صاحبة البسطه .....قصه واقعيه

الانسان تمر عليه مراحل صعبه في حياته ماديه نفسيه صحيه اجتماعيه
كل واحده حسب تحمله ومقدرته ومدى قربه من ربه
منهم من يتجاوزها بدون ماتأثر على حياته ابدا
ومنهم من يتجاوزها وطبعت اثر كبير في حياته
ومنهم الي يوقف عندها ويندب حظه ..
العمر يمشي هو محلك سر ..
مرت فينا ظروف ماديه صعبه
ما كان فيه احد موظف غير ابوي وراتبه قليل يادوب مصاريف الاكل والشرب..اكثر مبلغ نحصل عليه من ابوي كسوة العيد يعطي كل وحده منا 200ريال من الفرحه ماندري وش نسوي فيها...
لازم اشتري فيها ثوب وجزمة وشنطه واكسورات العيد احاول امشي اموري فيها واستغني عن بعض
الامور المهمه ..مشت حياتنا كذا والامور تمام
ولبسنا يطلع احلا لبس من ناحية التنسيق ولبساطه وبحكم انا كبار محد يعطينا عيديه 😭
كنت طالبة في المدرسه لما يجي وقت الشتاء كنت احلم البس فنيله كشخه مثل البنات
الموديلات اللي طالعه جاكيت جنز بدون كم وفرو من الداخل وسحاب من الامام ..أه ياقلبي على الفرو الدافي والسحاب اللي ادلع نفسي فيه افتح واسكر
يعني شوفوني ..أه على البرد والجوع ..
بعدين طلعت موضة الفنايل الي تجي قطعه وحده بدون كمر عليها رسومات في الصدر وثقيله
تدفي ظلوعاً من البرد تتصافق ..
وتوقد النار على قلباً من البرد ثلاجه
ياما حلمت فيها وتخيلتها ..وفيه بعد الفنايل اللي تجي كأنكم لابسين فنيلتين مع بعض ..قطعه داخل قطعه بلون مختلف ...اخلفت عقلي وعشت في خيالها دفيانه
كانت الاسعار غاليه وكسوت الشتاء حسب دخل الوالد
100 ريال لك واحد منا ..
وحتى لو لقيت فنيله بهذا المبلغ صعب الزق فيها طول الشتاء اكررها ولايخفى عليكم تعليقات بعض البنات
ماكان فيه محلات رخيصه هذاك الوقت..ولما رحت اتسوق مالقيت شي مقبول بهذا السعر...وانا اتفرج على البضايع شفت وحده تشتري فنايل ناعمه اللي تجي منفوشه مثل القطن الوحد 300ريال اخذت ثنتين حمرا وبيضا ماشاء الله ...
سبحان الله لو كل مسلم يلتمس حاجت اخوه المسلم ما لقينا محتاج وصار بيننا الموده والرحمه وقل الحسد
والكره والبغضا ..اقل شي يلتمس حاجت القريب من اهله وجماعته وجيرانه
فضلت ما اشتري واحتفظت بالفوس..ولما اشتد البرد لبست طرحه سودا في المدرسه ادفي راسي واذني
والمعلمات والمشرفات يفتكرون انه لفت انظار ودلع على قولتهم..
ما اسمع منهم الا يابناااات البسو فنايل وش هذا الدلع بس تبون تتعبون وتطيحون علينا...
وين الدلع يام راتب ولا حسيتي في غيرك ...
وين ميزانية المدرسه المخصصه لأصحاب الدخل المحدود.. لازم الطالبه تذل نفسها وتقول محتاجه.. المفروض المعلمات يبلغون الأخصائي عن الطالبه المحتاجه بحكم قربهم من الطالبات..
والمفروض الأخصائيه الاجتماعيه تتفقد حاجات الطالبات...الموضوع هذا كان زمان ...الان الوضع اختلف صارف فيه برنامج تكافل للطالب والطالبه بدايت كل سنه دراسيه يوزعون على الطلبه والطالبات..نموذج مدون فيه بيانات عن الاسم ..الدخل...السكن..عدد الاسره..مع من يسكن الطالب ..وارقام للتواصل
بعد دراسة الحالة يصرف للطالب والطالبه مساعده كل ترم دراسي غير المريول والشنطه وحتى الفسحه
عاندت نفسي وطول الشتاء مالبست فنيله لا داخليه ولا خارجيه.. وتحملت اشد البرد اللي اثر على صحتي الي الان .. مسكت معي ما البس فنيله لو انجلط ...
بس البرد مايرحم جبت معي بطانية الجيش اللي لونها بيج خفيفه طولها وعرضها متر..
اذا دخلت الفصل احطها على كتوفي تدفيني واذا جات المعلمه فسختها وحطيتها في الدرج.. متفشله منها ..كانت جالسه قبالي طالبه غنيه ماتكرر لبس الفنيله وتلبس من الغالي.. طالعت فيني من فوق لتحت وضحكت بستهزاء وهزت راسها وصدت عني..الم النظره اوجعني والضحكه كسرتني ..
حسيت بالفشيله حرمت بعدها اجيب البطانية وتحملت البرد.....الله يرحم حال اخواننا المسلمين في كل مكان يذوقون البرد والجوع والحرب الله يفرج لهم وينصرهم..مايحس فيهم الا من جرب حالهم....
هذي الغنيه اللي شايفه نفسها دخلتها مشاركه معنا بطلبها ..في رسم لوحه عشان الدرجات ..
جبت الوسيله ولألوان ورسمتها في البيت وخوي الصغير خطها لان خطه جميل..
كلفتني 10 ريال ..وطلبت من كل طالبه 5 ريال عددنا سته طالبات غيري..
مكسبي 20 ريال وفرحانه فيها وبعطي اخوي منها.. الوحه عجبت المعلمه عطتنا عليها درجات ..
كلهم عطوني وهذي الغنيه قالت ازعجتيني على خمسه ريال روحي اشتكيني للمعلمه وقولي ماعطتني خمسه ريال وهي تضحك بستهتار .. اشتكيتها لرب العباد.. اكثر ناس بخلا هم الاغنياء
وهذ في الاغلبيه ..
ستغربون ليش مامسحت فيها البلاط واخذت حقي منها وانا قادره ...ماكنت ابي احد يحس بحاجتي للفلوس والنقاش يكشف حاجتي ...
الانسان اللي فيه عزت نفس ماينزل للمهانه في الامور بسيطه مثل هذي ... هذي وجهة نظري
( ناس تحشمهم ..وناس تحشم نفسك عنهم )
اما المبالغ الكبيره مايحتاج اصحابها يوقفون عند البيبان فيه محاكم تجرهم من بيوتهم
لما شفت ظروفي الماديه صعبه
فكرت في اوقات العطل الدراسه ونهاية العام
افتح لي تجاره بسيطه ، جمعة مئة ريال
و شتريت كرتون عصير وبسكوت وبطاطس وجلست احسب المكسب في كل نوع
طلع المكسب بسيط جدا بس مافيه مشكله نحاول
بدية رحلة البسطه ؟؟
كان جنب بيتنا القديم حديقه صغيره رحت ابيع فيها وكل روحتي خوف ونحشات لا يشوفني
اخوي ويلعن خيري.. اخش الاكياس تحت عبايتي
واركض للحديقه مثل البطريق... عبايتي منتفشه مثل البرشوت.. مايهم اصدم في السيارات في عمود كهرب اهم شي اوصل و انزل نزول مضلي ...اخترت زاويه بعيده وتفننت في ترتيب بضاعتي...عين على بضاعتي وعين على الشارع اخاف يمر اخوي ويعرفني وينطل بضاعتي ويرجعني البيت يغسل شراعي..
كل يوم اجازف في الطلعه..
اختي تراقب البيت وانا انحاش ..البساطه الهاربه..
دوارت العيشه يبيلها مشقه ماحد ياكلها بساهل ...
مره ابيع بعشره وعشرين واكل شوي ..المكسب كليته بس عندي شعور ان معي فلوس كثيره اشوف شنطتي منتفخه من الريالات وفي الحقيقه مارجعت حتى راس المال..
استمريت على هذا الوضع مده قصيره ماشفت مكسب ماحصلت غير الروعات والطردي في الشوارع والنزول المضلي اخاف مره اطيح وتنكسر رقبتي..
لا حصلت فلوس ولا حصلت صحتي ...
وقفت فتره عن البيع ..بس التجار امثالي
لا يستسلمون بسهوله ..بعد سنه او اكثر شفت محلات يبيعون اقمشه نسائيه جمله بسعر رخيص ..
كسوه ثلاثه امتار ..من 10 الي 15 ريال خيل لي عقلي ان الزباين طق عصي علي وابيع
الكسوه من 20 الي 25 ريال
حسيت ان الحظ ضحكلي
بصير تاجره .....يتبع