نصيحه امك لاتدري من مصلحتك ومصلحة الجميع
مصلحتك لانها تعتبر نميمه والجنه مايدخلها نمام ...وكل من نقل لكم كلام زوجة اخوك فعله داخل في النميمه وهم سبب الافساد بينكم فلا تسوين زيهم وتفسدين بينها وبين امك ...عودي نفسك تسكتين اي حاد يبغى ينقل لك كلام ....واذا قلتي بيوصلها الكلام اقول لك خليه يوصلها من دون مابكون الاثم عليك ... لايلعب عليك الشيطان ويقول هذي امك كيف ماتعرف ...بالعكس امي مااحزنها بكلام الناس وامي ما املا قلبها كره لاحد يمكن يدفعها الكره للغيبه

تخيلي قلتي لها ووضعها الصحي مايسمح لها بالتعب النفسي بالعكس لو انا مكانك باحاول امي ماتعرف واذا وصلها الكلام باهونه واشككها فيه
اسعي بكل ماتقدرين انكم تكونون اسره متحابه ومتسامحه وواضح من ردودك ان هذا الشي سهل عليك
وزوجة اخوك ارسلي لها رساله حلللللوه بدون عتب التمسي فيها العذر لامك قلي امي ماقصدت تجرحك وهي تحبك ودايم تمدحك وتشوفك بنتها لا تسمحين للشيطان يدخل بيننا ...صدقيني بحسن الخلق والطيبه هي بتحبك وتعاملك اكثرمن الاخت
صحيح كلام امك بالنسبه لعمرهاوالزمن الي عاشت فيه تعتبر عاديه جدا لكن بالنسبه لانسانه باقي ماحملت ويجي من ام زوجها وفي زمن اكثر البنات حساسات تعتبرها تقصد شي ....اما كلامها عن اسم ابوك واضح انها وقتها كانت زعلانه من كلام امك فحبت تنتصر لنفسها يعني مجرد لحظة غضب بس ...وواضح انها ماودها بالمشاكل لانها قعدت تفكر وتستشير امها وزوجها كيف تفتح الموضوع بدون ما تنقص من حقها اوتظلم احد ....وامها جزاها الله خير نصيحتهاكانت رائعه دورت على انسانه حكيمه تناقش بنتها

اماتغير اخوكم عليكم فهو المسؤول مالها ذنب لو فرضنا انها تحرضه عليكم او تملا وقته بنيه انه مايفضى لكم او تكسله او تسبكم عنده الخ ...كيف هو يرضى في اهله ويصدق ؟؟؟؟ ويين شخصيته كرجل في تعديل سلوك زوجته او نصحها او اخذها بالين ويحببها في اهله ؟؟؟؟ وليش مايعطي كل ذي حق حقه ؟؟؟

اذا كان اخوك مايقصر عليكم في الزيارات ويتفقد احوالكم نصيحه لاتضغطون عليه ولا تشتكون له من زوجته وتخلونه بين نارين .....

اما انك كنتي تتمنينها اخت اسال الله ان يألف بين قلوبكم ولايجعل الشيطان ينزغ بينكم ....لكن مادام شخصيتها بعيده عن شخصيتك لاتطالبينها تكون لك اخت هذا الشي يبغى له وقت طويل ومع الوقت والتعامل الطيب منك باذن الله تكون اكثر من الاخت لك ...واذا مالقيتي فيها صفات الاخت مايمنع ان الاحترام يكون موجود

اما الزيارت فشي طبيعي تكون عند اهلها اكثر ...والي تسويه في قله الزيارات لكم وقصرها صدقيني هذا لمصلحة الطرفين ترى مافي احلا من الرسميه اكثر احترام وابعد عن المشاكل حتى لو كلا الطرفين اخلاقهم رائعه لان مافي ناس عايشين على طول مع بعض مايكون فيه مشاكلهذا حال الدنيا ... ولاتمنع الرسميه من الابتسامه والكلام الطيب والرسايل الحلوه بين فتره وفتره... ..وشكل امك تحبها وتحب تحضر معها في كل مكان انتي قلي لها في الرساله امي تحبك وتفتخر بك قدام الناس في نفس الوقت حسسي امك ان لو ماجت معنا احسن هي تاخذ راحتها واحنا ناخذ راحتنا علشان ماتظغط عليها

اما ضيافتها فاغلب الناس ماعاد تطبخ كله من برا ويمكن هي من النوع الي مايحب الشغل وهذا يختلف من بنت لبنت واذا زوجها راضي بوضعه معها خلاص الحمدلله ...واغلب الامهات الله يحفظهم يحبون يشوفون زوجات اولادهم نشيطات في بيوتهم ويفتخرون بهم بس انتي ساعدي امك ماتعطي الموضوع اكبر من حجمه وامدحيها عند امك

اخرشي اقول لك الله يهديك صدمتك من الي صار خلاك تذكرينها بما تكره وهذي غيبه حتى لو مجرد فضفضه ماتجوز نصيحه لاتفرطين في حسناتك لاحد واعملي لاخرتك ...ترى انتي وامك وزوجة اخوك طيبات وبإمكانكم تضربون اروع مثل للعائله المتحابه لكن الشيطان مايرضيه هذا الشي ...اعتذر اني طولت

الله لايجعل الشيطان ينزغ بينكم ويألف بين قلوبكم يلا ياقمر روحي اكتب الرساله لزوجة اخوك ونقي احلا العبارات وبدون عتب وانا متاكده باذن الله انك باسلوبك واخلاقك بعد توفيق الله راح توصلين للصلح بين الجميع

المفروض اخوك اللي يوقفها عند حدها

مهما كان عيب تتلاسن وترد على ام زوجها وهذي في حسبة امها

الله يعينكم عليها

بصراحه انتي وامك ملاقيف وش عليكم من الحرمه سمنت والا نحفت وغير كذا موضوع الحمل مالكم اي حق تتدخلون فيه هذا الشي خاص فيها هي وزوجها

الله اكبر

بعض الامهات نيتها طيبه ماقصدها شي تسولف عادي وهي ما قصدها الا الخير ..وبصراحة بعض حريم الاخوان ماتنبلع وربي ماتنبلع تلاقينها اذا ماسوت مشكله ماترتاح تلاقين فيها قلق ماهي مرتاحة .. تزعل وتنقهر من اي شي تحسين ماهي واثقه من نفسها تزعل من اي شي وبعدين لو اني مكانك يوم اتصلت كان حطيت الجوال على السبيكر وجلست جنب امي وخليتها تتكلم على راحتها وامي تسمع وبعدين مو كل مره اذا جيتوا تطلعون تاخذونها معكم وخاصة انها من النوع اللي تزعل وتدقق بكل كلمه تقولها امك اذا بتاخذونها كل ماطلعتوا بتقعد بس تختلق المشاكل ليه امك قالت وليه وليه احسن اتركوها..وبعدين تفاهمي معاها قبل ماتاخذونها معاكم اذا انجبرتوا تاخذونها قوليلها امي على نياتها ماقصدها شي بس انتي كبرتي السالفه وقوليها اذا بتروحين معانا لاتقعدين تدققين بكل كلمه تقولها امي قولي ترى امي ماتقصد شي يعني نبهيها واذا اجتمعتوا خلي امك لاتتكلم فيها ولاتجيب طاريها بالجلسه ابدا؛؛؛ وسبحان الله بعض الحريم لو ماجبتي طاريها بالمجلس ولا سولفتي معاها تبدا تهلوس وتختلق مشاكل خخخخخ عجيبات ياحريم