شوفوا امي كيف كانت تسوي فيني ..!!

بسم الله الرحمن الرحيم

كنت في صغري مااحب شي اسمه مدرسه ولا اكتب واجب مجنن المدرسين
وهم جننوني , ماروح للمدرسة الا بالهواش والزعيق , ويامى سويت نفسي مريض حتى من شدة الاندماج في الدور يسخن راسي بقولكم كم موقف
من مواقف الدراسه /

1 / كنت مسجل وانا في ثانية ابتدائي في مجموعة تقويه في العصروانا ماودي
لاكن ماهو بكيفي غصب عني لوهي بكيفي جلسه على سندباد , وسنان
وعدنان ولينه وقرنديزر وزينه ونحول وبشار وبسمه وعبدو ولولو الصغيره
وهاني وعاصم تسوىالدراسه كلها وبعد ماتفرج العب كوره في الحاره واذي
الخلق , المهم اول يوم ماودي اروح واقول لي ابوي وامي كيف اروح وتفوتني
افلام كرتون قال ابوي تروح يعني تروح , بس امي عليها افكار رهيبه,
قالت خلاص ياولدي بنسكر التلفزيون لين تجي واذا جيت تشغله وتتفرج على
افلام كرتون .
قلت خلاص , بس اخواني خلوهم نايمين لايفكونه واجي القاها خلصت .
رحت ولمن جيت , هاتك ياصياح وضرب في اخواني , لاني جيت ولقيت
التلفزيون شغال , تخيلوا يومين اروح لى المدرسه بنفس هالمقلب.
حبيبتي امي .

بقلكم شي بس لاحد يضحك مره كسرت تلفزيونا القديم في بالي باحصل في داخله
حبايبي المفظلين افلام كرتون , واختي معي انا اقلها اذا حصلت سنان باخذه
عاد قالت طيب واذا لقينا الي في الاخبار وش نسوي فيهم قلت نرميهم برا وذاك
اليوم مابقيت ولاقطعه في التلفزيون الا دورت فيها .

2 / مره كانت على فصلنا الاذاعه وكانت الفصول الى تشارك من الصف الرابع
الى السادس وفي وقتنا عام 1400 هـ كان في الصف السادس شباب
بدقونهم يعني نشوفهم رجال لاكن الان تغيرت الاحوال .
وتمر الاذاعه على كل فصل كل عشر ايام مره ولازم يشارك الجميع
كنت اتهرب منها مافيه جراءه اتكلم بالمكرفون قدام الطلاب والمدرسين
لين مابقي الى اخر مجموعة وكنت منهم فقالوا عليك حكم وامثال .
انا ماعرف الا (( من جد وجد ومن زرع حصد )) والثانيه ((لاتؤاجل عمل
اليوم الى الغد )) كنت اشوفها على الدفترمن برى ولا اعرف غيرها .
رجعت البيت اقول لي امي اعطيني مثل تقول ماعرف كانت اميه لاتقراء ولاتكتب
طنشت الموظوع لانه في اشياء اهم من هذه افلام كرتون والكوره الى
المغرب وبعدين العشاء نوم .
اليوم الثاني رجعت المدرسه وماني عارف كيف اتصرف ولقيت الحل
في التقويم , في الواجه للتقويم يكتبوا احيانا حكمه او مثل ويكتبوا احيانا
معلومه او هل تعلم .
اخذت اكتب اي شيء وسويت ككتيل حكم وامثال وهل تعلم وحديث ونصائح .
وكتبة 30 وحده تعرفوا لي السنه كلها , جاى دوري في الاذاعه , من الخوف
واشان افتك قريتها كلها في نفس واحد , انا الوحيد الى مر على الاذاعه
المدرسيه وقالوله ممكن تعيد , وعتها ولاكن بنفس الطريقه . هم مافهم
ماهو الموظوع بعد كذا ماطلعت وبطلوا يختاروني من اعجابهم في .


3 / كنت ماحب اكتب الواجب مثل ماذكرت لكم ولا اعرف اكتب الحروف
فكانت امي ترسلني عند جارتنا اشان تساعدني في حل الواحب
فكنت اجننها لاني ماعرف اكتب الحروف فكانت تخليني امسك المرسمة
باناملي الذهبيه الى تتلف بحرير وهي تمسك اصابعي والقلم معها كمان
وتكتب واشان لا اتعبها كنت ارخي يدي وكانها ليست مني واسيبها
تكتب وانا اتفرج على التلفزيون .

ولو جلست اكتب الى الصبح ماانتهت المواقف .

الى عنده موقف ممكن يقوله ومنكم نستفيد .


واعتذر للاطالة