شوفوا ايش حصل معي بعد الوظيفه

السلام عليكم ورحمة الله وبركاته
ابقولكم ايش صار معي ووجهوني

رحت لحرمه وقابلت اختها معلمه وقالت لي حوسه المهارات ماعرفت ادخل لها قلت لها هاتيه افعله لك ومابي الا الدعاء وجابت لابتوب اختها واعطتني الرقم وفعلته وقالت لي ان المعلمات يبغن احد يسوي لهن اوراق ويدخل لهن مهارات
وفرحت قلت كلميهن اشتغل وبعده بيومين اتصلت علي وقالت تعالي المديره تبغاك ورحت وقالت لي انتي هنا لحساب المعلمات فقط اما الاداريات كل واحده تقوم بمهامها قلت ان شاءالله
وبديت الشغل من اول يوم وجلست بغرفة الاداريات
صار كل واحده تقولي اطبعي اعملي وكنت اطبع واعمل لهن كل شي قلت اكيد يدفعن للاسف مادفعن لي ولا ريال لان كلامهن اني للمعلمات وبس ونسن فضلي
والله يابنات انكرفت كرف وشغل المهارات بالبيت اعملها مرا مكروفه وذبحني صداع دايم والمديره قويه ماترحم قالت لي تكامل مسؤليتك وتكافل كمان مع ان تكافل مع المرشده والمرشده ماتدفع لان ماعندها مواد تدخل مهاراتها والمديره تخاف من المرشده لانها متسلطه
وقلت للمديره كم مرا تدفع لي هي والوكيله لان تكامل المفروض الوكيله تعمله وقالت لي عجبك الشغل كملي ماعجبك الله يسهل لك
وانا محتاجه للوظيفه
وغير كذا اي كلمه اتحسس منها وفيني طبع طيبه زايده جدا ويعتبرنه ضعف مني
وكمان قالن لي قطي معنا قهوه وفطور وانا قهوه وشاهي اسويه مو مشكله بس فطور صعب الاداريات راتبهن 5 و6 الالف وانا 1500 واعطي السواق منها 500
وفطورهم متكلف جدا

ووالوظيفه غيرت حياتي مع زوجي اجي اسوي الغداء ويتغدا وينام وانا ارتب البيت واذاكر للاولاد ويصحي يخرج ولا اشوفه الا قبل النوم يجي وع جواله وادخل انام
مابيننا كلام ولا ضحك كاننا غرباء هاجرني بالفراش لمحت له كم مرا ويطنش محسسنني اني شغاله فقط وشاكه ان عنده جوال بالسياره وشاكه انه متزوج مسيار لان مافيه رجل ماعنده ظعف ويهجر مرته وكمان له 3 اسابيع كل اربعاء يحلق دقنه ويصبغ ويتروش ويخرج
قلبي محروق تعبت والله تعبت حاسه بنار بصدري خيانته لي وكلامه مع بنت تويتر مو قادره انساه
كرهته وكرهته العيش ابغا اكشفه ع حقيقته بس كل شي غامض حريص جدا انه مايوضح
والله مرا جيت المدرسه متروشه وقتها كذا مافيه شي صار والبنات يعلقن مادرن عن حالي
وكمان زوجي يقهر مايحترمني مايناديني باسمي والله مابغا دلعه بس اسم
مايقول الا خذي وووافعال امر بدون اسم
حتى بنتي قالت الابله سالتني ايش اسم امك لعشان وحدة اسرتي وتكتب اسمي واسم ابوها واخوانها بورقه ع شكل قلب وتعلقها ع صدرها برباط
ردت فعلي بنتي تضحك لما قلت وليه ماقلتي اسم ماما فلانه حسيت بنتي تضحك مو متعوده
انصحوني يابنات ايش اسوي بحالي اترك الوظيفه ولا كيف وايش اسوي بزوجي كيف اتعامل معه
وجزاكن الله خير
اسالكن ايش عقوبه الرجل اللي يهجر زوجته بالفراش والكلام