شوفوا الى جا يخطبني وش طلع بالأخير

الى راح اكتبه الحين مو مشكلة ظلت معاي الحمدلله لكنها قصة صارت معاي وقت الخطبة وصدمتني لاني ما تخيلتها ابدا ..لكن هذه الدنيا عش رجبا ترى عجبا :42:

القصة بدت بداية طبيعية، حرمة شافتني وبعد فترة جت تخطبني لولدها ( احنا نعرف اخت الحرمة هذه بس وعلاقتها مع امي علاقة يومية اوكثر)..اتصلت الحرمة وكلمتني امي في الموضوع بس انا ماخذته بشكل جدي إلين ما جت الحرمة وبنتها تزورنا عشان تشوفني.. مع ان الحرمه كانت تتصل بشكل شبه يومي ومتسعجلة . وقبلها جا ولدها يشوف ابوي واخواني وبعدها جا زياره ثانيه عشان يشوفني انا.

من زيارتهم شفنا الولد جدا هادي وخجوول ..نفس كلام امه الى كانت تقوله عن ولدها وهي واثقة منه انه محترم وخلوق وهادي وخجول. حتى يوم جا يشوفنى من كثر ما هو خجول انا الى بديت في الكلام ( حسيت اني انا الرجال وهو البنت) لاني شفت ما فيه فايده لا يرفع عيونه ولا بيتكلم وانا ملاحظة ان اخته تنغزه بكوعها عشان يبدا يتكلم .. وامي تسوي فينى نفس الشى لين اخر شى انا بديت ( شفتو الجرأة) :35:

اتصلت في اعز صديقاتي عشان تساعدني في اتخاذ القرار لانه مو هين..قلتها لو توكلين حد يسألي عنه لان اخواني اصغر مني وما عندهم خبرة ويمكن ما ياخذون الموضوع بشكل جدي كثير. وقالت ابشري ..وخالها تكفل بالموضوع

بعد يومين تقريبا اتصلت صديقتي وتتاكد من المعلومات الى عطيتها اياها وانا اقولها صحيحة المعلومات ليش تتاكدين ..قالت :29:قالت الرجال طلع متزوج وتوه جايه ولد من عشرة ايام بس .. انا على طول ضحكت وقلت مستحيل اكيد خالك غلط .. قالت مع انه خالي متاكد بس قال بيرجع يتاكد..تاكد مرة ومرتين وثلاث وكل مره يرجع يعطوني معلومات وتفاصيل اكثر عشان نتاكد انه هو نفس الشخص مو تشابه اسماء ولا شى. ليين تاكدنا في الاخير لانه في شخص يشتغل في شؤون الموظفين في نفس مكان عمل الى جا تقدم لي واكد الخبر وحتى عطاني جنسية زوجته ( مو مواطنة).. مع اني صراحة كان صعب اصدق لاننا نعرف خالة الرجال وما قالت انه متزوج ولا امه قالت .. وفوق هذا هو يستحيييييي .. والمتزوج يكون اجرأ من كذا

قلت لاهلي الى عرفته ..ومازالت الحرمة تتصل بشكل يومي تبى الرد..في الاول قلت لامي لا تقولين لامه يمكن ما تعرف انه متزوج بس بعدين غيرت رايي قلت لامي واجهيها وانا كنت معصبة شوي من الموضوع اقول شو يستهبلون علينا..
كلمت امي الحرمة ..لكن الحرمة انصدمت وقالت لاااا مستحيل ..قعدت امي تقنعها انا احنا متاكدين وما صدقت الا يوم قالت لها جنسية زوجة ولدها ..ساعتها بس صدقت لانه ولدها كان يحب وحدة من الجنسية هذه لكن امه رفضت انه ياخذها..وقالت اااخ يعنى سواها :06: سواها وخذاها وكيف من ورانا وصار عنده ولد منها..وطبعا جتها صدمة وقعدت تبكي وحاالة
بعدها بشوي اتصلت اخته وكلمت امي قالت لها وش قلتى لامي انتى لانها من ساعة الى كلمتيها انتي طاحت وقاعدة تبكي ولا راضية تتكلم ..قالت امي لاخته عنه وهذه الثانيه كمان انصدمت وقعدت تبكي وتصرخ


قلنا لهم معقوله يعنى ولدكم متزوج قريب سنة الحين وانتو ولا عارفين ..قالت كان يغيب عن البيت باليل بس يتعذر انه يناوب او شى كذا للشغل.. وما كان يخلي حد يدخل غرفته ولا حتى الخدامة

والقهر انه مو مبين علييه هااادي ومساالم كيف قدر يخدع اهله طول هالمدة.. والقهر الاكبر :06: انه زوجته الى توها والدة وجايبه له ولد عمره 10 ايام رايح يتزوج عليها وهي لسه في النفاس..وهذا هو خذاها على حب وغصب على اهله.. يبي له ذبح والله :mad:


تبون تعرفون ردة فعله يوم واجهته امه بزواجه .. رد عليها بكل بروود ايه متزوج ما سويت شى غلط ولا خذتها بالحرام..قالته فشلتنااا قدام الناس رايحين نخطب لك بنت ناس وانت متزوج وعندك ولد .. قاال لا ما عندي ولد ولا زوجتى حامل ولا شى .. شووف الكذاااب :mad: .. تم ينكر انه ما عنده ولد لين اخر شى اعترف وصار يجيب لهم الولد بدون زوجته لانه امه ما تبى تقابلها

بس الموضوع ما وقف عند كذا ..قال لامه روحي اخطبي لي وحدة ثانية ..رفضت امه طبعا وقالت له مستحييل ..لكنه قالها اوكي مو مشكلة راح اتزوج واخذ الثانية لحالي وراح تشوفيين

هذه هي القصة وانا للحين مصدومة منها ومن تصرف الشخص هذا .. بس الحمدلله انه ربي ستر وبفضل خال صديقتي الى انقذني ولا الله العالم وش كان بيصير لي مع واحد مثل هذا :44:

ادري طولت عليكم بس اسمحوا لي


:26: