شوفو الشغاله الوقحه وش سوت!

السلام عليكم ورحمة الله وبركاته



كلمتني جارتي ونفسيتها تعبانه حيل ...القصة وما فيها :



ان شغالتها ضربتها !!



طبعا جارتي طيبه وبنت حلال واعرفها زين زين ...واستقدمت شغاله اندنوسية ...مجرمة حرب درجة اولى ...بس مابان جرمها الا بعد شهور ...والسبب انها جاييه عشان بس راتب اول ثلاث شهور وبعدها تشوف لها صرفه اما الهرب او السفر!!



وهذا كله اكتشفته جارتي بعد ماكشرت عن انيابها ...لان جارتي معاملتها ممتازه مع الشغالات ...وهذا اكبر عيب فيها ...
تعاملهم زي ماتعامل وحده من خواتها لكن الحسود مايملا عينه الا التراب ...



الشغاله شافت الراحه والعافيه ...غرفه مكيفه وحمام خاص ...والاكل على كيف كيفها ..ويطلعونها للنزهه وما عندهم اطفال صغار يحتاجون عنايتها ...بس يطلعونها رحمة بها ...بس جارتي ماعطتها راتب اول شهرين احتياطا...اثاري الشغاله حقدت عليها ...بس بدأت تعطيها راتب ثالث شهر وارسلت لها فلوس لأندنوسيا ...



ويوم انها حقدت وودها براتبها كامل عشان ترسله لاندنوسيا وبعدها تروح لاخوها الي ساكن بالمدينة على حد زعمها ..بدأت تعاند في شغل البيت ..تقعد اكثر النهار نايمه تحت في مخزن المطبخ ...وبس تنظف اي كلام تنظيف سطحي ..والمدام نايمه مسكينه ومأتمنه هالشغاله انها تهتم بالبيت ...وطبعا جارتي مريضه مرض روحي وحالتها صعبة جدا ...


وتشوف الشغاله ماهي بالاوله ...كانت تنظف تنظيف غير طبيعي ونشيطه نشاط فوق العاده ...بس مع الايام لاحظت جارتي ان البيت مغبر والدنيا وسخه ...



والبارح تشوف عباتها وسخه مليانه غبار مع انها قالت لها اغسليها واكويها احتاجها بكره ضروري عشان عندي موعد بالمستشفى ..قامت ترفع صوتها عليها وتقول انتي الي موسختها مو من الارض متوسخه ...لان جارتي يوم راحت تشوف غرفة المكوى تقول كومة غبار على الارض غير طبيعية ...


قالت لها روحي نظفي وكنسي الغرفة ...قالت لا مافي كنس انا كنس اول وعباتك من الاول وسخه ...عاد جارتي هددتها قالت والله لو باقي ترفعين صوتك لاعطيك كف ...روحي نظفي ابرك لك ...قالت بصوت عااالي لامافي نظف ..

فعصبت جارتي منها وضربتها على كتفها عشان تروح تنظف ..قامت الشغاله تسوي نفسها عندها حالة نفسية تصرخ تصرخ واخذت عصا المكنسة الكهربائية وضربت جارتي على وجهها ويدها وسحبتها من صدرها كانت بتخنقها وزوجها فوق مشغول بالانترنت ..وماهو داري عنهم ...<<شكلها قالت فرصة اقضي عليها وارتاح>> ...قامت جارتي مسكت يدين الشغاله وتصرخ على زوجها الحقني الحقني...وتقول طلع من الشغاله ريحه شينه زي ريحة البراز وانتم بكرامه ...انفجع زوجها يوم عرف ان الشغاله ضربتها ...قال والله لو ماتتأدبين مع مدام لاكويك بالنار ...بس والله ماهمها ...لانها هددتهم قبل فتره انها ماتبي فلوس ولا شئ ..تبي تسافر وبس..



بالله لو انتوا مكان جارتي وش بتسون لانها صارت خايفه منها على نفسها وعلى عيالها ؟