شوفو كيف صديقتي روضت زوجها سليط اللسان.

السلام عليكم
شوفو كيف صديقتي روضت زوجها سليط اللسان ..
اول شي انا اعرف صديقتي من ايام المدرسة
بنت مؤدبه طيبه خجوله وهادية مالها بالمشاكل ابد ابد ابد
يعني في بنات كانو يأذونها بالكلام ويلقبونها بالثلجه
وماكانت تقول لهم اي شي اكثر شي تقدر تسويه انها تبكي تخيلو .
مرت الايام والسنين وتزوجت ..
وصرت اشوفها قليييل
بعد مرور فترة من زواجها
شكلها اتغير .. ضعفت وتغيرت وانتو عارفين شلون الهم يأثر على شكل الانسان ..
انا فكرتها متبعه رجيم او شي .. وسألتها مسوية رجيم
ضحكت وقالت لي رجيم الهم ..
وفضفضت لي .. عن مشاكلها مع زوجها ..
قالت لي بس اول شهر تمام بعدين اتغير علي
صار يكرهني .. صار يرمي بالطلاق يبي يطلقتي في كل حين وكل وقت .. وكل شي يصير بيني وبينه يعلم اهله اول بأول .. ومشوه صورتي .. ويختلق المشاكل من لاشيء ..يسب اهلي و
يهيني ويسبني ويشتمني .
لكن انا استاهل والله استاهل ، لاني انا سمحت له يتمادى .. اسامحه في نفس الوقت وفي نفس اللحظه وعلى العكس ما اعاتبه واعطيه كلام حلو واقول له انا مسامحتك لاني احبك وانته زوجي ومالنا بد من بعض ووو.




والي يسمعون قصتي يقولون انتي غبيه .. يسبج سبيه يضربج اضربيه دافعي عن نفسج لاتسكتين له ماينعطى وجه
طبعا جربت اسوي هذي الامور .. ولكني مااستفدت شي
وعلى العكس زودها بزياده ... وتفاقمت الامور ووصلنا الى الطلاق فعلا وبيني وبينه بنت
مايصلح لاينفع معاه الطيب ولا الشده و كنت عاجزه
وفعلا كل وحده تقدر تحل مشاكلها بنفسها .


وانا ماكنت ابي اتدخل او شي وكنت اقول لها الله يسخره لج .. ويعينج عليه
المهم انا اشوي اتكلم بصيغتها .
المهم بعد مرور حوالي سنتين وشي ..


قبل لا اقول .. راح اذكر الله واقول ماشاء الله .. لا اله الا الله وسبحان مغير الاحوال .. طبعا هي سمحت لي اكتب القصه للاستفاده من تجربتها
تحسنت علاقتها بزوجها وصار يحبها ويقدرها ويلبي كل طلباتها وهي نفسيا اتغيرت يبنات والله فرحت لها من كل قلبي .. الله لا يغير عليها ..
وقالت لي .. تدرين شلون قدرت اغيره ؟
غيرته خلال التزامي بعدة امور .. واصريت اني التزم فيها لغاية ما تغير تغيير جذري ..
اول شي: استعنت بالاستغفار وداومت عليه وراح اداوم عليه .. طبعا مافي احد يقدر يشك في هذا الشي ابد ابد .. بحد ذاته راحه نفسيه .. وربي وفقني وشعرت انه الهمني .. عشان اقدر اعيش وانا مرتاحه .. يعني احس نفسي اني قوية وقادرة اصبر واعرف ادير اموري سبحان الله الاستغفار نعمه كبيره
يعني كنت افكر انفصل ولكن غسلت الفكره يعني احس نفسي اني قوية وقادرة اصبر ولازم اصبر علشان بنتي ..
ثاني شي : ابشع بنت بالعالم .. قادرة انها تملك اجمل رجل بإسلوب .. اهم شي الاسلوب .. الاسلوب ... الاسلوب ......
ثالث شي واخر شي: المظهر ونظافة البيت وحقوق الرجل وو..
قالت لي انتي اكيد مستغربه ليش حطيت الاسلوب قبل المظهر ونظافة البيت وو
لأني انا طول الوقت البس احلى ماعندي ومهتمه بنفسي وبيتي نظيف دائما ومو مقصره معاه ..
وادلل فيه وادلعه كثيررررررررررررررر
واسلوبي كله حلو .. ومصيبه اذا تحسسينه انج تسوين اي شي بس على شانه انتبهي .. لا لازم تحسسينه انج انتي سنعه من اساس يعني حتى وقت الزعل اطبخي ونظفي وغسلي والبسي وكل شي سوي ..
...
طبعا كسرت هالقاعده وبلشت اغير اسلوبي .
واستخدمت وضع اللامبالاة .. !!!!!!
يعني الدلال والدلع والكلام الحلو كله راح خلاص
يعني حطيت في بالي واصريت اني احتفظ بالفكره ان زوجي يكرهني .. اذا شخص يكرهكم شلون تعاملونه ؟
تتجنبونه ، ماتحتكون فيه ، ماتكلمونه وتكونون طبيعيين جدا في التعامل معاه وانتو حذرين ..
يعني عاملت زوجي على هذا الاساس وطبعا الاسلوب في البداية راح يطول بعدين راح يكون مؤقت .
يعني ما كأني اشوفه ..
اختصر معاه الكلمات .. مااتناقش معاه .. يعني كأني اتكلم مع شخص يكرهني .. او شخص غريب
يعني اتكلم بطبيعتي .. وما احسسه اني متضايقه في نفس الوقت ولا احسسه اني مستانسه
وفي نفس الوقت كنت اقوم بواجبي على اكمل وجه احسسه بالافعال لأني متعوده ولأني سنعه ..
وبدأ بكلمة الله يعطيج العافيه .
قلت الله يعافيك فقط ..
وبعدين صار يبي يسولف معاي عن اهله .. او عن دوامه او شي مو بعادته بس هو حاس بشي غريب فيني هههه
وانا سااااكته .. واقول له .. مثلا ..( اها .. اي ..)
ومايشوف مني اجابه بعد .
بعدين قام يحاول يسوي مشكله يبي الزله .. يبي يختلق مشكله يدور شي تافه ينفعل عليه .. وانا ما كأني اسمع
بعدين قال لي جاوبي .. اجاوبه .. مادري والله بشكل طبيعه مااحسسه اني متضايقه ابد ابد ابد
وصرت جبل يعني اسلوبه مايهزني ابد تعلمت ان ماينفع احسسه اني متضايقه او زعلانه .. عن جد .. مثل ماقالو عني ثلجه بصير ثلجه عن جد ..


اخليه يتكلم ويطلع ويدخل ويعصب ويصارخ وانا مو مهتمه
احيانا ودي ارد عليه بس امسك نفسي ..
وبعدين على فكرة .. هو يأنب نفسه بنفسه ويجيني يعتذر .. بس اذا جا يعتذر .. ما اعاتبه ابدا ولا اعلق ولا اقول شي ..
لازم يشوف ويحس ان تعامله معاي مايجيب اي نتيجه
واحاول اني مااطلب منه شي واعتمد على نفسي .. واذا عرض علي انه عازمني او يبي يساعدني في شي ..
اقول له شكرا مايحتاج
واذا احتجت شي فعلا اكتب له واتس اب ما اكلمه وجها لوجه
قبل كنت اقول
تقدر توديني السوق ؟ وجها لوجه
الحين صرت اكتب له وتساب ابي اروح السوق ..
واذا حسسني انه يبي يذلني اصرف نظر عنه اذا ماكان ضروري
ولا اترجاه ابد ابد ابد ..
طبعا استمريت معاه وقت طويل طويل على هذي الطريقة
وفي البداية عانيت لان زودها .. واذا زودها هذا دليل على ان اسلوبي اثر فيه
وبعد مرور الوقت الطويل
بدأ يتغير .. ويهدأ .. لكنننننننن
مو معناه تغير وهدأ يعني خلاص ارجع معاه مثل اول
لا هذاااا اكبر خطأ .. لان شفتو ادوية المضاد الحيوي شلون تشتغل ؟ .. اذا الواحد قطعها راح تصير العدوى اقوى مستقبلا ..


فانا شبهت هالشي بتجربتي .. لما زوجي بدأ يتغير ويهدأ انا استمريت على اسلوبي .. وطولت .. لغاية ما تغير تغير جذري
لأني انا غيرت طبعه معاي .. وحتى مع الناس
يعني هذا طبع عاش عليه عمر .. ماراح يتغير في يوم وليله
وقت طوووويل طويل ..
والحمد لله لما تغير تغيير جذري
وبالتالي صرت اعامله معامله حلوه ولطيفة وهم احيانا اعامله بجد .. يعني صايره بالوسط ..
وانا الحين مستمره على هالشي .. والحمد لله
والي زوجها من هذا النوع .. اذا بديتي معاه اصبري واستمري ولا تشوفينه بدأ يتغير ترجعين مثل ما كنتي لان هذي مسأله تحتاج صبر والتزام .. لانج لو فكرتي تسوينها مستقبلا ماراح اتأثر ويمكن يتعود ع اسلوبج .. فاذا بديتي بالتجربه استمري فيها .. ولكن احذري العصبيه .. يعني راح تشوفينه راح يزيد في البداية ولكن لا تحسسينه انج خايفه او متضايقه ..
علشان تعطينه الفرصه يأنب نفسه
لما ينصحونج طنشي زوجج وقت الغضب مو معناه تحقرينه او تخاصمينه .. معناه انج لازم تستكتين وتعتبرينه مسجله او تلقزيون يشتغل .. وحسسيه انج طبيعيه .