شوفوا وش سوت فيني سورة البقره

السلام عليكم ورحمة الله وبركاته

اشتقت لكم يابنات حواء ويشهد ربي اني احبكم وماقطعتكم متابعه لكم وبقووه

تحمست اكتب تجربتي لإفادتكم

لاني بصراحه استفدت منكم كثير

عرفت اشياء كثيره من هذه المجالس الرائعه الرائده

وانتم سبب في ثباتي وعلو همتي بعد الله

000000000000000000(0000000000000000000000000

انا ولله الحمد مواظبه على أشياء كثير

ولكن بدأ فيني الفتور وبدأت تنقص الطاعات عندي على شوي شوي

وماكنت احاسب نفسي على نقصان الطاعات لاني قبل كان عندي شغاله

فبعد ماراحت تعرفون صار وقتي ضيق وأغلب وقتي مشغوله

ومع مرور الايام والشهور بدأت تجيني ضيقه ماادري وش سببها

صرت أغلب أيامي حزينه ومالي خلق عيالي ولا بيتي ولازوجي ولا اهلي ولا حتى نفسي

والله صرت دايما ابكي واشعر بضيقه تخنقني خنق

وحتى صرت هزيله واحس بنغزات وخمول وتعب وجهد مع اني اهملت ببيتي ماعاد اشتغل مثل قبل

والايام تمشي وانا في دوامه

زوجي مل مني

وعيالي ارحمهم لاني مااجلس معهم

ومره كنت اسولف مع وحده متدينه نحسبها والله حسيبها

وانا قاعده احكي لها عن حالتي

اقولها انا ودي اسوي اعمال خير بس يجيني شعور بالاحباط لاني اقول اذا فيك خير خليه لعيالك وزوجك اولى

فالله يجزاها خير قالت لي هذي وساوس من الشيطان لاتلقين لها بال

وعليك بسورة البقره

وفعلا من بكره قرأت سورة البقره

يالله والله يمكن ماتصدقون والله في ذيك اليوم نفسه حسيت براحه وانشراح عجيب

وحسيت بنشاط عجيب لدرجة اني نظفت بيتي كله بثلاث ساعات فقط تخيلوا

وعيالي دايما مزعجين ويتهاوشون كثير والله ذيك اليوم هادين ويساعدوني بدون جدال

يالله والله اني تعجبت من هالبركه وهالراحه والانشراح ,,

بس تذكرت حديث الرسول اللهم صل وسلم عليه

""اخذها بركه""

ولعلمكم وانا اقراها جاني النوم وقمت انعس لكني قاومت لييين خلصتها

تخيلوا قعدت ساعه ونص تقريبا وانا اقراها

مع اني زمان كنت مداومه على قرائتها ,, كنت اخلصها خلال 35 دقيقه

شوفوا الفرق

انا فسرت هالشي بان الشياطين كانوا مسيطرين علي بتفكيري وانا كنت مستسلمه لهم

ويوم قرات سورة البقره حاولوا يشغلوني عنها بالنوم لكن الحمدلله استمريت

وتخيلوا من بكره قراتها بكل نشاط وخلال 35 دقيقه خلصتها

هذا دليل ان سورة البقره فككتهم وطردتهم عني ولله الحمد

وبعدها قررت اني ماتركها ابد مهما كان

طولت عليكم بس اتمنى اني افدتكم بتجربتي هذي