شيء عجيب يخدر المنطقة وتسحبين الشعر كنك تسحبي كلينكس (./منقول

بسم الله الرحمن الرحيم

السلام عليكم ورحمة الله وبركاته

حقيقة هذه أول مشاركة لي في هذا المنتدى الرائع واتمنى ان لاتكون مكررة

وان كانت فالتكرار يعلم الشطار

وهي اكتشاف وتجربة عجيبة لإحدى الأخوات في إحدى المنتديات واسمها " العذوب " وأصرت على ذكر اسمها

ومنتداها وهو ****************

والحقيقة جزاها الله كل خير عن هذه التجربة التي أذهلتني ودعوت لها من قلبي


وهي عن اكتشافها العجيب الذي يخدر المنطقة الحساسة وأي مكان تريدين نزع الشعر منه ، وقد أحببت نقلها لكن

ولا أريد منكن الا الدعاء لي بالعافية والفرج

وأترككن مع تجربتها :

بنات ..

اليوم عندي لكم سالفة عجيبة غريبة ..


بس في النهاية طلعت منها باكتشاف أغرب وأغرب .. وممكن يكون طريقة جديدة لنا في التعامل مع شيء مهم واااايد بالنسبة للبنات تحديدا ..


شوفوا السالفة ..

أمس تعورت في مكان في جسمي ما ينفع أحط له لزقة جروح ( المنطقة اللي في أعلى الفخذ قريب المنطقة الحساسة ) .. جان أسير أييب الضماد السائل اللي كانوا يحطون اعلاناته في االتلفزيون.. هو عندي من زمان وأحطه لليهال إذا تعوروا في مكان واضح أو مكان احتمال اللصقة تطيح منه على مشاغباتهم وحركتهم ..


حطيت الضماد لنفسي وهذي أول مرة أنا أستعمله لنفسي ..

اليوم كنت أبا أشيك ع الجرح .. قعدت أطالع الضماد وأقول في خاطري هالانجليز ما خلوا شيء ما اخترعوه .. المهم شفت كم شعرة صغيرة أنا غطيتهم بالضماد بدون قصد جان أتحرش فيهن وتخيلو شو صار .. الشعرات طلعوا في ايدي بدون ما أحس ..
أنا استغربت..

جان أسحب كل الشعر اللي غطيته بالضماد ..

شعرة شعرة ينقلعن في ايدي شرات ما تسحبين الكلينكس.. انصدمت .. المكان اللي أنا محطية عليه الضماد مكان الشعر وااااايد صعب ينسحب منه.. لأنه حجم الشعرة سميك .. تعرفون هالشيء أكيد


قلت أنا بشوف شو السالفة ..


سرت يبت الضماد ...

وغطيت فيه منطقة أسفل البطن .. يعني صوب المنطقة الحساسة .. وهالكلام كان الساعة 6 المغرب..
بعد نص ساعة شيكت .. والا الشعر يطلع في ايدي بس فيه وخز كأنج تسحبين شعره من ريلج مثلا ..


الساعة 11 بالليل .. سحبت الشعر .. والا خفيف.. والوخز شبه معدوم ...
بس المنطقة اللي من أمس عليها الضماد كان الشعر يطيح منها بشد بسيط بأصابعي ..

سويت حلاوة ع المكان .. في 8 دقايق أنا مخلصة .. والألم شبه معدوم أخف عن يوم تحطين املا .,, بس الجهة اللي من أمس مافي احساس الا إنج تسحبين شيء ..


تخيلوا ...


أنا سويت هالشيء تجربة وما كملت كل المكان .. المنطقة الأهم اللي تحت تبالها وقت أطول .. بس أسفل البطن بسرعة خلصت ..
وتصدقون إنه ينجلع بالأصابع حتى موب بالملقط .. يوم استعملت الملقط شليت الأشياء الصغيرة وايد بسهولة ..!!
أنا تميت أفكر .. عمري ما كنت أتوقع إن مفعول هالضماد قوي لها الدرجة على جذور الشعر .. هو ما يذوب الشعرة بس يضربها من صوب الجذر .. وتذبل

أنا قريت اللي مكتوب عليه ..
إنه 100 % ضد الماء وغير لاسع ..
يسمح بدخول الهواء خروج الرطوبة ..
يساعد على التئام الجروح ---------< هنيه فيه مادة طبية أكيد .. ممكن تكون هي السبب
مسكن فوري --------------< بعد نقطة مهمة
يبقى ثابتا لعدة أيام ثم يزول بطريقة طبيعية -----------------> وحياتكم شوية زيت أطفال في كلينكس وخلصنا ..!

سعره 64 درهم من صيدلية ابن سينا وموجود في كل الصيدليات

الحين أنا قررت أعتمده كجزء مهم من عملية التنظيف مالي .. لأنه سهل الاستخدام واااااايد .. مجرد تحطين النقاط من القطارة ع عود القطن اللي وياه وتوزعينه ع المنطقة اللي تبينها ..

ثاني شيء إنه ما يوسحخ أبدا أبدا .. لأنه يتجمد في 20 ثانية .. وشفاف ما ينحس به ..

وقررت أحطه بالليل قبل بيوم من التنظيف .. وثاني يوم المسا أنظف ..


علشان ياخذ الوقت كله وتذبل جذور الشعر عدل ..


تدرون إني استغربت كيف الشعر ينسحب بسرعة بالأصابع ..

والله ما أدري من شو يصنعون هالسوالف ...

هذي صورة الضماد السائل :


وجذيه يمسحون بالقطنة اللي وياه .. ( بتلاقون داخل أنبوبة صغيرة فيها المحلول و10 أغلفة كل غلاف فيه قطنة )



عموما .. أنا حطيت السالفة مع إني احترت كيف أكتبها وايد بس حطيتها لأني أباكم تستفيدون .. وأتمنى من أي وحدة تجرب ويضبط معاها الموضوع إنها تدعي لي بالخير والتوفيق والتيسير في أموري وشغلي وحياتي ..

وأرجوكم أرجوكم أرجوكم .. ما أريد حد ينقل الفكرة وينسبها لنفسه .. أنا جربت الموضوع على نفسي قبل لا أكتبه للبنات.. ما أريد أي حد ياخذ تعبي يوم كامل علشان أتأكد وينسبه لنفسه بارد مبرد .. ترا حرام وما أحلل أي شخص ينسب الفكرة لنفسه ومن الحين أقول عسى الله لا يوفق اللي تنسب السالفة لنفسها أو تنقل الفكرة من المنتدى لأي مكان بدون ما تذكر اسمي واسم المنتدى بعد .,.

أتمنى ان اكون أفدتكم منقول والله اعلم-----