شوفوا قصتي مع زوجة أخو زوجي ومناقرها بالواتس/ قديم

يابنات هذي زوجة أخو زوجي حاطه نقرها من نقري  وألحين مشتغلة لي عالواتس سب وكلام أنو الأسد بيضلوا أسد والكلب بيضلوا كلب ، واللي مو متربي واللي أصله مدري إيش ( مع العلم إني قبيلتي أعرق من قبيلتهم بكثيييييييير بس والله ما أحاول أتعرض لهم من الناحية هذي لأنها نتنة ،  في البداية انفعلت وكنت أعلق وأرد عليها بس مو زي عبارتها كنت أكتب أنا اللي يمثل مصيره ينكشف وبعض الناس ظاهرهم غير عن اللي يخفون بصدورهم ومن هالكلام . الآن هي بتتكلم اللي مو متربي واللي مو أصل محتاره هل أرد عليها ولا لا وش أرد ؟؟ مع العلم زوجها وأخوان زوجي وأخواته وجيراننا كلهم عندهم واتس وإحنا بنظهر لهم وبيشوفوا تحديثاتنا ويعرفون وش اللي بيننا إيش رايكم ؟ وعشان تعرفوا اللي بيننا كان لها مواقف معي من أول ماتزوجنا تتدخل بخصوصياتي وتسأل عن أدق خصوصياتي مع زوجي وكنت على النية أجاوبها 
بس بعدين ماعاد قدرت تخبي غيرتها أكثر خاصة بعد ماجتني وظيفة وجاني إبتعاث داخلي صارت من تشوفني كنها شايفة ملك الموت تنكتم وماعاد تتكلم وتسكت مع العلم طبعها ثرثارة جدا 
بعدين تعبت يومين وأهل زوجي عرفوا لما زرتهم سلموا علي وتحمدوا بالسلامة هي جتني مدت يدها وسلمت ولا نطقت بحرف واحد سكت أنا وانفردت بأم زوجي وسألت سؤال هل هذا أسلوب فلانة معكم على طول ولا بس يوم أجي تسكت ؟ هل مريضة عندها مشاكل شئ مدري عنه قالت لي دام سألتي هي جتني من أول وتشكي علي منك تقول إنك ماتسلمين عليها إلا من طرف خشمك ومنتي شايفتها شئ ومن هالكلام وطلعت سوالف بااااايخة بس زادت عليها بهااااارات وطلعتني أنا أغار علي زوجي منها ( مع العلم أبوها كان عارضها على زوجي وزوجي رفضها ) أنا ماتمالكت نفسي وبكيت متعودة ببيت أهلي عالإحترام والطيبة أتفاجأ بكل هالأشياء بعدين جينا بمجلس حريم دخلت أسلم قاموا وسلمت عليهم هي ماقامت مع ذالك مديت يدي لها وهي قاعدة وسلمت بعدها تكررت هالحركة مرتين احتقرت نفسي وقلت ماعاد بقوم لها وفعلا ماقمت لها  ومدت يدها غبت فترة شهر ورجعت من السفر جينا نسلم مع أهل زوجي سلمت عليهم قدامي وأنا ورى ماسلمت علي بعدها حلفت ماعاد أعبرها ولا أسلم عليها وجيتهم بعدها وأم زوجي واقفة سلمت عليها وهي مقابلتها ما ألتفت لها ولا عبرتها هي ماملكت نفسها وطلعت قلت لأم زوجي تري مو طبعي كذا بس هي  اللي ماتسلم علي فأريحها من سلامي مرة وحدة  قالت لي انو أبو زوجي ملاحظ التتش اللي بينكم وهو حيتدخل بنفسه بينكم 
أعذروني عالإطالة بس ماعندي أحد أفضفض له غيركم علي فكرة لنا على هالحال فوق ست شهور ترى هي من سني وتزوجنا قريب  وهي قريبة أهل زوجي من جهة أبو زوجي وأنا لا من قبيلة ثانية أنا حساسة مرة وما أعرف أتصرف   ولا أعرف لكيد الحريم وحركاتهم وهي دحلوسه كبيرة وشطارتها بلسانها وأنا بالطبع الخجول اللي فيني رسمية مع أهل زوجي وهي لا مسوية ميانة بزيادة لأن بيعرفوا بعض من أول وهي بتزيد ميانتها وأربع عشرين ساعة عندهم عكسي بحب أجلس ببيتي الإ إذا كلموني رحت ، مع العلم أنا أجمل وأكشخ منها بكثير ، أخاف تلفق علي كلام  ، أو هم يوقفون معها بحكم القرابة والخوف من أهلها مع العلم الفترة هذي الأخيرة انا ملاحظة أبو زوجي نفسه شينة علي مدري ؟ طبعه يحترمني مرررة ويسأل عن أهلي هالفترة لا .. وللمعلومية الجميع يعرفون زوجي يحبني ماشاء الله ( فهالنقطة هي اللي أحيانا تشعل غيرة أهل زوجي بعد) مالي بعد الله سبحانه الإ أنتم ومشورتكم ، الله يحفظني ويحفظ علي بيتي وزوجي ويكفيني شرهم وكل من أراد بي الشر .. والله أحس بضغوط مررررة بيت ومسؤليات وحمولة ووظيفة ودراسة وغربة عن الأهل ومشاكل بعد وربي اللي يتولاني برحمته أكتب لكم ودموعي تسيل حسبي الله ونعم الوكيل   ردو علي مشكلتي وردوا هل أرد عليها عالواتس ولا لا ؟ ووش أكتب ؟