قبل كده نزلت وصفة شوكليت كيك بس فيه ناس بعتولى قالولى طريقة الglaze والتزيين صعبة علينا كمبتدئات فالنهارده هقدمها بطريقة سهلة للصوص والتزيين عشان اى مبتدئة تقدر تعملها
مكونات الكيك:
5 بيضات
فانيليا
كوب ونصف سكر
كوب حليب
كوب زبدة سايحة
2 ونصف كوب دقيق
2 ملعقة صغيرة بيكنج بودر
نصف كوب كاكاو خام
مكونات صوص الشوكولاته:
كوب الا ربع سكر
كوب ماء
كوب ونصف كاكاو محلى(كاكاو غير خام)
2 ملعقة كبيرة زبدة طرية
2 ملعقة كبيرة عسل جلوكوز(ويمكن استبداله بعسل نحل)
وللتزيين:
كريم شانتى
شوكولاته مبشورة
الطريقة:
فى اناء هنحط البيض والسكر والفانيليا
ونخفقهم ونضيفلهم الزبدة السايحة
والحليب
ونخفقهم واخر حاجة نضيفلهم الدقيق والبيكنج بودر والكاكاو الخام
ونضربهم كويس لغاية ماتتجانس المكونات
ونحط الخليط فى صينية مدهونة
وندخلها فرن منخفض الحرارة والكيكة جوة الفرن هنبدأ نحضر صوص الشوكولاته فى كسرولة على النار هنحط الميه والسكر لغاية مايدوب السكر
واول مايدوب السكر نضيفلهم الكاكاو (انا استخدمت كاكاو نسكويك بس ده حسب رغبتكم ممكن اى نوع تانى)
ونقلب الكاكاو لغاية مايدوب كويس فى الميه والسكر ونضيفلهم الزبدة وعسل الجلوكوز
نقلبهم ونشغل النار عليهم لغاية مايغلوا عشان المكونات تمتزج كويس وقوام الصوص يتقل
ونطفى عليه اول مايغلى ونسيبه يبرد هتكون الكيكة استوت نطلعها من الفرن
وهنحطها فى التلاجة لمدة ساعة عشان نعرف نقسمها ولما نطلعها نقسمها لنصفين
حشيتها بالصوص وبقيته حطيته عليها من فوق وفوقه شوكولاته مبشورة وفى الجناب عملت عواميد ووردات كريم شانتى يعنى تزيين بسيط وسهل جدا وده شكلها النهائى
وبالهنا والشفا
تسلم يمينك شيف موني