شوفوا وين ركبني .. آه يارب ألطف بنا ! / قديم

بنات انا صاحبة موضوع المطلقه في السعودية وين تسكن في القسم العام
صار معي امس موقف قضى على البهجة اللي فيني
بس احب اعرفكم على نفسي انا مطلقه وعندي بزران كثير جا موعد تطعيم الصغير وماعندي احد يوديني ويجيبني امراة ضعيفه لاوظيفه و ولاسيارة
كلمت ابو عيالي بحكم ان الغرض لولده ولو عندي وسيلة مواصلات ثانية ما انحديت عليه
المهم وافق وجا دق الباب وجو عيالي يقولون اطلعي
لبست وشلت ولدي وجيت بركب زي الناس واشر لي بدون اي كلمة باصبعه اني اركب ورى مكان الاغراض
حسيت الدنيا دارت بي المشكلة شايلة بزر
رحت وركبت وش اسوي مضطرة
ومن بعد هالموقف وانا مو بس كارهته الا كرهت حياتي
حسيت ان المرأة في مجتمعنا مالها اي قيمة اذا تطلقت
حسيت باحساس مرير اسأل الله مايجربه مسلم
يارب ارحمنا ليش السيارة صارت من اختصاص الرجال ليش وش فيها اذا المرأه مسكت الدركسون وحركت وش الفرق ان صارت هي اللي تحركه او سايق الليموزين الهندي
ليش تضطر المطلقه اللي مالها والي تمتر الارض عشان تقضي شئونها لييييييش
ليش ماتبقى ولاسيارة اجرة الا وركبتها بكل ذله
النساء في السعودية حقوقهم مهضمومة باسم الشرع والدين والدين منهم براء والله
اجل وش دخل قيادة السيارة بالدين والحلال والحرام
حسبنا الله ونعم الوكيل يعني تمتر الارض مشيا على الاقدام استر لها واعز من انها تركب سيارتها وتروح تقضي امورها
حنا بحاجة لوعي فقط من النساء بالصح والغلط
لأنه ترى قبل خمسين سنة كان تعليم المرأة كارثة ومحرم
شوفوا جداتنا الحين كيف يطالعونا الحين وحنا على جوالاتنا والحسرة تملا عيونهم ياقلبي بس والله راحت عليهم الله يعوضهم الجنان
ورمت عيوني من كثر مابكيت والله من هذا الموقف اللي صار لي
لكن سبحان الله ماتضيق الا تفرج الله
والحمدلله على كل نعمة حنا فيها اعرف ان قيمتي عند الله كبيرة
الله يغفر لنا ويرحمنا ولايؤاخذنا بما فعل السفهاء منا
دعواتكم لي والله اني حزينة حزينة حزينة
الحمدلله الحمدلله الحمدلله