شوفوا كيف تسعى لخراب بيت زوجة اخوها

أنا متزوجه من اربع سنوات ومرتاحه مع زوجي وهو مرتاح جدا معي .. نسافر ونطلع وحياتنا مافي احلامنها الا اني مارزقني الله بالذريه وبديت اتعالج ومتامله خير زوجي ابدا مازعل ولا شال هم يقول انتي تكفيني عن كل شي .. لكن اهله ماخلونا بحالنا وخاصة اخته دايم ترمي علي كلام يحزن وكل ماشافتنا نضحك ومستانسين ذكرتنا بسالفة الحمل ونكدت علينا .. احس انها تغار مني وتغار من دلاله لي وبعد ماسكنا فلتنا زاد شرها وصارت اذا شافتني ماتسلم علي او تحقرني ماتكلم معي ..واشتغل الحسد والغيره وكثرت مكالماتها لزوجي وتعزمه على القهوه وحتى زوجي تغير علي حسيت ان فيه شي بينهم . اوجعني قلبي وصرت ادور اي شي اي دليل ابي اعرف وش عندهم وقررت افتش جوال زوجي وفي يوم من الايام جاء زوجي من الشغل تغدا ونام واروح ركض على جواله لكن لقيته حاط رمز على الجوال وزاد خوفي من اخذته ماكان يقفل جواله عني واقسمت لا افتحه 😭 ماخليت رقم ماجربته وجلست يومين احاول افتحه ماقدرت واجرب كل رقم مهم بحياتنا تاريخ او رقم جوال او رقم ملفنا حق المستوصف كلها غلط لين جربت رقم بيتنا وفعلا ظبط معي وفتح وافتش فيه رحت للواتس والقى محادثاته مع اخته واخته كل المحادثه تحرضه يتزوج علي وهو يقولها اصبري خل اشوف العلاج يمكن تحمل وهي تقوله راح عمرك معها والي مثلك عنده عيال بالمدارس وهو يقولها بجرب هالمره ان مانفع العلاج اقولك اخطبيلي 😕 وصرت كل يوم اذا نام افتح الجوال واشوف وش يقولون لين لقيتها مرسلتله صورة وحده مزيونه تقوله وش رايك بهالقمر هذي فلانه بنت فلان وهو يقول وش هالزين ايه ابيها بس فلانه يقصدني وهي تقوله خلها تولي ويتفقون انها تخطبها له بالاجازه اذا سافرت لهلي عشان يتملك وانا هناك 😭 انا ارسلت صورة البنت على جوالي وقفلت الجوال وجلست ابكي من القهر وجسمي كله يرجف واول ماصحى على طول غسلت وجهي ما ابيه يعرف اني دريت لين اشوفلي حل اخاف يركض يخطبها اذ شافني كشفته واحاول اكون طبيعيه وانا من داخلي نار تحرقني المهم مانمت كل الليل افكر وش اسوي لين طلع الفجر وانا صاحيه جاني قلق ومخي كأن في
‎ناس تتكلم صليت واخذتلي حبتين مسكن ونمت
‎صحيت الساعه تسعه ورجعلي الخوف والقلق كلمته قلت انا تعبانه تعال قال طيب وجا بسرعه وهو خايف علي قالي انتي من امس وانتي فيكي شي وش السالفه وانا انهار وابكي قالي وش فيك مسكت نفسي وقلت مافيني شي بس ودي اجيبلك ولد ودي افرحك بس هذا شي مو بيدي قالي خلاص مابي عيال انتي اغلى عندي من العيال حس اني عارفه شي بس ما سالني .. بعدها بكم يوم اخذت جواله وشفت محادثاته مع اخته وهو يقولها اجلي الموضوع الحرمه تعبانه مابي انكد عليها زياده وهي تقوله لا مافيه تاجيل على كلامنا اول الاجازه ودها لهلها ونخطب البنت وتملك على طول قبل تعرف وهذا شرع الله وهذا حلال وانت ماقصرت صبرت عليها اربع سنين وتقنعه ..بالزواج هنا تاكدت ان هالادميه ماراح تفك عنه وانا ادور في الاسماء واطلع رقم زوجها وارسله من جوالي رد علي وعرفته بنفسي انا فلانه سلم علي وقالي امري اي خدمه قلتله ابرسلك صوره وارسله صورة العروس هو صنم شوي بعدين اتصل الو هذي مين هذي انتي قلت لا هذي فلانه بنت فلان قال والله قمر البنت بس ليش ارسلتيها لي ؟؟ عاد انا خابره زوجها على جريف مع الحريم وعنده دراهم .. قلت والله ابيك تخطبها قالي ليش قلت بس ابيلك الخير قال افكر واردلك قلت اسمع هذا بيني وبينك لاكلمتك ولا ارسلتلك شي ..قال تم ما ابي اطول عليكم السالفه الحاصل انه راح وخطبها وهم بعد اهل البنت وافقو عليه لانه غني وتزوجها وحط لها عرس ومن يومها واخت زوجي شاقيه فيه هو وحرمته وافتكيت منها وزوجي رجع معي مثل الاول واحسن وانا حملت وربي لك الحمد .. طبعا اخت زوجي تاكلها الحسره كل ماشافتني وتقولي سامحيني انا ظلمتك وربي عاقبني .. حاولت اختصر لكم السالفه والا فيها تفاصيل كثيره ماذكرتها ..منقول