شوفو لي حل مع هالانسانة

السلام عليكم و رحمة الله هلا خواتي

بغيت اشاوركم بشئ كثير مضايقني. محور الحديث عن زوجة اخو زوجي. راح احكيلكم عن بداية زواجي طبعا انا من النوع الهادي و اهي بعد على ما اظن طبعا انا ما كنت احتك معها يدوب السلام فقط و لمل كنا نجتمع في بيت عمتي انا و حمياتي (اخوات زوجي) اهي كانت تجلس معنا و ما كانت تتكلم اللهم مستمعة فقط على فكرة اهي ساكنة مع عمتي ف نفس البيت. بس تصوروا اخواتي انا ما كنت احسدها ابدا على شي و كنت ماخذة ف بالي انها ما تتكلم معي ( على فكرة اهلها يكونون جيران اهلي) و عمتي بعد ساكنة ف نفس المنطقة ر احنا بعد ( انا و زوجي) يعني كلنا جيران. بس بعد مرور كذا شهر لاحظت عليها حتى السلام ما صارت تسلم علي تمر و كأنها و لاشافتني (و بصراحة كثير كان يضايقني هالموقف) و انا كنت اطنش بس تدرون الشيطان كان يوسوس لي فحتى انا ماقمت اسلم عليها على اعتبار انها ما تريدني اسلم عليها و هي يعد ما تسلم علي. حملت بعد زواجي بسنة و هي صايرلهل اربع سنوات من زواجها و ما حملت لحد الحين.وانا لمل كنت حامل ابدا ما حطيت هالشي ف بالي و ما ترفعت عليها. بعد كذا عاد ما صارت تسلم علي و لاتجلس معنا لما نكون ف بيت عمتي. و لدت بالسلامة و الحمدلله , و عمتي كانت يوميا تزورني و اخوات زوجي اغلب الاحيان كانو يجوا معها بس اهي ما كلفت نفسها تجيني غير مرة وحدة . تصوروا و لامرة اخذت بنتي. كبرت بنتي و صار عنده 8 شهور ف هالفترة شفتها كانت تاخذها من حمياتي شوية و تلاعبها و ترجعها لهم . لاحظت انها تلاعب بنتي و لما اكون مارة تبطل تلاعبها و تدخل غرفتها. بس تصدقون من كثر ما كنت اشوف منها هالحركات و اهي تتجاهلني و ما تسلم علي و تسلم على حتى و انا اكون جالسة معهم صرت اكرها و ما اطيق اشوفها. بس ف داخلي كثير اتضايق ليش تعاملني كذا و ليش ما اكون احسن منها. و بالفعل رديت اسلم عليها بعد ماكنت اطنشها و لا اسلم عليها. لاحظت انها بدت تسلم علي لما ازورهم و تبتسم لي كان هذا لشهر فقط و بعدها ردت لحالتها حتى ف رمضان . و الحين اهي بعدها على ذي الحالة ما تسلم علي لما تشوفني و لما اجي اجلس مع اي حد اهي تكون جالسة معهم تقوم اهي من مكانها و تروح لغرفة ثانية. بصراحة اخواتي من كثر ما شفت منها هالحركات الطفولية صرت اكرها و اتجنبها لا تسلم علي و لا اسلم عليها, بس بيني و بين نفسي اتضايق كثير ما اريد اكون خفيقة لهدرجة و ما اريد اصغر عقلي و اجلس احاسب نفسي ليش انا اكرها لهدرجة تري الدنيا ما تسوى و يجي اليوم اللي نتحاسب فيه و ما اريد اخلي نفسي مكروهة اريدها تحبني مثل ما تحب البقية و تعاملني مثل ما تعاملهم و اريد انا بعد اكون طيبة معها . هل برايكم الغيرة اهياللي خلتها كذا و لا ايش برايكم ؟ يعض الاحيان اقول ف نفسي انا اشتغل و هي لا و الله رزقني باولاد ساكنة ف بيت بروح و عشان كذا اهي تغار مني و تكرهني. على فكرة انا ما اطبخ ف بيتي الغدا ناكل مع عمتي بعد ما نرجع من الدوام و العشا مرات ف بيت عمتي و مرات مع امي ( ومرات اقول اهي تستصغرني عشان هالشي يمكن لاني ماطبخ و اهي تعرف تطبخ و تساعد عمتي ف شغل البيت)

اريد النصح منكن اخواتي و كيف اخليها تغير معاملتها معي و ما تتغير ابدا, انا ما اريد اكرهها و لا اريدها تكرهني اريد اكون احسن منها .
انتظر ارائكن اخواتي و رجاء لا تبخلو علي بنصيحة لان هالشي كثير مضايقني و صاير كل تفكيري معا ليش هي كذا و ليش و ليش....
بصراحة كتبت كلام كثير و اتمنى يكون و اضح و الفكرة و صلت
و السلام عليكم
ام ريان