قمر جدة غير @kmr_gd_ghyr
عضوة جديدة
شوفو مراة خالي كيف ورطتني في ولادتها ،،
خالي دوامه فليل من الساعة 2 الى الصباح الساعة عشرة ،، مرأة خالي أمية ما تعرف تقرأ و تكتب ،، عشان كده خالي من يوم ما زوجته خلصت الثامن كل يوم يبرمج لها رقم جواله في تليفون البيت ويطلع شغله عشان لو صار لها اي شي تتصل عليه ،،
بس ربي قدر ذاك اليوم و ما برمج الرقم و خرج للدوام ،، و عنده ولد عمره خمس سنين و نص و بنت عمرها 3 سنين ،، مراة خالي تقول زي العادة قامت تصلي الفجر و دخلت الحمام تبغى تتوضأ ، تقول ما كانت حاسة بأي الم ،، بس اول ما قعدت على كرسي الحمام الله يكرمكم ،، تقول حست بألم فضيع جدا ،، و ما قدرت حتى تتحرك ،، ردت باب الحمام و قعدت و شوية الا راس البيبي خارج ،، تقول ضغط لين ولدت ،، و صارت ماسكة بطنها بيدها الاثنين لانها سمعت جدتها مرة تقول لحرمة اذا الحرمة ولدت فالبيت و ما ربطت بطنها المشيمة تطلع لفوق و تموت ما ادري صحة الكلام بس هي قالت لي كده ،، المهم ،، تقول الله يكرمكم ماسكة البيبي من راسه بأصابع رجولها الاثنين عشان فتحت البالوعة جنب الراس و خايفة لا يدخل راس الجنين جوه و تروح في مصيبة ثانية ،تخيلتو الموقف اللي هي فيه ، احس بقشعريرة ،،
المهم تحكيني و تقول قعدت ابكي و ماني عارفة ايش اسوي و عيالي نائمين ،، تقول شوية اسمع ولدي من ورى الباب ينادي عليه ، ما عرفت ايش تسوي ،، هي رادة الباب ما هي مقفلته ،، الولد لما طل انفجع ،، هو ما شاف غير الوسخ و الدم ،، و صار يبكي يقول لامه ايش فيك ،، امه قالت له روح عند اختك و خليك جنبها ،، لين ما ابوك يرجع ،، بس الولد ما سمع كلامها ،، فتح الباب ونزل بيت الجيران ،، تعرفو وقت مدارس ،، بس المشكلة الولد ما يعرف يتكلم مضبوط ،،و كلامه مو مفهوم ،، نزل لبيت الجيران و دق الجرس و الخدامة فتحت الباب و صار يبكي و يتكلم طبعا الخدامة ما فهمت شي اخذت بعضها و قفلت الباب ،، والولد رجع لبيته ،، و قوم اخته من النوم و مسك يدها و ادها لبيتي كعابي ،، انا و امي ساكنين في نفس العمارة بس انا تحت و هي فوق عندها زي تصميم الفلة دورين ،، المهم انا ما ادري ولد خالي كيف وصل لبيتنا سبحان الله ،، صح هو شارع واحد تمشيه طوالي بس سيارات و لازم تقطعي الطريق و ترجعي تكملي طوالي ،، سبحان الله ما ادري كيف طفلين صغار وقت زحمة المدارس قدرو يوصلو للعمارة ، المشوار يمكن مشي حوالي 15 دقيقة ،،
اول شي طلعو للعمارة فوق لبيت اهلي بس محد فتح الباب لانهم نائمين في الدور العلوي ،، رجعو نزلو تحت و جلسو عند باب العمارة ،، و زوجي عادي خارج رايح لدوامه ،، اول ما شاف عيال خالي انفجع ،، و انا خلاص ابغى احط راسي على المخدة الا اسمع صوت باب الشقة ينفتح الا زوجي داخل و معاه الاطفال ،، يقولي كلمي الولد ماني فاهمة منه شي ،، المهم يقولي امي في الحمام طاحت و كلها دم و بعد كده الكلام الباقي مو مفهوم ،، اما البنت الغلبانة بس تبكي ما هي دارية شي ،، زوجي قلي لا تصحي اهلك اول شي روحي شوفي ايش اللي صاير بالضبط ،، اخذت الاطفال و رحت للبيت خالي ،، لقيت باب الشقة مفتوح ، دخلت جوة انادي محد يرد ،، رحت للحمام انادي علي مراة خالي ردت علي ،، طليت جوة بس ما شفت شي ،، هي تدفني ،، اقلها ايش فيك ،، تقول انا ولدت ،،اقولها طيب خليني ادخل ،، تقول لا ،، انا جسمي مكشوف من تحت ،، قلت لها ما راح اطل فيك ،، ابغى اطمن عليك بس ،، قالت احلفي ،، قلت احنا في ايش وانت في ايش ،، المهم خلتني ادخل يا بنات ،، الطفل ،، لونه ازرق ،، البلاط بارد و الطفل له اكثر من ساعة ، بس لا يبكي ولا اي شي ،، انا قلت في نفسي شكله ميت ،، بس ما قلت لها ،،
رحت لزوجي و قلت له روح جيب ممرضة و تعال بسرعة ،، و زوجي اتاخر و بعدين اتصل علي ، يقول رحت لثلاثة مستوصفات مو راضين ، يقولو لازم معاك حرمة ، الممرضة تخاف تروح مع رجال لوحدها ،،
مراة خالي تقول اقطعي الصرة قلت لها انا اخاف ،، و هي تبكي تقول انا خلاص ماراح استحمل و راح اموت ،، قلت لها طيب انتي تعرفي كيف ،، قالت ايوه ،، نسيت اقولكم هي جاية من الديرة ،، و طول عمرها عاشت هناك و تعرف لهذه الحاجات ،، المهم كان في مقص في درج الحمام ،، قالت ابعدي شبر عن بطن الطفل و قطعي الصرة و اربطيها بسرعة المهم يدي ترجف و انا اقطع الصرة و ابكي و قلبي يدق بسرعة ،، و احس نفسي انو راح يغمى عليه ،و اقول ايش اللي خلاني اجي ،، كنت صحيت امي على الاقل و جبتها معايا ، المهم قصيت الصرة و قالت لي اقلبي الطفل اول ما قلبته صرخ ،،، و صار يبكي و لفته بمنشفة الحمام و اعطيته لزوجي ،،
و دحين بأقول حاجة مقرفة اللي تبغى تقرا تكمل و اللي ما تبغى لا تقول قرفتينا ،، المهم مراة خالي قالت لي حطي شعرك في فمي ،، قلت لها ليش قالت بس انتي سوي اللي اقولك عليه ،، و بعدين راح اكمل لكم ،، دحين راح اصحي زوجي للدوام ،، لا تحسبوني كبيرة في السن لا انا صغيرة لسه ما كملت 27 سنة ،، اولد مراة خالي و انا ما عندي اي خبرة ،، اصلا انا لسه ما حملت و لا ادري كيف خطوات الولادة بالضبط ،،أنتظروني ،،،،
133
16K
هذا الموضوع مغلق.
أسيرة زوجي
•
انتظر الباقي والله كانه فيلم
بحرعسل
•
يااااااااااااااويلي ويلاااااااااااااااااااااااااااااااه
الحمد لله ربنااا حمى الأطفااااااااال من السياااارات ياقلبي ألف حمد وشكر لك ياااارب
وننتظرك يااااقمر
الحمد لله ربنااا حمى الأطفااااااااال من السياااارات ياقلبي ألف حمد وشكر لك ياااارب
وننتظرك يااااقمر
ياهووووووو صدق ...وربي لو اكون مكانك لأتشنج وما اعرف اتصرف
طيب لو زوجك طلب دكتور ومعاه ممرضه كان افضل ..بس قدر الله وكنت البطلة
كملي بليززز
طيب لو زوجك طلب دكتور ومعاه ممرضه كان افضل ..بس قدر الله وكنت البطلة
كملي بليززز
الصفحة الأخيرة