موقفين مرو علي امس واحد العصر و واحد قبل القيام
انا بيتي على شارع عام على شارعين شارع عام والشارع الثاني يدخل بالحاره جوه بس عشان تتخيلون شكلي كيف صار (( مو ناقص الا رقم العداد ))
في ضل بيتي يوقف عمال الي يترزقون الله من الصبح الى اخر اليل ولا عمري شفت منهم شيي وعلى العموم انا مكنسله الباب الي على الشارع العام
وفي العصر يروحون للبيت الي قبالي تكون الشمس مش في وجههم يعني مره هنا ومره هناك الي شفته وانا وقفه على شباك غرفتي طبعن اقدر اشوفهم وقف رجال والله ما ابالغ يمكن عمره ما بين 28 سنه الى 38 سنه يعني مو صغير وقف وصار يضرب كلكس بوري لهم يا حرام هم تجمعو يوم جو له مشى وخلاهم اشوي هم وقفو وهو وقف رجع ضرب لهم وجو تراكضون واحد من العمال فتح الباب يبي يركب عشان يفوز بالمهمه يمكن يطلع ب 30 ريال الا الرجال مقفل باب سيارته ومشى ونفس الحركه وقف وجو يركضون المهم جلس يسحبهم يجي 5 دقايق والله يا خواتي العصر في نهار رمضان وهو يسوي كذا وعلى فكره العمال انا اشوفهم بعيني من يقول الله اكبر كلهم يجرون للمسجد كل فرض والله اشوفهم يصلون المسجد جنبي جداري على جداره يعني العمال مسلمين الي حدهم الفقر والحاجه ولا مو متغرب عن بيته وعياله عشان يوسع صدره
((( وهو كان مقفل الشبابيك والبيبان وبس يضحك على اشكالهم السخيف الحقير )))
وعلى فكره مره وانا طالعه مع زوجي شفت واحد نفس الحركه مسويها ولما قلت لزوجي شف قال ايه كذا دايم يسوون فيهم الله لا يسامحهم يقول والله ساعات يركبونهم وبعدين ينزلونهم وكم واحد يقول يوقف واذا تجمعو حوليه مشاء ويدعمهم الي يتعور والي ينتبه و يوخر عن السياره
العبره : النفط مابقي عليه شي ويخلص والدنيا سلف ودين وقبل النفط كانو اهل الخليج يروحون يشتغلون في الهند وجدي كان منهم انا الي اكلمكم جدي كان بالبحر ويروح يكد في الهند يعني كنا في يوم نخدمهم بس طلع النفط وغير الاحوال طيب منت خايف من الله ولا مستحي من الناس خاف من الحوبه خاف من بكره والله يا بنات بغيت ابكي امس وانا اشوف ذا المنظر ليه ومن متى كانت مشاعر الناس لعبه ومن متى كانو الفقرا تسلييه لنى ومن متى كان الصيام بس عن الكل والشرب والعصريه تطلع تقطع الوقت وانك تتسلى بالهنود يكفي انهم صايمين واحد منهم يرفع يده ويقول حسبي الله وانت ما ترجع لبيت اهلك تفطر ويمكن تفطر في ثلاجة الموتى
ولو الي امسوي الحركه ولد مراهق والله ما قالت ربع الي قلته بقول طايش ومراهق بس ذا كبير كبير ومتين وشكله يلوع الكبد
حسبي الله عليه من جد الى الان مقهوره منه
الموقف الثاني زي ما قلت لكم بيتي على شارعين وانا اطلع وادخل من الباب الي في الشارع الفرعي اكثر امان وبعيد عن عيون الي في الشارع العام المهم وانا طالعه بروح جيب اغراض قبل صلاة القيام ومستعجله فتحت باب الحريم و زوجي عند الباب يكلم بالجوال ابي اقطع سيارتنا من قدام الا زوجي يصرخ يقولي انتبهي انا ما انتبهت لشارع بس رحمت الله واسعه مدري ليه وقفت الا شي مر من جنبي اففففففففففففففففف تروعت والله زي صوت القطار المستعجل الا اشوف ولد ومعه اخوه الولد الي يسوق جرمه صغير ومتعلق بالدركسون
وقفت الا زوجي يسب ويهاوش عليه وهو ولا التفت بغى يموتني والله يا بنات لو ما رحمت الله وقفتني ولا كان لصقت بوجه السياره زي توم وجيري
من الحره قلت لزوجي الحقه قال ايش قلت الحقه والله ما اخليه ابي اربيه ؟؟؟؟ طالعنى وسفهني ما راح له لف من الشارع الي قبله الا هو واقف ينتظر عند بيت ناس بالصدفه قلت وقف قال منتي صاحيه قلت لو ما وقفت والله لفتح الباب وانط وقف ولا اش اشوف ؟؟؟؟؟
ولد عمره 11 سنه ايوه 11 انا بصراحه مستغربه ومعه اخوه اصغر اشوي فتح زوجي الشباك وقاله ما تشوف الا هو ياكل بطاطس :f226: ويشرب عصير
قاله زوجي ما تشوف وهو ساكت قال الا اشوف قام زوجي يقوله بغيت تذبح زوجتي الا يقوله انا جاي اخذ امي قاله زوجي تاخذ امك وبطريقك بغيت تاخذ زوجتي
ههههههههههه الا امهم نازله معها ترامس مقهويه الحريم ومخلصه بتروح تكمل السوالف على راس ابو الشباب انا من غير شعور نزلت لها طبعن ابي افهم منها كيف تعطي ولدها سياره وهو صغير وكيف تامن على نفسها معه وعلى فكره هو لما بغا يلصقني في خشم سيارته كان متجاوز السيارات وجاي على الطريق الثاني الي رايح يعني عاكس السير ابو الشباب
نزلت سلمت عليها وردت وهي مستغربه قلت لها ولدك بغئ يذبحني قلت لها كان يبي يدعمني بسيارته سوت كذا
قالت هذا انتي بخير ما متي ؟؟؟؟؟؟؟؟؟؟؟
يا قو عينها
قلت لها ما مت بس لوني ميته تفكرين زوجي وعيالي بيسامحون بزرك والله ليخيس هو وانتي وابوه بالسجن بدل ما تسمحين تردين بذا الرد
زوجي لما سمع كلامها نزل وقالي اركبي وقال للولد هات المفتاح ويمسك الجوال يكلم طبعن هو نصاب بس يبي يحرجها هو مايبي يكلم المره بس بيخوفها يقول اقهرتني بردها
الا يوم جت عندي والله انا مفهمت عليك والحمد الله على سلامتك والله يصلحه ولدي ما يخلي قلت لها مالي شغل انا نزلت انصحك اليوم بغاء يدعمني بكره بيجيب لك مصيبه واذا زوجك ما يبي يوديك و يجيبك يختي اطلبي تكسي مو تعرضين ولدك والناس للخطر
واذا انتي ما يهمك ولد والمسايير اهم انا اهم ما عندي نفسي وراي بزران بالبيت وفي بطني بزر يبي يعيش وانا ابي نفسي
بالاخير عطاهم زوجي المفتاح بعد ما غسل اشرع الولد
الخلاصه امحق امهات انا ما الوم العيال الي قوين عين في الشارع اذا امهاتهم قويات عين ولا همهم سلامة الناس اهم ما عندهم المسايير والسوالف والغبقات الرمضانيه
الام مدرسه
امس كرهت يومي ورجعت ما جبت شي من كثر ما غلى دمي
بنات لا تطلعون من الموضوع الا وانتم اخذين من حلاوة العيد هههههههههه