شوفوا قصتي لتحديد الجنس

السلام عليكم ورحمة الله وبركاتة
بقلكم قصتي باختصار لاني ودي افضفض ولا عندي الا انتم بعدالله ارتاح اقول كل اللي بخاطري يمكن علشان ماتعرفوني ولااعرفكم فماخذه راحتى بالكلام
انا ام لاربع بنات ربي يحفظهم ويرزقني برهم يارب جبت اول بنت وفرحت انا وزوجي كثير لسا بكرية والعمر قدامي وكانت ولادتي عمليه فتعبت بعدها لان بطني مشقوق والوضع جديد علي ومااقدر اشيل شي ثقيل
وحملت بعد سنتين وجبت البنت الثانية والكل كان نفسه يسمع كلمه اني جبت ولد لدرجه اني فالمستشفى ام زوجى قالتلي كلمه جرحتني فيها
بعدين رحت عند افضل دكتور فمنطقتي ودفعت اولووف كله علشان ابغى احمل بولد واتبعت حميه ومراجعات استمريت معاه تقريبا 3 شهور وتركته وربي ماارد اني احمل وطولت جلست سنتين ماحملت بعدها راجعت عند دكتوره كتبلي نولفادوكس وابره تفجيريه وحملت والحمدالله من اول شهر،،، سالتها فالشهر الثالث موباين والرابع قالتلي بنت والله اني فرحت بس شلت هم الناس والكلام اللي بسمعه وجات بنتي الله يحفظها
وبعدها كل وحده تقولي ان شاءالله الرابع ولد خلاص بنات لاعاد تجيبين كانه بكيفي ،، ويتعمدون قدامي اذا وحده جابت ولد يقولون فلانه جابت ولد يفخمون الكلمه واذا بنت يقولونها بشفقه وعليا جابت بنت ،،الله بنت ،،ومن هالكلمات
وحملت فبنتي الرابعه ونفس الكلام اسمعه ومطنشتهم والله اقولهم ربي كريم واهم شي الذريه الصالحه ماابين شوقي واشتياقي للولد اقلهم الولد فرحته بس عند ولادته اما بعدين نفس البنت كلهم صاروا يتوظفون وصاروا نفس الشي ..
بعد ولادتي بسنه راجعت عند دكتوره واستخدمت حميه وحبوب وابر وبرضه ربي مااراد اني احمل وكنت فتجمع ام الاشبال الله يجزاهم خير ،، بعدها جلست 4 سنوات بدون مانع ماحملت ،، قبل احمل بسته شهور سويت اشعه الصبغه بشوف سبب تاخري 5 سنوات بدون حمل طلعت سليمه ولله الحمد لان ولادتي عمليه قالو يمكن فيه التصاقات تمنع الحمل
قبل شهر من حملي كتبلي الدكتور على حبوب هرمون الحليب لانه مرتفع بشي قليل وكتبلي على حبوب للافرازات كانت معاي افرازات بكثره وسويت حجامه بارده
تاخرت الدوره شهر و3 اسابيع ماشكيت اني حامل لاني فالعاده تتاخر من يومين الى اسبوعين لكن اللي شككني استفراغ بكثره وتوقعته الم فالمعده لانه دايم يجيني
طلبت زوجي تحليل وحللت وطلعت خطين واضحين ولله الحمد ،، سبحان الله حصل هذاك الشي 😁😊اليوم 6 و7 و 8 من الدوره ثم جلست اسبوعين ماوصلني الا فاليوم 22 و24 و27 من الدوره ،،عاد ماادري اي يوم حملت فيهم بس متذكره هالايام اللي حصل فيها ،، رحت المستشفى قالتلي انتي في 7 اسابيع حامل فرحت وبدا موال معرفه الجنس
من حملت وادعي ربي ليل ونهار وعصر الجمعه انه يرزقني الولد الذكر السليم المعافى
احساسي بنت
وحامي نفس حملي السابق الا اللهم الاستفراغ كان بكثره حتى الحبوب ماتنفع وجلس للشهر الخامس
سويت الجدول الصيني بنت
لون البول برتقالي يعني بنت
تجربه الملفوف بنت لونه كان غامق جدا
تجربه البيكربونات مره بنت ومره ولد
العضوه رنا هنا قالتلي بتجيبين ولد
وحده فالاستقرام قالتلي ولد
رحت المستشفى فالشهر الثالث موباين
فالشهر الرابع ثاني رجله يعني ماكان باين
الشهر الخامس قلي الدكتور انه فبطني
















ولد💙
سالته وانا ابكي متاكد يادكتور قلي ايوه شوفي ويوريني العضو قلتله كم النسبه قلي 80 فالميه
حضنتني الممرضه وباركتلي وانا ماني مستوعبه
اللهم لك الحمد حتى ترضى ولك الحمد بعد الرضا وللك الحمد اذا رضيت
جيت على طول بشرت بنات تجمعي الله يجزاهم خير اللي كانوا يدعولي وبدعواتهم احس بفرحه الله يسعدهم ويرزقهم باللي يتمنونه
يارب يتاكد فالمراجعه الجايه وافرح بولدي باذن الله
ابغاكم تدعولي ان ربي يتمم حملي على خير واشوف ولدي بصحه وسلامه وعافيه ويرزقني بااخوان له ان شاءالله
انا قلتلكم بكتب القصه باختصار لكن يدي موراضيه توقف عن الكتابه فسامحوني ❤❤