المكونات:
5 بيضات كبار
فانيليا
كوب ونصف سكر
كوب حليب
2 الا ربع كوب زبدة سايحة
2 ونصف كوب دقيق
نصف كوب كاكاو خام
2 ونص ملعقة صغيرة بيكنج بودر
450 جرام شوكولاته مقطعة
200 مللى فريش كريم
وللتزيين:
فراولة
عين جمل
شوكليت شيبس(أو حسب الرغبة)
الطريقة:
فى اناء هنحط البيض والسكر والفانيليا
ونضربهم بمضرب البيض ونضيفلهم الزبدة السايحة
والحليب
ونضربهم ونضيفلهم الدقيق والكاكاو والبيكنج بودر
ونضربهم لأخر مرة لغاية مايمتزجوا كويس
ونحضر كوبايات الكب كيك
ونحط فيها الخليط بس نسيب جزء فاضي
ودخلته فرن حرارته هادية وبدأت احضر شوكولاتة الجناش للتزيين
فى كسرولة هنحط الفريش كريم
ونخليها تغلى على النار واول ماتغلى نطفى النار ونضيفلها الشوكولاته المقطعة
ونقلبهم لغاية مالشوكولاته كلها تدوب فى الكريمة
وهو المفروض الشوكولاته فى الجناش تبقى 400 جرام بس مش 450 بس انا عايزاها تقيلة عشان هنستخدمها فى التزيين وهنحط الجناش يبرد فى التلاجة لمدة ماتزيدش عن نص ساعة
فى الوقت ده هيكون الكب كيك استوى نخرجه من الفرن
ونسيبه يبرد خالص ونطلع الشوكولاته من التلاجة ونقلبها لو كانت جمدت زيادة
وهستخدمها لما يكون قوامها بالشكل ده
تكون لينة مش سايحة ومش جامدة وهنحطها فى كيس التزيين واستخدمت شكل البلبلة دى
وبدأت ازين الكب كيك
وده شكله النهائى
وبالهنا والشفا