مبارك عليك يا اخت شوشو.. والحمد لله على سلامتك وسلامة راما.. تتربي بعز اهلها ان شاء الله..
سيرين3
•
الف مبروك يام راما الله يجعلها من البارين بوالديهم ويبلغك فيها عروس وتشوفين عيالها وعيال عيالها وتبشرينا بس ياترى بيصير فيه منتدى ذاك الوقت الله اعلم والله يفرح كل مشتهي عيال ياااارب
الصفحة الأخيرة
الف شكر لتهنئتكم لي اشكركم جميعا بدون تحديد
راح احكيلكم قصه ولادتي
في يوم 82/6/2005
كان عندي موعد في المستشفى (( مستشفى الحرس))
دخلت على الدكتور قالي روحي سوي اشعه صوتيه لانك ماسويتي عندنا اشعه صوتيه (( لاني كنت اراجع في السعودي الالماني وطلعو نصابين كل شوي ادفي فلوس دفعت لهم 1500 برنامج متابعه حمل وكل مارحت لهم قالو سوي تحاليل واشعه طبعا بمبلغ ثاني ونا ادفع لما اخر مره قالولي سوي اشعه وتحاليل بقيمه 600 ريال قلت والله ما اسوي عندكم راحت فلوسي على الفاضي وانا ما راجعت عندهم الا يمكن 5 مرات بس المهم حولت على الحرس في الشهر التاسع ))
لما رحت على موعدي وطلب مني الدكتو اني اسوي اشعه صوتيه رحت اسوي الاشعه في قسم ثاني ومرينا على قسم الولاده وانا انتظر دوري للاشعه حسيت بتعب على فكره كانت الساعه 8 ونص صباحاً المهم دخلت على الممرضه الي سوت لي الاشعه وحسيت بألم في بطني وطلعت من عندها وانا متسنده على زوجي قلت له مدري وش جاني يمكن من الخوف لما مريت من قسم الولاده المهم زوجي كان ماسكني لحد مادخلت على الدكتور اول شيء سألني الدكتور كيفك ياشوشو قلت له تعبانه قال ان شاء الله ولاده لما شاف الدكتور الاشعه قالي يا شوشو المويه قليله ودقات نبض الجنين بطيئه راح نشوف الرحم هل هو مفتوح ولا لا لماسوت لي الممرضه طلع مفتوح 3 صانتي قال مبروك ولاده وانا قلبي طاح في رجولي من الخوف طلعت لزوجي وقلت له بولد قال ووجه متقلب اشكال والوان ايه الحمد الله وسحبوني في عربيه لقسم الولاده دخلت غرفه الطلق الساعه 11 وقلت لهم ابي زوجي معي قالو لا ممنوع لان فيه حريم غيرك كثير قلت ماعلي منكم ابي زوجي وطنشوني حسبي الله عليهم وكل مادخلت علي ممرضه قلت له ابي زوجي قالت لا ممنوع وضاق صدري قلت ابي احد معي اول ولاده لي ولحالي مايصير ياليت امي معي المهم وجاني الطلق بس بسيط لانها البدايه بس والله يعور
وجاني دكتور قالي بتاخذين ابره الضهر قلت لا قال ليه والله ممتازه قلت ما ابي قالي لو انا متزوج والله اخلي زوجتي غصب تاخذها حاول يقنعني بس انا رفضت
الساعه 12 دخلوني غرفه الولاده
وجى الدكتور الي انا اراجع عنده قالي يلا يا شوشو زوجك الحين بيدخل معاك غرفه الولاده
دخلت غرفه الولاده وقالي الدكتور خذي وقعي على الورقه حقت ابره الضهر قلت لا ما ابي قال ليه والله انها نعمه لكم قلت لا اخاف وكانو حاطين في يدي مغذي وزوجي ماسكني توني ما جلست على السرير ولما يجي الالم يقولي الدكتور شفتي الحين من الي يتألم انتي وانا وزوجك مو حاسين بشي بس احنا ننصحك تاخذينها والله ترتاحين من الالم وكل ماشافني زوجي اتألم يقولي وقعي يلا لا تخافين وانا اقول لا وقال الدكتور وش خايفه منه قلت لانها ممكن تسبب شلل قال لا وش هالخرابيط ما تسبب أي شلل كل الدكاتره والممرضات الي في المستشفى يستعملونها ولا صار لهم شي ولما زاد علي الالم قلت يالله اتوكل على الله واوقع
ودخل علي الدكتور وجلسوني على السرير وجت ممرضتين ومسكو ايديني ووحده ماسكه راسي عشان ما اتحرك وزوجي ماسك كتفي وايدي وانا ضايع وجهي خايفه من القصص الي اسمعها وحده انشلت ووحده انعمت والله كنت خايفه وجلست ادعي واذكر الله ولما دقني الدكتور الابره بغى زوجي يغمى عليه قالي بطلع ما اقدر اتحمل حاس بدوخه قلت تروح وتخليني لا تعال وجى ومسك يدي لما خلص الدكتور المهم بعدها نمت على السرير وقال عشر دقايق وماراح تحسين بالطلق مرت العشر دقايق وبعد ماكنت ابكي وحالتي حاله جلست اسولف مع زوجي واضحك
المهم الرحم عني ما انفتح الا 5 صانتي وكل شوي يجون ويشوفون ويقولون لسى ما انفتح حطولي طلق صناعي الساعه 5 المساء ولا حسيت باي شي الحمد الله اني دقيت الابره والا كانت انواع العذاب بس لما حطو الطلق الصناعي خفت نبضات قلب الجنين واحيانا توقف ما اسمعها والله خفت وقلت عسى بنتي ما تموت شالو الطلق الصناعي لانه ممكن يأثر على الجنين والساعه 8 جتني الدكتوره والدكتور وقالو للاسف في خطر على الجنين ومضطرين نسوي لك عمليه ضاق صدري قلت ابره الضهر ومرمطه واخرتها عمليه قال الدكتور مايحتاج نعطيك بنج لانك مبنجه من ابره الضهر قلت يعني بتسوون لي عمليه وانا صاحيه قال ايه قلت لا مستحيل ما اقدر اتخيل اني صاحيه وانتم تفتحون بطني نفسيا ما اقدر اتخيل الموقف قال لا عادي ماراح تحسين باي شي قلت حتى ولو ما اقدر اتخيل
دخلوني غرفه الولاده وحطو حاجز عشان ما اشوفهم وهم يفتحون بطني وما حسيت بشي الا وهم يضغطون بطني ويطلعون بنتي ولما سمعتها تبكي جلست ابكي معها احساس غريب وحلو الله يرزق كل محرومه الذريه الصالحه وتجيهم بنت مثل بنتي مزعجه وبكايه
وهذي قصتي بأختصار لان فيها مواقف كثيره بس مو مهمه
تحياتي لكم