شوفوا نهاية زوجي الظالم ... لكل من تعاني من زوجها

السلام عليكم
صلوا ع النبي ❣
اخواتي في الله .. حابه اطمن كل مظلومه ومقهوره انه عاجلا او آجلا ربي بياخذ لك حقك من اللي ظلمك ...
وأعظم قهر هو قهر الرجال
اشتكيت من زوجي كم مره في هالمنتدى
زوجي يضرب يسب بأوصخ الكلمات يدعي علي يلعن امي وابوي يقذف الله لا يسامحه


هو سيء ، وانا طيبه جداً جداً حتى الحشره ما احب أأذيهاً، بس لما زوجي يغلط علي ما اسكت واعلم اهلي او اهله وهالشي يخليه يزيد في سوءه معي لأنه مبدأه الوحده تصبر حتى لو انضربت وانهانت وتحتوي زوجها وتحترمه يعني يبغاني ضعيفة شخصيه


ياكم ضربني ونمت الليل وانا ابكي ، اهلي بعيدين عني والا كان رحت لهم بس انجبر ادخل غرفتي وابكي .. واطلبه اني اروح لأهلي لأنك مديت يدي علي ويرفض
ياكم فرشت سجادتي ودعيت من قلبي بس ماكنت اشوف استجابه لدعائي . والله بديت ايأس بس اتعوذ من الشيطان .. مرت سنين على هالحال وانا ادعي وزوجي مايصير له شي ..
لين مره ضربني واليوم الثاني حصل قزاز سيارته مكسور كانت محاولة سرقه
ومره ثانيه ضربني واليوم الثاني انكبت دبة المويه على لاب توبه واخترب


وهو في داخله يدري ان هذا تنبيه من ربي واقول له هالكلام بس مافي فايده هو معقد ويحب يضرب ومتربي ع الضرب من يومه صغير


مرت سنين وجاء يوم وضربني بقوه وسبني وانا تعبت مرره صرت ادعي عليه حسبي الله ونعم الوكيل الله لا يسامحك وكررتها كثيررر


والله العظيم اليوم الثاني على طول طلع من البيت وتأخر ورجع جسمه كله جروح ووصخ قال تضاربت مع شباب ورايح الشرطه الحين بس بابدل ملابسي بدلها وطلع ورجع اخر الليل مو قادر يمشي زين طاح على ركبته في المضاربه ويعرج منها ايدينه كلها مخوش ودم اقسم بالله ما اكذب عليكم
انا في داخلي مصدومه من منظره وحزنني لأنه كان لحاله ضد مجموعه بس بداخلي وربي فرحة نصر عظييييمه ومستعجبه ياربي لك الحمد اخذت بحقي منه واضعفته زي ما استضعفني عنده


بس والله من طيبتي مابينت له شي وجلست حوله واواسيه بس تدرون وش قال لي ! قال هذا نصرك الحين انتي شفيتي غليلك
واليوم الثاني عاد نفس كلامه يقول هذا من دعاويك ويضحك ابتسمت انا وقلت ايه ماحبيت اجرحه واتشمت فيه


طبعا بعدها باسبوعين حصلت مشكله ورجع ضربني بس مو بقوه وقتها قلت له ماكفاك عقاب ربي عليك اول تبي مره ثانيه يجون الشباب يضربونك عصب وقام يسب بس اني طنشته ورحت اتحسب عليه


هذي معاناتي بإختصار والحياه يوم لك ويوم عليك لأنه البعض ممكن تقول ليش عايشه معاه انا عايشه عشان عندي اطفال منه وكم مره افكر بالانفصال ورحت لأهلي بس يوعدني انه يتغير وارجع له والله يكتب لي ولكم مافيه الخير