شوفوا وش تسوي ابي نصايحكم حبيباتي 😥

السلام عليكم
اسمحوا لي افضفض لكم .. عندي شغاله فلبينيه صار لها تقريبا شهرين .. انا طيبه كثير معاها وماقدر احرجها خاصه انها كبيره عمرها في اواخر الثلاثينيات لكن بعد هذا ضغط على نفسي .. اولا اذا جينا بنطلع اعطيها خبر اقول لها يالله روحي البسي عباتك فتروح غرفتها تطووول تعدل نفسها ترسم حواجبها وتحط كحل خفيف عشان لا الاحظ (للعلم من اول ماجت قلت لها ممنوع مكياج ) وهي بعد تحف حواجبها وتغير ملابسها وتنزل لي كأنها اميره شنطتها على جنب وتتمخطر بشويش تتحرك وانا وزحمتي مع اولادي وعندي شنطتي وشنطة بنتي الصغيره الا فيها اغراضها ويالله تتحرك وبعد لما اوصل المجمع مثلا على طوول ترمي الشنطه الا حقت بنتي الا فيها اغراضها من حليب و.... الخ. ماشوفها الا راميتها عندي في العربه ( الا فيها بنتي ) وتخيلوا رمي من غير ترتيب وبس نشتري شي ماتمسك الا ترمي وتزاحم في العربه وتمشي لي فاضية اليدين وانا شنطتي على كتفي وبنتي الثانيه تدف العربه وهي حتى اذا شرت لها بعد اكل تجي وتضغط في العربه وقد ماتقدر تزاحمنا الصراحه شغالاتي الا قبل يدورون راحتي اول شي تقولي مدام حطي شنطتك واكياسي تمسكهم هذي لاااااا كل همها راحتها .. ومره قالت لها بنتي الكبيره شيلي هذا من العربه مسكيه الا قلبت وجهها طول الوقت كأن اهناها مع اني شنطتي عندي وبنتي كذالك وبنتي الثانيه اغراضها تمسكهم .. هذا الا يصير اذا طلعت .. اما في البيت فهي بس يجي زوجي ونجهز لجلستنا (في الليل )اولادي ينامون واجهز الشاي وبعض الاشياء ونحط فيلم ماشوفها الا ورانا تشاهد وكل مره يجلس زوجي معاي في الصاله تنخش ورانا تشاهد لعلم ان تفصيل هالصاله مع الكنب بحيث عاطيه ظهري للبيت كله لان الكنب والصاله كذا تفصيلها لو بجلس فيها ممكن مانتبه الا وراي الا لما الف نفسي او اوقف اشوف .. وحتى اقول لها روحي نامي ماترضى وزوجي يقول ماترضى تضل معانا لييين ينتهي الفيلم الا زوجي يجيبه مخصوص لنا وبعد ماينتهي تقول لنا قد نايت وتركب.. وانا طول جلستنا احس انا مراقبين واحساس مرره كريه مافيه اي خصوصيه .. الا قبل الشغالا صحيح فيهم عيوب لكن في هالنقط يخجلون بس يشوفونا مع زوجي تبتعد تخلص شغلها بعيد عنا والله بعضهم حتى لو صديقه تزورني تستحي تكون معانا .. للعلم اني مامنع ابدا من مشاهدة التلفزيون لكن في وجود زوجي بالنسبه لي عيب تجاوز هالشي انا حتى اولادي انومهم عشان نشاهد ويا بعض ونسولف.. وللعلم اني فقط اعطيها اوامر من غير تجريح ولاتسمع وكثير متجاوزه حدودها .. لما تمشي عادي ببرود وتمسك لبسها على جنب ترفعه يعني ودايم تمشي بهالطريقه يعني ماسكه لبسها على جنب او حتى باليدين وبهالشكل ترص لبسها وتخصره على جسمها يعني شكل دلع وكل شوي تحوس في سروالها يعني ترفعه وبكذا يبان جسمها الا ورا فهمتوا علي 😕 يعني اذا بتمسك سروالها من عند بطنها كذا رفعت القميص وخصرت جسمها وهالحركه كثيير تسويها قدام زوجي .. هي مسيحيه فهل عادي عندهم هالاشياء يعني والا عن قصد تسويها ؟ اسمع المسيحين كل شي عندهم عاادي لانها اذا دخلت الحمام ماتسكره اول ماجات ووقت نومها تفسخ ملابسها بس تخلي الداخليه وكلمتهاقالت لي بس بتلبس شورت وقميص قصير .. يعني ياريت تفهموني هل هم كذا طبعهم والا هذي فيها بلا ؟ من قبل نامت في غرفتها من غير ملابس نهااائي بس اللبس الداخلي على كلام شغالتي الثانيه.. وكلمتها قالت الظاهرراحت عليها نومه كانت بتغسل ملابسها.. وبعد مش حنونه على الاطفال انا هالشي ممكن شوي اتغاضى لان اولادي مسؤوليتي بالدرجه الاولى لكن اكثر من مره يشكي ولدي الصغير ان اذا بتاخذ شي منه تمسك يده بقووه،، ومره تركته عند أمي والشغاله معاهم تقولي أمي عورت يده سحبت منه مادري وشو كان ماسك وتقول أمي تعورت يده صارت حمرا منها .. وغير ان شكلها غير مريح بس اقول مكن اني غلطانه.. حتى أمي تنصحني نشوف حل ان ماخليها عندي .. للعلم بان شكلها جدا تتحسس من اي كلمه يعني اذا طلعت معاي لازم تمشي من غير شي وتبي تنبسط بطلعتها يعني تواجدها مو لراحتنا .. وغير طلباتها بين فترات ،، ابي رايكم بكل عقلانيه وش تنصحوني؟ والله يعطيكم العافيه