كم يوم هههههه
هدى امانه لاتنسيني >> ياعمري هي

(( شوفوا كم مره ذكرت اسمي فديتها ))
ألحين هي تبارك الله بثاني جامعه

وطبعا لقيت رسايل ثانيه لخواتي تهبل وبكتني
ودي احطها لكم بس طويله شوي >> تستفيدون منها هههه

ولقيت فيها صورلأطفال العائله ياحليلهم الحين كبار
وحاطه فيها شهادات عيالي من الروضه
وبعض رسوماتهم الحلوه
عشان لما يكبرون ان شاء الله اوريهم

　
طبعا ولقيت فيها قصايد لأخوي الله يرحمه ويغفرله
ويجعل قبره روضه من رياض الجنه
فيرى مقعده من الجنه صباح مساء >> قولوا امين
لما سوينا فرز لأغراضه استأذنت ابوي اني احتفظ ببعضها
ووافق لأنه كان رافض عشان مانحزن اكثر

بداية راح ابدأ بقصيده له شكله يعتب على احد اصدقائه
وهذي حطيتها بمناسبة البنات اللي تأذوا من اصدقاء لهم
بعطيكم بعض ابياتها

انا اللي نسيت الخطا ونسيت مثناك
ومثنا الخطا بالطيب مسحت مافات

ماقلت انت اللي بديت بسوياك
تحملت الخطا وكبرت فيك هقوات

ياكبرها يومك تبين لي جفاك
وخليت فيني الردى والعيب علامات

ياللي تناسى خويه خويك تناساك
نساك وماذكر ع الفرقا حسايف وحسرات

وينزف الخاطر ابيات من القصيد تنصاك
يافلان يابن اللي مذكور بالطيب مامات

وللقصيده بقيه اكتفي بهذي بس

　
وهذي قصيده ببنتي اول ماجبتها

ندوش ياشيهانة ضمها حر
كما قلبا بالضلوع مضموم

ياللي لأجلها بكتب شعرا مسطر
بكثر قدرا لها بالقلب مقسوم

يابنت من هم بيننا رجالا مقدر
قرما وأجداده رجالا قروم

بنت اختا بها انتخي يوم اتكدر
يالله انك تحفظها دايم الدوم

..............
...............

الى

قصيدي ياندى غدابك محير
يامن غلاها قدره الروح ميسوم

ومنيتي يارب اشوف ندوش تكبر
واشوف الفرح بقلبها دوم موسوم

الله يرحمه مااااااااااااااااااااات وعمرها 11 شهر
وقبل لايكمل هو 23 سنه
والحين ندوش نجحت لرابع >> تبكي

　
　
　
هذي مطلع قصيده عجبني
بعطيكم المطلع بس

دنياي ربي بصروفها أدرى والعبد ينقاد
والعبد يطلب التلطيف مايطلب للقدر مردود

**********

　
طبعا كل القصايد اللي معي هذي مطبوعه بورق
ومبروزه وخلفيات واشياء حلوه مسويها الله يرحمه

هذا بيت واحد لحاله
مسويله خلفيه وبخط روعه

زماني قل فيه حظي وكثروا المقفين
يالمقفي نسيتك لو قلت معذور

عله تساهيل يالنفس لا تشكين
اطلبي ربك علني بالطيب مذكور

الله يرحمك ويغفرلك أكيد بالطيب مذكور

　
الله يرحمه ويرحم اموات المسلمين

مو وحده تجيني تقول شالفايده من الموضوع
عادي فضفضه .. كان اولها مزح اختتمت بذكرى ليتها تعود

بعد التعديل ..
تذكرت قصيده لعمي عطانياها يوم زواجي
هذي للمقبلات على الزواج بعطيكم بعضها


بأسمى التهاني نزف ظبي العداما
متمنين السعد لخيرة نسانا

وبسامي المعالي حق زوجك تحطي
صوني دينه وعرضه يومه شرانا

بكتاب ربي وسنة نبيه تقدي
واحفظي خمسك يحفظك رب خلقنا

بكفوف الود والرحمه امه تحوفي
ووفي بعهدك وهو غاية مرتجانا

عينك عند ماطى الرجل لاتحطي
شومي وعفي هي وربي عوضنا

وسلامتكم هذي اهم شي بالقصيده



الدعاء ..
ذلك الحبل المتين .. والمعصم القوي
يربطنا بالسماء دائما .. بابها مفتوح ..
ما أن ترفع الأكف ..
الا وأمطار الإجابة تزهر ..
وإن لم نراها ..تؤجل ..لمصالح أرواحنا ..
لا تهمل الكفوف العالية ابدا
والله لا تهمل


لا اله الا الله