شوية نصايح من شاب كويتي علشان تفهموننا ..

السلام عليكم ..

مساكم الله بالخير كلكم ...
انا عضو يديد وياكم .. وسعيد بانضمامي لكم ..
بصراحه السبب الرئيسي في تسجيلي بهالمنتدى اهوه الفهم الخاطئ لبعض سلوكيات الرجل من قبل بعض البنات .. وهذا اللي لاحظته بأكثر من موضوع مطروح في هذا القسم .. :09:
صج اني ماني متزوج .. لكني خاطب وملجتي بعد جم شهر ان شاء الله ..

عشان جذي ودي اقولكم جم شغلة تخلي الرياييل يذوبون فيكم

اهم شي وأول شي .. حسسيه بالاهتمام .. :23:
يعني مثلا في بعض الحريم الله يهداهم .. اول ما يشوفون الريل .. على ابو انها ولهانه عليه تطيحله سوالف وهذرة وتقعد تقوله عن كل شي صار لها اليوم ... لدرجة انها تنسى تسئله شصار معاه اليوم .. وين راح وشسوى :08: .. وتقعد تهذر وتقرقر واهوه المسكين ينطر منها سؤال عن اللي سواه اليوم .. لكن وبكل بساطه عقب ما تخلص كلامها تسئله "شفيك ساكت !" ...
فشي طبيعي بيرد عليها "مافيني شي" او "خلصتي سوالفج" او او او او .. يعني اي كلمة تبين انه ماله خلقج .. والسبب انج ما بينتيله اهتمامج فيه وبأخباره ... :mad:
او بعضهم يسئلون الريال مثلا شصار وياك اليوم .. يقولها والله رحت المكان الفلاني .. وبس ما تحاول تسأل بتفصيل اكثر .. يعني تكتفي بهالاجابة .. ما تسئله شسويت او شصار وياك او خلصت الشغله اللي رايح لها ... يعني يكون حوارها وياه مجرد سؤال جواب ... ماكو اي نوع من انواع الاهتمام او التفاعل مع اخباره ... :(
غيروا هالشي فيكم وانتوا بتشوفون النتايج .. بس لا تكثرون بالاسئله ..

ثاني شي .. المفاجأة ..
ما تدرون شنو تكون ردة فعل الريال لما يشوف انه زوجته بين فترة وفترة تفاجأه بشغلات حلوة .. مو شرط تكون هدية او شي مادي .. لأ ... لكن المفاجأة بحد ذاتها اهيه اللي تونسه ...
طبعا الأفكار الرومانسية والمفاجآت مشالله مو مقصرين العضوات بالمواضيع بهالخصوص ..
يعني حلو انج تفاجئينه واهوه بالدوام تتصلين عليه وتقوليله ولهت عليك ..
بس لا تخلين هالشي دايما يعني بين فترة وفترة طويله .. علشان ما يمل من هالحركة ولا تحرك فيه شي ..
شي ثاني ممكن انج تشتريله شغله بدون مناسبه وتعطينه اياها ... او ممكن انج تحاولين تسويله شغله بإيدج وتعطينه اياها بطريقة معينه وحلوة ..
- مثلا لو كان لج ميول بالشعر والادب تكتبيله قصيده او خاطره او جمله تبين مشاعرج اتجاهه وتطيحيله مديح فيه ..
- لو لج ميول بالطبخ تسويله كيكة بالنوع اللي يحبه كاكاو فراولة تشيز كيك اي شي .. وكتبي عليها اسمه داخل قلب حب .. يممممم ..
- لو لج ميول بالخياطه تخيطين له مخده عليها اسمه او اسمج .. وتكون بالالوان اللي اهوه يحبها .. وتكون كـ وسادة للنوم حقه ... بتلقينه كل ما حط راسه عالمخده اتذكرج وضحك ..
او او او او .. شغلات وايد ممكن تسوينها وتفاجئينه فيها بدون مناسبه معينه ... وانشالله لو حبيتوا الموضوع بفتح لكم موضوع منفصل بالمفاجآت اللي تخلي الريال ينام ويقعد ويروح واهوه ما يفكر الا فيج ..

ثالث شي .. الغيرة الحلوة ..
مثل ما المرا تحب ان زوجها يغار عليها .. الريال يحب ان زوجته تغار عليه ... وطبعا غيره معقوله وخفيفه وحلوة .. ما تكون دفشه او دلع زايد يؤدي الى مصاخه وملاقه بنات ..
يعني مثلا الحبيب مشغل التلفزيون .. وتطلع وحده مزيونه .. ويطيحله الطيب خز فيها ... ومديح بجمالها .... خلج متأكده انه مو قصده انه يمدحها .. قصده انه يخليج تغارين عليه من هالحلوة .. انتي بذكاءج تقدرين تبينين له الغيرة الانثوية الحلوة بدون دلع بنات وتزعل .. يعني مو تروحين تزعلين وما تكلمينه اسبوع على هالسالفة .... لأ خلج نعومة وعصبي بطريقه حلوة .. وروحي غرفتج وتكشخي آخر كشخه .. وعقب نزليله وقوليله : " بذمتك منو احلى .. أنا ولا اللي بالتلفزيون " صدقيني بيضحك ويقول انها ضب يمج ويم جمالج وحلاتج :D ... عاد بهاللحظه انتي بينيله انج تغارين منه وتدلعي عليه وعطيه من الكلام الحلو راح تلقينه يدلعج ويتأسف منج ويقولج انه ماراح يعيدها ...
وغيرها طبعا من السوالف ممكن تسوينها .. مثلا لو كنتوا طالعين وشاف وحده وتكلم عنها ..
لو قالج سالفه فيها بنات .. يعني مثلا قالج انه اليوم كان طالع وشاف وحده اضحكتله ... مو تطنقرين وتعصبين .. ولا تصيرين careless وما تهتمين بالسالفة ... لأ بينيله غيرتج الحلوة .. وحتى لو بعد مدة مثلا ساعات او ايام وقال انه ضحكتج اليوم صايره حلوة .. قوليله يعني أحلى من ضحكة البنيه اللي اضحكت لك .. ؟ بطريقه حلوة طبعا .. والله بتشوفين ردة فعل حلوة منه ...
بس هاااااا .. لا تغثينه بهالسالفه .. يعني سويها مره وحده .. مو كل يوم تقوليله عن البنيه اللي اضحكتله وتعايرينه فيها ..

رابع شي .. الاحترام والتقدير ..
احلى شعور يشعر فيه الريال لما يحس ان زوجته تقدره وتحترمه .. وهالتقدير والاحترام يبين من تعاملها معاه .. يعني دايما يكون لسانها حلو وياه .. وذربه .. ومؤدبه .. سواء كانو ببيتهم او جدام الناس .. ودايما خل تتكلم بالخيرعن زوجها مع الناس بوجوده .. يعني اهلهم واقاربهم .. هالشي راح يعزز العلاقة بين الزوجين ..
ودايما خل تبين له انها طول ما اهيه وياه فإهيه بأمان ..
يعني ساعات البنات لو صارت لهم مشكله صغيره قالت : أبي امي أبي ابوي .. على قولة حليمة :01: هيهيهي .. او يعني مثلا لو كانت خايفه من شغله .. او كانوا مسافرين مع بعض لمكان بعيد .. او رايحين البحر ... او او او ... فـ تلقون البنيه على طول تقول ولهت على امي .. او أبي امي .. او اي شخص ثاني غير زوجها .. هالشي لو تكرر وايد بيحس الزوج انه سواء كان وياها اولأ ماراح تفرق معاها وايد ..

خامس شي .. عدم العناد .. وهذا تحته خطين كبااااار ..
اكثر شي يطلع قرون للريال .. اهوه العناد ...
الريال بطبيعته يحب التملك واتخاذ القرارات والقيادة ... مو اذلالا في المرأة لأ .. ولكن هذي طبيعه الله وضعها في الريايل كلهم ..
وينون الريال انه احد يعانده .. لو طلب منها شي او قاله ما تسوي شغله وتقوله له "لأ" .. اوووووف اهني الريال خلاص توصل معاه للمليون .. فالمرا الذكيه تقدر تغير وجهة نظر الريال بدون ما تعاند .. يعني تقوله "خلاص بعد دام حبيبي قال جذي وطلب مني هالشي .. يامر أمر مو بس يطلب ... بس انزين شرايك يا بو فلان لو سوينا جذي وجذي" وتضيف على هالجملة شوية تدليع وكلام حلو وذكاء انثوي ... والله بتلقون الريال بيغير رايه وانتوا ثنينكم مستانسين ... لكن انسوا كلمة "لأ" .. امحوها من قاموسكم .. وتقبلوها برحابة صدر من لسان الرياييل :42: ..


انا ودي اكتب بعد ..
بس الصراحه تعبت وكتبت وايد وانشالله لو عجبكم الموضوع بنكمل لكم وبنكتب اكثر ..
وجنه طولناها اصلا .. :22:

اخوكم
كويتي متغرب