شوفوا من طلعت جارتي !!! / قديم

السلام عليكم ورحمة الله وبركاته.

قبل لا أبدأ ××× و ×××× في موضوعي .وكل وحده ماعندها ذوق وماتعرف تتكلم .
بدخل باالموضوع لان جدا متضايقه ومهمومه شي ماتوقعت ومحد حاس بمشاعري حتى هلي .
أعطيكم نبذه بسيطة حتى تكون الصورة واضحة يوم تزوجت طلبت يكون بيتي بعيد عن عائلته وله صاحب انهى بيته في جنوب المنطقه حي جديد ماحولنا أحد الا عماير بعيدة مره ولا زفلت ولاشي يعني لو اطلع الشارع واصرخ محد درى عني .وهلي في شمال المنطقه بعد حي جديد بس كل الخدمات عندهم ومزفلت وكل شي لكن بيتي باالجنوب وهلي بشمال بعيدين ومشوار المهم ان مافيه أحد سكن العمارة غيرنا وانا بدور الارضي وقمت بختيار أثاثي بنفسي وخترت البويا والسراميك حتى الابواب والثريا وكل شي لان صاحب العمارة صاحب زوجي واتفقوا ع ان التكاليف اللي يدفعها تحسب من الاجار المهم حتى الحوش خليتهم يزرعونه وصلحت مطبخ خارجي ..الخ يعني تعبنا ماديا ع الشقه وكل شي بذوقي (ذكرت هذا الكلام حتى تعرفون ليش صعب اغير الشقه او ننقل منها) المهم اني وقت ماهو عند زوجته انا اكون عند هلي وبياخذني بعده من الشمال للجنوب وذكر لي انه مشوار ويوم يروح كله ذهاب وأياب بس من بيته لبيتي موذاك المشوار بس هلي أبعد .وأنا ماعندي مشكله لان الشقق الباقيه منتهي اللي في العمارة بس محد سكنها غير اني أخاف اجلس لوحدي أصوات الكلاب تكرمون في الحي والعمال باالعماير وماحولي أحد المهم هوكان معي بمخاوفي .ومن يوم سكن جارنا اللي جنبنا زوجي فرح وبشرني واستانست أقلها اجلس في بيتي وعندي جيران اتونس بصوتهم المهم تعرفت عليها وعندها بنتوته وزوجي وصئ زوجها علي ومرت الايام متونسات مع بعض وفجاء سافرت لاهلها وفهمت انها متهاوشه مع زوجها وهو في البيت .(الله يهديهم ويرجعون لبعض)
الحين الوضع صار صعب أكثر رجال في العماره لحاله وانا لحالي خاصه في غياب زوجي .فرجعنا لنفس المعناة اروح لهلي وزوجي بعد يخاف علي خاصه ان فيه عماره بنيت قريبه منا وعمال والوضع صعب .
المهم وذاك اليوم قال لي فيه ناس سكنوا الشقه اللي فوقنا شفتهم ينزلون أثاث وكذا استانست وماقصرت زوجته نزلت تعرفت علي وهي مدرسة أبتدائيه وعندها بنت المهم قمت بواجبها لمدة 3 أيام قهوتها وشاهيها ارسلها لها وهذا طبعنا الادميه ارتاحت لي وتجيني وتتونس عندي .ونسولف المهم أخذت علي بسرعه وبدأت تشكي من زوجها مثل كل موظفه والراتب ..الخ وماعندي الا اصبرها وكذا يعني توني متعرفه عليها ماابي ادخل بمشاكلها وهمومها وسالتني عن شريكتي( وقلت ماعلينا) بس ماحبيتها تتعمق لاني اصلا مااعرف شريكتي ولا ابي احد يسأل عن خصوصياتنا اكتفي برد بان حياتنا مستقره وكلنا سعيدات مع زوجي وبس .لان غالب الحريم ع بالهن كل حياة المعددين صراعات وهي تبي تسمع وقلت لها الكلمتين وسكتها .لكن بدأت تشكي من زوجها وكيف انه مايصرف وراتبها وصرافتها معه وكيف عله أمه ...الخ وماعندي الاتصبير والله يعينك.》》 وحمد الله ان هذا كان ردي عليها
لانها مكتومه فشت بسرعه واحنا تونا نتعرف .الى هنا الموضوع تمام . قالت ان الشقه اللي مقابلتها بتسكنها أخت زوجها وهي زوجه 2 نقلت من بيتها بسبت مشاكل الاولى معها وبتسكن قريب من أخوها اللي زوجها وأبدت لي كرهها لهم خاصة أن عمتها مع بنتها وماهتميت لاني بعتبرها جاره وماعلي من اللي بينهم . وبعدها سافرنا انا وزوجي يومين لجده ورجعنا يوم رجعنا حصلنا السيارات كثرانه عند البيت وعرفت ان حماتها سكنت وستانس زوجي واستانست . فجأة دق باب بيتي وفتحت وحصلت حرمة وأمها اللي هي حمات جارتي وأمها .
تدرون مين طلعن الحرمه أم طليقي وبنتها !!!
المصيبه انهن عارفات اني صاحبة البيت وجايبات هدايا مواعين أنا من هول الصدمه رحت للمطبخ مدري وش اضيف ولا وش اسوي .ورجعت وجلست معهن وانتهت الجلسه بسرعه وعرفت ان مرت ولدهم تصير زوجة طليقي .المهم صابتني ضيقه فضيعه وجلست أبكي ليش ماادري ماابغاهم ولا أبي يسكنون حولي .
ومن برادت الوجه أمه جايتني بعد كل كلمه قالتها فيني .وأخته للامانه ماجاني منها شي ..بس ضاقت فيني وش هاالنشبه هذي لاتسالوني كيف سكنوا وكيف عرفوا اني في هذي العمارة لاني ماادري والزيارة كانت قصيره لان امه بس تسال عن زوجي وشريكتي وكل شي أقول مدري مدري مدري من الصدمه المهم بعد مابكيت وشبعت بكي توضيت وصليت ركعتين واتصلت ع أمي وقلت لها
أمي تقول عادي ولا كانك كنتي تعرفينهم اذا جوكي ابتسمي وقومي بحسن الضيافة ولا تسالينهم عن شي ولا تعطينهم اي علم . وانا ماابيهم ولا أبي وجودهم في العمارة وصعب أنا وزوجي ننقل منها ..
زوجي ماقلت له وماأدري أيش بتكون ردة فعله .
بنسبه لي متضايقه وتذكرت كل حركاتهم وسوالفهم فيني ...
المهم ماقلت لزوجي عن زيارة الجارة الجديده ولا شي وزوجة طليقي ماشفتها .أكثر من مره يعزمني واعتذر .
زوجي عازم أصحابه وانا عزمت زوجاتهم وعملنا وليمه وتعرفون البيت اللي يكون فيه عزيمه يبان
المهم ماعزمتهم وبعدها عزمت صحباتي وماعزمتهم
أتفجأت في أمه مسيرة ع أمي وجدتي وتقول بنتها مستحاشه واني مااعزمها ع عزايمي ولا اجيها ودايم أعتذر .حتى اذا تبي تسير علي اعتذر منها..الخ
جدتي وأمي قايمات علي يقولن لي أنتن في مقطعه مالكن غير بعض وليش مانتزاور .
وانا اذكرهم بكل كلمة نقالت فيني وهن عارفات اذا هم نسوا انا مستحيل أنسى شي وزعلانه جدتي مني يبغوني انسى واصفي النيه لدرجة امي واخواتي يوم زاروني امي قالت قولي لهن يجن قلت ماعندي ارقامهن وامي هي اللي طلعت لاخت طليقي وكانت جايبه لها هدايا .وعزمتها عندي ع العشاء لانهن سهرنات عندي وشرفت هي وأمها ولا كانهم أذوني ولا شي يضحكن ويسولفن مع أمي واي سؤال موجه لي اتجاهله ولا كاني سمعت وجدا اعاملهم برسمية وتكشيرة .
أمي بعد ماروحن قومت الدنيا علي وقالت لي خلاص انتي متزوجة أحسن من ولدهم ومن ناس طيبه وش فيها لو ضحكتي بوجهم وريتهم انك سعيدة من بعد حياة الشقى وين كنتي وين صرتي واللي راح راح .
ومن هذا الكلام !
وش رايكم في الموضوع خاصة ان قلبي مليان .