شوفوا الخوف والهبل اللي صابني امس على الفطور صرت مجنونه

اخواتي
السلام عليكم و رحمة الله وبركاته
ومن العايدين ..... ينعاد علينا وعليكم بصحه وسلامه يارب
قصتي انه امس افطرنا عند اهل زوجي عازمين ضيوف عندهم على الفطور و ولدي عمره سنتين ماشاء الله الله يحفظه هادي مو من النوع الشقي او المزعج
ومع الحوسه وتحضير الفطور جلسنا كلنا واشوف ولدي ينطنط قدامنا وحنا ناكل وفيه ولد كبره بس ما كانوا يلعبون مع بعض كل واحد منهم يلعب لحاله و يستعرضون قدام بعض
المهم حنا كنا في الصاله ناكل وفيه باب الحوش وباب الشارع كلها مفتوحه وهذي اول مره تنفتح البيبان كلها ( بس انا اعتقد انه عشان الضيوف ونسوا بعدها لا يصكرون الباب ) وبيتنا على شارع عاااااااام وهذي حطوا تحتها مية خط احمر
يعني انواع التفاحيط قدام بيت اهل زوجي وياما صارت حوادث دهس راحت فيها ارواح اطفال
انا فقدت ولدي اللي كان قبل دقيقه عندي قمت وارسلت اخو زوجي الصغير للرياجيل يشوف ولدي و ولد الضيوف عنده الرياجيل او لا ؟؟؟؟؟الله يصلحه (قال لي ايه فيه )
انا تطمن قلبي و رحت اصلي المغرب وانا اصلي الا اسمع ركض الحريم ويصارخون العيال ما هم فيييييييييييييييييه ......... وين راحو ؟؟؟؟؟؟؟؟
انا انهبلت قطعت صلاتي ورحت اركض بشرشفي زي المجنونه ( وين ولدي.......... وين ولدي ) واصارخ والحرمه الثانيه المسكينه جاتها نفس الحاله بس هي ماسكه نفسها اكثر مني
طلعنا برى وما شفنا احد رجعنا حنا والرياجيل ندور داخل البيت ما لقينا احد
وانا خلاص شبه منهاره
ياناس توه كان عندي ماله الا دقيقتين وين رااااااااااااااااااااااح ؟؟؟؟
وبغيت اطلع للشارع لولا اني شفت الرياجيل كلهم برى وتذكرت انه ما علي عبايه ورحعت وانا اصيح ولدي ولدي وانا واقفه في الحوش
الا اسمع اللي صرخ باعلى صوته اعتقد انه ابو الولد الثاني اللي صرخ

انا دوروني في هذي اللحظه عرفت انه برى في الشارع وفي وسط الخط وصرخت بخوف ورعب
الخط هذا ما يوقف ابد انا اعرفه
كل رياجيلنا الله يجزاهم خير وعمان ولدي وابوه:arb: طبعا راحو ركض يوقفون السيارات اللي جايه من الجهه الثانيه واللي يشر بشماغه واللي يصارخ و دوريهم كانهم في ماراثون جري
تخيلوا ؟؟؟؟؟؟؟؟
مشى ولدي هو والولد الثاني وطلعوا من باب الشارع المفتوح من غير ما احد يحس فيهم وقطعوا الشارع العام و راحوا للخط السريع و وقفوا في وسط الخط عشان كذا ما انتبهنا اول مره لما طلعنا برى ندورهم
كل هذا والدنيا ليل يعني حتى السيارات يمكن ما تشوفهم

بس الحمدلله
الشارع على غير العاده شبه فاضي
يمكن عشان الفطور
الحمدلله جابوهم وسلموه لي وسلموا ولد الحرمه لها وكلنا بس نصييييييييييييييييييييييييييييييييح:icon33::icon33:
الحمدلله يارب انك سلمته لي وسلمت ولد الناس لهم
ياربي احس انه انا ماني مصدقه اللي صار
ماني قادره استوعب جابوه لي يشيلونه وهو قاعد يضحك وانا بس ضامته واصيح واصيح
الحمدلله يارب
بنات حواء اتمنى انكم تنتبهون لعيالكم سواء وانتم في البيت او برى البيت
عاد قالوا انه ولدي هو القايد وهو اللي وصل الرصيف اللي يفصل بين الشارعين والولد الثاني لسه بيقطع الشارع
خمس دقايق مرت ويمكن اقل بس والله والله انها علي كانت اثقل من جبل خوف و رعب وشيء الله لا يوريكم
ما اقول غير الله يحفظ جميع اولاد المسلمين

وبس
عاد ادعوا لي بالذريه الصالحه وان الله يرزقني بالحمل :26: